Andy 返港 (後記)

(八月十二日)

Andy 返左黎香港，佢係我三年前過UK果陣識既friend，即係Trevor係UK既flat-mate。佢放成個月假，所以返黎香港探親聚舊。佢話我無咩點變，我都覺得佢無咩點變，仲係咁溫柔體貼﹑咁識照顧人。

Andy尋晚上左黎我公司搵我，約埋Trevor係中環地鐵站等，跟住就落去銅鑼灣食飯。我地去食越南野，不過，果間餐廳太多人，好嘈，搞到我好頭痛，無晒心機傾計。之後，Andy比左粒頭痛藥我食，先至好返d。因為唔係好肚餓，所以我食左唔係好多野。

食完飯，我地去左打機，當然係打我最愛既賽車Game啦。今日，Trevor教識左我，要甩尾就要入彎扭軚之後踩brake，然後再加油。轉彎果陣要將個軚扭相反方向，until架車直返就要回軚。我成日都調轉左d次序，同埋回軚回得唔好，所以成日轉完彎都"fing"出去。我真係好有心機去聽Trevor講同埋真係有去試佢教我既方法，其實都好左d架啦。不過我會再練多d既。除左賽車之外，我地仲有去玩果部單車Game，我真係出師不利呀，一出閘就脫腳，我唔小心甩腳，跟住成個腳踏就撞左埋去我上五寸下五寸度，嘩，好痛呀。(後尾發現原來佢已經瘀左啦。)打完機，我地去左影貼紙相。點知臨尾部機hang左，我地有得再影多次。佢地兩個係d相度加公仔果陣，簡直就係傻左。玩到唔捨得走，仲畫到d相好搞笑。

原先，打完機Trevor諗住走，點知我同Andy唔夠喉，所以我地提議唱k，Trevor亦都陪埋我地去。一唱就唱到六點啦。真係玩到天光。我跟住仲要返工添呀。係唱k果陣佢地點左首我忘記左一排既歌，我聽到好開心呀，仲令我諗返起d野。

(八月十三日)

唱完k，Trevor頂唔順搭左的士返屋企。Andy就陪我行返中銀。但行到皇后大道東尾條天橋，我都係頂唔順啦，所以都係搭左兩個站"叮叮"返公司。返到公司七點幾，Andy陪左我一陣，我就訓著左，佢幫我set左個alarm八點半響就走左，佢臨走仲話佢會打電話morning call醒我。跟八點半個alarm響，我整熄左佢之後，唔覺意又訓返，十五分鐘之後，Andy就打比我，佢叫我起身，仲話佢知我會再訓返，所以佢遲十五分鐘先打比我，等我可以訓多陣。細心呢！邊個姊妹有興趣，可以出聲喎。我可以介紹佢比你地識架，好野黎架。

Andy收左線之後我都斷斷續續訓多左一陣，跟住九點半度老細殺到黎啦。佢問我除左等果幾張枱之外，仲有咩做？傻架，我本來放假架嘛，無啦啦邊有野做者。所以，佢叫我幫佢計左d margin佢先。都好呀，好過無野做又訓過。計緊margin既時候，d枱送到黎啦，咁d人由佢地係隔離裝枱，我由我計margin。佢地搞掂之後，我搵個亞姐黎吸塵，我又搞掂埋d margin。再跟住幫Marc 訂裝埋兩本booklet。諗住返屋企沖涼去搵肥仔啦。

係等巴士返屋企果陣，諗起US個friend，所以打左個電話比佢。一路傾到返屋企。點知我返到屋企，亞媽話Dell果個sales打比我，話老闆娘比左張期票佢，所以唔可以即日過數，訂唔到機。0_0 唔係咁大整蠱呀，因為即日訂唔到，d機就唔可以星期三送到黎，老細實發老脾都得啦。即刻打比老闆娘，老闆娘就叫我問清楚個sales張票究竟出左咩事。搵鬼搵馬咩，星期六下晝兩點啦，係人都收左工啦。我醒起個sales有fax到張invoice比我地，我唔肯定佢有無寫埋個mobile係上面，但點都要搏一搏。所以，又返左公司睇下有無機啦。點知返到去先發現張invoice咩都無，白行。死啦，都唔知點同老細同老闆娘交代，係呢個時候真係急到喊左出黎。但都要硬住頭皮打比老闆娘，好在佢無再"chur"我。但我都係收左線之後喊左一陣，發洩左一陣咁啦。

跟住就過左深水埗搵肥仔。去到佢問我食左野未，我先醒起我尋晚食左好少野之後，一直都未食過野。算啦，都唔夠訓係咩都反應緩慢d架啦，連肚唔肚餓都唔係好覺。佢同我係黃金兜左個圈搵老翻，搵唔到之後，我地跟返左柴灣勒。

返到柴灣，肥仔同我去食個early dinner，跟住就一齊返我屋企。好囉，有得沖涼囉﹗沖完涼，等亞媽同亞妹食完飯。我同亞媽同肥仔又開始呢個marjong training。真係巴鬼，我三十幾四廿個鐘未訓過覺，仲去打麻雀，唔輸有鬼啦。所以我就係完全無還擊之力既情況下，以一個人一家輸兩家既賽果，輸左比佢地兩個。

我就係咁過左我呢四十個鐘頭勒。

丫，唔記得講樣野添。我唔知係咪攰得滯呢。去櫃員機拎錢果陣，明明係五張一百蚊，數左四張。我覺得部櫃員機呃我錢，所以就打去櫃員機中心同佢理論。點知係我理論緊既時候，肥仔幫我數多次，佢竟然數到有五張喎。今次真係撞鬼勒，好"nor"皮添。不過算啦，櫃員機中心個接線生都見唔到我個樣，又唔知我係乜水，都無咩啫。 : p