臨淵羨魚

尋晚同二表哥食飯，大家講開近排點。亞威表哥話佢用左三萬幾蚊影左一輯婚紗相。由廿九幅相加到百幾幅，佢話佢無揀過d相全部要晒。嘩，好貴啫。結婚係咪真係要洗咁多錢呀?!佢仲話其實係香港影都唔靚，佢話係關島影就真係靚勒。我都明結婚係一件好開心既事，但會唔會奢侈左d呢。
跟住又講下佢近排買d咩股票，邊隻股票買得過，黎緊又有邊隻股票要留意……佢話佢公司個個都玩股票。開口埋口都係d股票。點解我唔係既?我係公司，同事講既都係邊隻紅酒﹑白酒靚﹑下次去邊間lounge飲野個view正﹑幾時一齊去試下支"啦fit"﹑邊隻喇叭d聲靚﹑邊部膽機正﹑電影展邊套戲好睇﹑而家做緊果套話劇得唔得……聽落好high class﹑好脫俗。但諗落係好悶囉。我諗我都係唔鍾意住天堂架啦，都係貶返我做庶民吧啦。
再黎表哥又講去邊旅行好，邊度既遊樂場好玩。我最遠都淨係去過英國咋。有咩好講喎！佢地講緊咩時間去芬蘭好呀﹑比利時有幾唔好玩呀﹑德國邊個球場靚呀﹑英超門票有幾貴呀。真係同人唔同命，點解無我份既……都係唔好問點解，咩都有得解既，我就唔洗坐係度啦。
但我係表哥身上睇到一樣野，同居都係一個儲錢既方法。

我今日終於都"的"起心肝去剪短d頭髮。一直都覺得只有靚人剪短頭髮先好睇，所以一直都唔敢剪方短，第一驚發現自己真係唔靚，第二我實在太多頭髮，我驚個髮型師駕馭唔到佢。但剪左出黎都唔錯，雖然話好靚又真係"mon"左d，但都總算順眼既。

一週月大事回顧

星期一同亞姐慶祝生日，講開話我個blog 無野睇，係呀，大家知啦，我懶丫嘛。成個月無update就梗係無野睇啦。經ｄ朋友仔咁樣一話，都覺得係時候對ｄ關心我既人交代下我既近況。其實，可以話有好多野發生左，亦都可以話呢ｄ野好少事，
一:學姐事件啦﹑
二:Anutie食lunch事件啦﹑
三:UA CHART LAUNCH啦﹑
四:大學同學打麻雀事件啦﹑
五:……
我都唔識得講啦。係因為……好多野我都無咩感覺，在意既都只係對方會點諗。
有D為別人而活既感覺，日子總係頻頻撲撲，好攰好攰既感覺。我諗我應該去旅行，我唔係要去玩，我只係想有個地方比我咩都唔洗諗，咩都唔洗煩。

最近，我發現自己開始吸毒。我發現自己瘋狂迷戀一個台灣演員(無聽錯，係"迷戀"，係"瘋狂迷戀"，廿幾歲 人仲搞D咁既野，真係腦"旬"都未生埋)。不停睇佢做過既台劇，甚至一日之內同一集我都可以睇三次；明知第二日要返工，仍然download佢最新果集台劇到一點幾，仲要睇埋先訓，第二朝完全無精神做野，簡直係痴線一樣。