Long time no see....

軟硬個long time no see show加場，好想睇呀。
唔知仲有無飛賣呢。

等放假

返埋今日就有兩日假放勒。
所以，下晝係完全無乜心機去做野既。

你知唔知呢兩日既假期對我黎講係幾咁緊要，一定要連繼續放兩日假先至似有休息架嘛。
星期五既夜晚係前奏，衝咗五日，呢晚就係準備休息既開始勒。
星期六whole day都係playing day啦。
星期日上半晝係延繼之前一日既餘溫，夜晚就係收拾心情，第二日都做過。
你話點可以將咁多個步驟放喺日半度晒呀，所以5日工作天is a good approach。

5-day work

政府實行5日工作日，我係首批"受惠"既員工，但不明文規定，麻煩大家放遲少少。其實平時都放遲架啦，我又唔係公務員，點會九時開燈，五時熄燈丫。我都已經OT咗成三個weeks啦。
你唔叫，我都無得走架啦。我車……

我都太衝動呢！

我諗我都太衝動啦！

我啱啱醒起，亞妹今日要做物理治療。啱啱問返佢今日做物理治療做成點。佢話都係做返之前做既動作，睇吓做唔做到。佢話做物理治療果陣都做得到。咁我再問佢，做完返黎點呀?佢話原來佢做完物理治療之後，就一路痛啦。

原來亞妹係因為背痛，所以唔可以自己去裝飯。點解唔早d同我講啫。

我唔舒服喎……

唔知點解今日忽然間作感冒，週身骨痛﹑不停流鼻水﹑頭重重﹑喉嚨仲好乾添。病咗成日，但都唔可以早走，因為認承咗個PM呢個week會幫佢開OT，做好晒d SF會gen既圖。話晒都認承咗人，點都要做埋佢先得。就係咁今日就係公司做到最夜走果個。

臨放工，亞媽話亞妹想要麥當奴今晚宵夜，叫我放工返黎喺樓下買比佢。唉，亞妹都已經喺屋企由朝坐到晚架啦。自己落樓下買，咪當做吓運動，散吓步囉。況且，係佢話要食，唔係我迫佢食喎。呢樣都算勒，就當我順路。

但食飯果陣，我已經食完飯，但我已經辛苦到無力行開from the table。喺呢個時候，亞妹竟然要我幫佢裝飯。我唔介意幫佢，喺我無病無痛既時候。我好輕聲咁同佢講："我唔舒服喎﹗"佢就同我講："我夠唔舒服咗好耐啦！"我心諗唔係呱，你條腰痛，都唔係今日既事，裝飯d咁簡單既野，自己應該做到綽綽有餘啦。我唔去，佢就坐咗喺度唔去裝飯。我最後都係唔忍心，去咗幫佢裝飯。唉，我亞妹幾時先肯自己照顧自己呢，係唔係到我死果日?!

我好耐無送你禮物

尋晚睇左半場荷蘭對科特迪瓦就頂唔順去訓覺，今朝成十一點先起身。

一起身就打比小鵬，今日我唔得閒去見吓佢，硬係覺得周身唔自在。
講電話果陣講開，我好耐無送禮物比小鵬。我其實真係好耐無買野比佢，係我唔識得買野氹人開心，因為太過物質既野，我覺得無新意，同埋太浪費，因為新科技產品層出不窮，盞晒錢﹔要花心思既野，我又唔識整，整到肉肉酸酸都無謂送比人咁羞家啦。就係咁，拖吓拖吓，我送過比小鵬既野真係唔多，唔係佢話想要乜，我都好難諗到送咩比佢。

今日講返起呢樣野既時候，佢竟然同我講，我上次咪送左自己比佢囉。(-_-") …我都明白聽到呢句野女仔應該好開心，個男仔最想要既係自己…我亦都有心動既一刹，我可惜既係，我唔再係細路女，我唔會再咁單純相信呢句說話，(嚴重聲明：我係唔相信呢句說話，而唔係唔相信小鵬。)以我拍拖既經驗，甜言蜜語情侣間當然一定會講，講果一刻我都相信係出自真心，但係講果一剎，有幾多個真係明白就算係甜言蜜語都有一個承諾係裡面。當我未真正可以肯定自己可以遵守呢個諾言之前，我唔可以再求其是但為咗討人歡喜亂咁"up"囉。

