命運自選台(Click)

星期六晚又去搵戲睇，想去hea吓。無咩特別好想睇，好是但咁揀咗套叫"命運自選台(click)"，睇落個樣都好似幾搞笑。好啦，就揀你啦。

開頭果一半都真係好搞笑，但睇睇吓原來佢有一個好大嘅message想講。套戲係講一個建築師日日夜夜不停做，佢為嘅其實係想家人過得好d。但佢就因為做嘢而忽略咗屋企，佢連屋企嘅遙控都搞唔清楚邊個打邊個。佢覺得好煩，打算去買過個萬能遙控器。

但佢誤打誤撞，得到一個可以遙控人生嘅遙控。佢就用住呢個remote 過咗一個佢覺得好開心嘅一年時間，但佢因為不停fast forward佢嘅人生，skip晒所有辛勞嘅工作過程，只享受工作嘅成果。而喺佢skip工作過程嘅同時，佢都錯過咗佢同家人相處嘅時間。結果，佢失去咗佢最錫嘅兩個仔女嘅童年，佢一生最愛嘅老婆，佢唯一嘅亞爸，佢嘅健康……

戲話到比我聽，人生係充滿甜酸苦辣，因為你有付出，所以無論收獲係點，都係值得。對於家人，同佢哋相處嘅時間係唔可以返轉頭。同家人相處嘅每一分每一秒都係你一生人嘅瑰寶。唔好為咗工作而忽略你身邊嘅人。