遺忘的寶物

我尋晚喺床尾個書櫃到搵到一隻CD。

我已經好耐無買CD啦，最近買嘅就係上年年尾側田第一隻碟 - "Justin" ；同埋，啱啱買咗個幾月嘅張敬軒 - "笑忘書"。

尋晚搵返果隻CD：一隻我唔記得自己有買過，但入面首首歌我都覺得好好聽嘅CD。我拎返出嚟嘅時候，佢係仲未被開封架，即係完全未聽過。呢隻CD就係我喺4年前買嘅"少爺占廣播劇音樂全集"。如果有聽開少爺占廣播劇 -- <<好天氣>>﹑<<好天氣續集 - 十九歲>>，就會識得晒呢隻CD裡面大部份嘅歌。係呀，即係林一峰同林二汶早期嘅創作。我當時真係覺得佢哋把聲係天籟呀，其實而家都係只係聽得多咗咁解啫。表面上，我足足將佢打咗入冷宮4年，佢尋晚終於重見天日啦。

事實上係我太鍾意入面嘅歌，我一路都唔拾得開佢出嚟，求求其其聽完，我一路都好想用一日嘅時間，慢慢去"lon"呢隻碟。但擺吓一日﹑擺吓一個禮拜﹑擺吓一個月﹑擺吓一年……終於我擺埋咗佢4年。真係有D內疚。明明係好鍾意，但因為多餘嘅溺愛，搞到變成遺忘，錯過大好一段姻緣呢。(係我同隻CD嘅姻緣，本來佢可以伴住我呢4 年架嘛。)

唔知係咪得我先係咁架呢，我成日都因為太鍾意一D嘢，所以收埋佢，結果，就遺忘咗佢。係我太善忘﹑太無記性…定係呢個世界物質太充裕，五花八門，令到人成日都會忘記一D自己曾經好鍾意嘅嘢。