生日翌日

生日翌日，發現年年我生日都會打長途電話比我既friend，今年竟然無打比我，嬲嬲地，但又擔心佢有事。今朝起身想打比佢，點知係icq度撞到正，佢大鑊啦。我劈頭第一句就係"你知唔知尋日係咩大日子呀?夠膽唔打比我。"佢即刻話佢有呀，仲不停咁打左好多次添。淨係今朝都打左兩次啦。啊，唔通係我尋晚睇戲熄左電話果陣佢打比我。噢，你真係唔好彩啦。跟住佢搞掂埋少少野就打比我講電話。佢同我真係無所不談，由以前我鍾意邊個呀，拍拖拍成點呀，都會講得一餐。大至人生大事，小至食飯訓覺都會講。衰得佢呀，成日都話我仲有後路，點解唔可以係前路者。都係唔好啦，做人唔可以咁貪心既。不過佢都講得岩，有咩都要去爭取，試過都總好過無做。同埋，要珍惜眼前既人。

今晚果集"鋼之鍊金術師"，哥哥做左一d野令到我發覺我地睇人有時太過著重人既外表啦。愛德華‧艾力克佢將無軀殼只係得靈魂依附既鎧甲都當成人。因為佢細佬都係同一類既人，佢只係會用一套方式去對代佢身邊所有既野。唔似得有d人，會見人講人話，見鬼講鬼話。我咁鍾意睇"鋼之鍊金術師"都係因為佢地有每件事都有一份堅定不移既信念，佢地有佢地一套既真理，你可以唔認同佢地，但你唔可以去改變佢地。仲有，佢地既兄弟情確實係令我覺得好感動。我仲記得細佬有一次同哥哥講，佢有一個願望就係可以再一次感覺到哥哥既體溫。係佢講呢句野之前，我真係無諗過可以感覺到其他人既體溫係咁幸福架。