有能力就有價值，關於愛情我們都無能為力

某朋友又陷於感情破裂邊緣，痛不欲生。真係"想開口又沉默 想分手 又難受"。另一半唔能夠作決定，只好自己為呢件事作個抉擇，雖然不情不願，心結畢竟打唔開，只好自己抽身。

我明白感情事係令人失去理智，唔到人去扮堅強，因為對住自己鍾意嘅人，每個人都係貪婪﹑軟弱﹑固執…有得揀嘅唔會選擇放手。但世事豈可總如人意，你一直好盼望嘅，當你得到手，原來又係另一回事。感情…往往會誤會而結合，因了解而分開，咁樣嘅結局每每都只係帶嚟無限嘅難過。

拍拖，本來就係將一個人嘅開心放大一倍去感染另一個人。如果得出嚟嘅結果係兩個人傷心同難過，根本就係違反拍拖條例第一條(上半條)。咁嘅愛情終有一日遭到淘汰……

現請在坐各位謹記雯雯拍拖守則:
一. 要開心，也要真心
二. 要放任對方，也要克制自己。
三. 要愛對方，也愛自己
四. 要忠於自己，也體諒對方
五. 要有自己嘅思想，也聽對方意見
六. 要時時糖"痴"豆，也要有私人天地
七. 要努力工作，也要一齊食晚飯
八. 可以鬧交，但唔可以記仇
九. 可以口角，但唔可以動武
十. 可以彈三彈四，但唔可以惡意批評
十一. 可以擅用權利，但都有義務
十二. 可以私約朋友，但要事先上奏
十三. 可以比你做皇帝，但我都係皇后(人人平等)

幸福與你同在。 ^_^

令自己開心嘅方法 之一

做一d自己平時唔敢做嘅傻事，喺無人知嘅情況下，令自己開心應該係最簡單嘅快樂吧!

街機﹑遊戲機

尋日，小鵬抽起條筋話想食tea buffet，我諗住銅鑼灣多酒店可以多d選擇，但去到銅鑼灣行去維園對面果間酒店，佢地得lunch buffet，無tea buffet，唯有去第二間啦，可惜由於天氣太熱同太曬，小鵬行左一個街口就成個人溶左。最後，都係決定去唱個k-tea算，下個星期等我再origanise過先再去啦。

唱完k，行左一陣街，見到附近有一間樓上機舖，我地都手痕，所以就上左去試下個新場。個場真係好新，但d game就一般啦，勝在唔多人同無煙味。都係決定係果度流連一下，玩左一陣岩亞妹話過黎join我地喎，咁我地就繼續打住等，佢黎到好敷衍咁同我地玩左兩舖time crisis同手指指之後，見亞妹都唔興奮，我就迫左佢去同我打泰鼓，開始有d反應啦，唔好比佢停，再拉佢去玩籃球機，初時係我地兩姊妹對小鵬一個鬥高分，小鵬比我地兩姊妹既"車輪手"打到無"訂"抖。最尾，我地三個人兩個兩個輪流比賽鬥高分。嘻嘻…單睇身型，我簡直就係輸足一條街呀，但係事實証明，我先係得分最多果個呀。啊啊啊YO-HOO…失禮晒。可惜，都係樂極生悲，我因為唔夠高，係射籃既時候，彈下彈下彈到一個膝頭哥撞左埋部機度，而家個膝頭哥瘀晒。好在我都係一個好瘀得既人，小小瘀傷難唔到我既。雖然係有少少傷，但我同亞妹都係玩到唔願走，小鵬差d要拉一個抱一個先可以出到門口。

繼尋日去完打街之後，我今日就有新既wii 玩勒。因為小鵬佢join左bbtv，所以就換左部wii返黎。就係咁佢陪我學完琴之後，一齊去左旺角度拎部wii，再順手過埋好景度改機同買game。去到改完機試時候，比個老細嚇窒左我地，佢好鄭重咁同我地講左幾次，重覆又重覆咁同我地講，部wii每次買隻新game返黎第一次玩，都會叫我地更新。但要小心，因為部wii係日版，如果唔小心用左隻美版既game去更新，部機就會比佢lock死左。由於lock死既原因不明，老細話lock就之後而家係未有得解，所以部機就會被判死刑。佢咁講一講，真係嚇死我呀。所以，各位鄉親父老，叔伯兄弟，大叔大嬸，真係要黎玩既時候就要提高警覺，加倍留神，萬分注意啦，面斥不雅嘛。 = ) 包涵包涵﹑有勞有勞。

