好彩…

尋晚去左"無良"度拜年，新年嘛，佢就梗係要派利是啦。去到佢比一搭利是我，叫我抽喎。咁抽啦，因為我買左野上佢屋企拜年，(應該係小鵬買先啱!唔緊要佢話晒都係一個無名英雄，有咩事我頂﹑有咩野我受﹑有咩彩我攞。嘻嘻…)所以我可以抽三封利是，抽完梗係即刻拆啦。第一封一開就係$50，諗咁正，$50封咁豪。點知其他兩封都係$20，我梗係即刻睇下小鵬果兩封抽到咩啦。佢仲衰，一封$20，一封$10。無良話我抽到兩封$20已經好叻，班friend個個都係抽到$10封咋。我仲要抽埋封$50，都無人抽到過。算佢啦，算係個好既開始。

跟住一大棚人就開始玩"大細"呀﹑"魚蝦蟹"呀﹑"三公"呀﹑"廿一點"呀咁，我仲學識玩"十三張"。我同小鵬五十蚊起家，贏左$111呀。有兩倍return，係非常好既成績。玩到十二點幾走，我都唔想咁早走架。d人個個都走勒，我今日又要返工，同埋割禾青梗係走啦。