打邊爐闖的禍

我不嬲都好鍾意打邊爐，無咩點解，只係覺得大家坐埋一齊，一邊等嘢食，一邊傾計好鬼happy，有講有笑，可以食得多d。同埋，d嘢一熟，即刻夾嚟食，熱辣辣好好味。

我都有一排無打邊爐啦，都係因為無人同我打啦。
不過，今晚鵬爺應承同我去打邊爐喎，勁開心啦。雖然只係得兩條友，食唔得好多嘢，不過有殺錯無放過。
可能因為天氣唔係太凍，所以都唔係有好多地方有得打邊爐。行咗好一陣先搵到近住旺角工業貿易署斜對面果間"金御"。本來都想搵間任食嘅，不過實在太難搵啦，所以見佢話兩個人送一碟肥牛，好啦殺你啦。

入到去，可能因為有得叫小菜，所以打邊爐嘅人始終唔係咁多。我哋無理咁多，坐低就開始點嘢食。鵬爺又驚我眼闊肚窄，所以佢問晒我想食乜，先再喺我想食嘅嘢裡面揀d出嚟叫。我反而無咩所謂，唔好晒嘢都係啱嘅。

食咗兩個鐘，好飽。開始放慢，邊睇電視再食埋剩返嘅少少嘢。點知，坐坐吓，我覺得個肚開始痛。唔知係咪我淥得唔夠熟呢，諗住痛一陣就無事啦。點知喺離開咗間食肆之後，肚痛升級，陣痛頗密咗呀。過咗一陣仲連鵬爺都加入"痛"團添。我哋搵去咗朗豪坊度借嘢啦。點知我都仲係痛到唔停，搞咗好耐(個人同個肚都係)個人開始手軟腳軟，先敢搭巴士返屋企。不過上咗車之後，個肚就無再痛啦。好彩咋。