勁有potential升級到鑽石嘅王老五

尋夜同一個都唔記得幾耐無見嘅朋友傾電話，唔記得幾耐嘅原因，因為我哋都唔會留意幾時先會見一次，我哋試過三年無見，我哋試過同居咗一個禮拜多d，我哋又會失驚無神有一排成日見……總之就無一定嘅pattern啦。但我哋一d都唔介意嘅原因，係因為每次見返都唔會有生疏嘅感覺。

尋晚我哋又傾咗一陣電話，原本係約食飯，但因為太耐無見，尋冕傾得比較耐，交代吓大家嘅近況咁啦。

我一向都好欣賞呢個friend，佢係我補習時候識嘅friend嘅舊同學，但我就同佢比較熟，比較傾得嚟。初初識佢完全係一個大細路，留學英國嘅佢，同香港見到嘅男仔完全唔同，感覺上就係比較gentlement。機於禮尚往來嘅槪念，我亦都比較照顧佢。

其實，佢算係一個頗完美嘅人，但有一樣嘢我比較擔心佢。由我識佢到而家，呢位人兄一次拖都未拍過。感覺上佢就好似一個唔識付出感情嘅人，可能係佢眼角高，可能係佢未遇到一個令佢肯付出感情嘅人，可能係佢仲未學識點解愛人……所以，我好擔心佢，會孤獨終老。

雖然我有諗過介紹我身邊嘅女朋友比佢識，之不過，
第一: 我又唔想做媒人(媒人好難做架…)
第二: 男女之間嘅事，要有eel嘅話，就算隔幾遠都會遇到，旁人就本就幫唔到。
第三: 我其實都懷疑過佢會唔會係唔鍾意女仔。(我尋晚問過佢，佢係鍾意女仔嘅，咁我都放心d)

一個事業有為，有車有樓，樣貌端好嘅男仔，唔急住搵女朋友，一定有佢嘅原因。講真，再過多五年，我可以寫包單，佢一定係一個搶手嘅鑽石王老五，到時就可以慢慢揀啦。 ^_^

Training Day 3

今日lunch去咗行書局，見到一本近期好鍾意嘅繪本出到第三冊啦。本繪本叫"150cm life"，我完全覺得我應該收佢版權費，佢入面嘅故仔每一個都有喺我身上發生。

今冊有一個故仔，我一睇完就真係忍唔住笑，因為呢件事之前真係有發生喺我身上。

話說，中學時期每年開學都要去影學生相，但我成日都會唔記得，有一次喺返學第一日我去咗地鐵站度影即影即有。即影即有嘅櫈係可以氹氹轉咁轉上轉落，調教高度。果次去影相嘅時候，我一坐落張櫈度，就即刻彈返起身，因為坐咗落去之後，個高度唔夠高，要調返高張櫈先meet到個高度，咁我就轉高咗佢兩圈。再坐返落去，都依然係唔夠高，又再爬返落嚟，再轉高d，諗住轉多幾個圈轉高d張櫈，一路轉一路轉，張櫈就喺呢個時候比我轉咗出嚟跌咗落地，發出巨響，嚇到我眼都大埋，啦啦聲拾返起張櫈反方向轉返佢入去。

最後，我都係無坐喺度影，只我將張櫈再次轉返最矮，好似日本人咁跪咗上去，就返個鏡頭咁影，影完張相就奇奇怪怪咁無咗條頸。

所以我而家去影証件相都會去影相舖影，有人serve我，唔洗咁"呢 hair"。

今日見到同樣嘅故事出現喺呢本繪本，先知原來我並唔係唯一嘅細粒人，遇過呢d細粒人先會遇到嘅問題。

以前，我都會好介意自己太細粒，但大大吓發現細細粒都幾好呀，起碼我從來都唔需要低頭做人，因為我從來都唔會比嘢撞親頭。 =)