就好似介指一樣，唔好睇少一件咁細小既玩意，佢既殺傷力大得驚人。我以前都會同男朋友買一對，一人一隻，代表承認對方係自己心裡面有住一個重要既地位。買既果一刻就梗係心甜啦。但亦都有唔少人試過分手後，望住隻介指果種此情不再﹑傷心欲絶既感覺。因為咁，有好幾次我同小鵬都有衝動去買對介指作為紀念，到最後，我都係打消左呢個念頭。

因為你唔會知道呢句說話或者呢件玩意日後會帶比對方，或者係雙方幾多既壓力﹑傷痛﹑眼淚……
所以，我係而家呢刻未可以將自己送比你住。

心情忐忑

今日世界盃開波啦，好期待。仲記得細個同表哥一齊睇係美國舉辦既世界盃，考試唔溫書，三更半夜唔訓，咁係度睇波，仲要晚晚嘈醒亞媽，跟住亞媽就會幫我地煮公仔麵做宵夜。好回味既日子，一齊睇波，勁開心。
但因為我屋企無裝有線，所以唔係場場波都有得睇。覺得好似呢件事離自己好遠，人人都談論既事，自己竟然唔可以參與其中，的確有d失落。

我同肥仔比賽，大家各自入二百蚊落馬會既account。世界盃完左之後，睇下邊個account多錢d。(但小鵬連果二百蚊都幫我入埋)

當你覺得一個人煩……

前兩日聽收音機講到，"當一個人對你黎講，你覺得好煩﹑困擾，你已經唔再愛呢個人。"呢句說話我來來回回諗左好多次，因為我近排真係有少少覺得亞妹好煩﹑好唔想見到佢。我跟本就唔知佢諗乜；做乜成日係屋企坐，唔搵野做；問親佢就發我脾氣……我開始對佢有微言，我覺得佢好食懶非，唔想做野，有人照顧。我開始有d覺得佢好討厭。幫佢搵埋野，叫佢apply啫，佢都唔肯；問佢點解又叫我唔好理佢。大佬呀，你比個理由我，說服到我可以放心既，我咪唔理你囉。呢件事的確令到我覺得好困擾。我開始諗我係咪唔再錫我個妹呢?!但我得一個妹，我有咩可能唔錫佢，我又唔係要佢賺大錢，好出名，我只係想佢過佢開開心心既日子啫。為咩佢要日日都將自己收埋係房，但又一d都唔開心。
直到今日，佢先講，原來佢條腰因為打波整親，已經傷到要做物理治療，因為腰傷，佢連打唔打到波都成問題，而且仲令到手腳都傷埋，而家連伸直隻腳都覺得痛。亞妹就係咁，有咩都唔講出黎，有咩都自己一個人承受﹑解決，但佢所用既解決方法，全部都係消極到極點。佢話佢唔可以再打波就會比人睇唔起，所有人都會睇死佢。點可以咁架?!我咁錫佢，亞媽咁錫佢，佢唔通一d都唔知架咩?
不過，我諗我知道答案。我今日見到一隻好細隻既麻雀，佢係個地下度吱吱咁叫，我估佢係跌左落地下，飛唔返上個巢度。我好想幫佢，我好驚佢會死。我想拾起佢，將佢放返去佢個巢。但當我伸手去抱起佢既時候，佢拒絶呀。佢唔比我抱佢，我只好放棄，但我又真係好唔忍心留佢係果度，可惜我唔知可以點做。小鵬勸我，話佢可能只係試飛失敗，佢有辦法會自己生存，呢d係天賦既本能，所以我放手行開。我諗對亞妹都應該一樣，我都應該行開，但我唔會對亞妹放手，只要佢需要，我都一定會幫佢。但首先既係，佢真係有決心自己飛，開開心心去看呢個世界，屬於佢既世界。