Training Day 2

今日係第二日嘅training，今朝早咗三個字出門口，遲少咗三個字。

今日講嘅係configuration，其實佢講嘅嘢一d都唔新，我做cast個project都一路用緊。不過，聽咗都無壞嘅，等自己再熟d啫。

自從上咗u，都好唔慣叫miss 同亞sir，除咗警察之外，對咗個tutor成日都唔叫佢個名，梗係覺得好生外。放學果陣，我終於都忍唔住問咗佢叫咩名。搞到佢以為自己無介紹過自己，我咪同佢解釋因為我尋日係late-comer，所以我都唔sure佢有無介紹過自己。但佢最搞笑嘅係，佢聽完我個reason就點咗吓頭。但都唔打算講自己個名喎，我望咗佢一陣見我仲等緊佢自我介紹嘅時候，佢竟然同我講佢個名我唔會識讀。我有少少嬲佢睇小我，不過佢接住講完佢個名之後，我就真係掹大個口得個窿，我淨係聽到佢叫"nam.........."。跟住，我就"nam.........."，佢笑笑口同我講，叫我以後叫佢做"nam"就得啦喎。真失禮呀。 =p

今日lunch無人陪我食呀，不過唔緊要我早有準備，我帶咗本張小嫺去睇。我一路食飯，一路聽歌同睇小說。我一個人坐咗張4人枱，坐咗一陣，開始多人食飯，有個姐姐仔埋嚟搭枱，佢又係一個人，又係拎住本書同用headphone塞住對耳仔，咁我哋兩個就各據一方咁睇咗個零鐘頭嘞。我都幾無賴。

無咗工，諗住去買"神奇4俠"星期五嘅飛，點知未有得預售，我都佑預售只係3日，但我尋晚真係喺網上面睇到有星期四嘅飛賣，咁尋日預售星期四，今日預售星期五都好正常啫。點知佢就係無得賣喎，搞到我好似好一廂情願咁，又做咗件傻事添。

行咗一陣，個天又開始落雨唯有搭地鐵上返中環，因為約咗同事一齊去睇"愛情回水(cash back)"，因為我另一個同事highly recommend，所以我哋一行三個女仔就走咗去睇嘞。(女仔真係易呃呀)不過，套戲都真係唔錯，一套愛情小品啦，都睇得幾舒服。但有一樣嘢仲吸引我嘅就係我終於都見到周杰倫做導演果套"不能說的秘密"嘅poster同trailer啦。yeah~~不過，講真(我咁鍾意佢都係咁話。)佢扮呢個高中生真係好無說服力囉。

Training Day 1

我今朝九點要過奧運站上training，因為我太愛搭巴士嘅關係，今朝都誓要搭巴士。

但好唔好彩，今日大塞車。我去到旺角己經九點，仲要搭小巴入奧運，一定大遲到啦。
去到奧運，又發現自己唔記得去邊幢tower上堂。唯有打電話返公司，拜託坐我隔離嘅April，幫我login返部機check返個notes，先知原來喺邊度上堂。

上到training room都已經九點半lu。anyway，我都唔係最遲果個啦。咁每部機上面都有嚟training嘅人嘅名，(唉，佢哋又串錯我個名啦。)咁我去到見到自己個名，就一個屁股坐落去啦。

聽咗三分鐘都唔知個講師講乜，佢d 印度口音，我真係聽到側晒耳。上半day堂仲攰過返工。好彩，慢慢都習慣咗。原本以我嘅性格，如果我再一d都聽唔到佢講咩嘅話，我一定會totally ignore佢，但又好唔好彩，唔知點解佢勁鍾意叫我答問題，咁搞，想魂遊都好難啦。

而坐我隔離有個叫kelvin嘅男仔，(都算係全場最唔錯果個)佢上到一半，聽到個講師叫咗幾次人名，佢就好搞鬼咁指住我個名問我，呢個係你個名呀，我點吓頭，佢就話:"死嘞，我坐錯位添。"跟住佢就將佢原本個名拎返過嚟，咁跟住呢4日，佢都要同我坐啦。 ^_^

仲有，我上training嘅時候，好似撞返我一個中五嘅舊同學，不過我哋都係同班咗一年，我諗佢唔係好認得我lu。不過，我仲記得佢個中文名喎。

我的性格是

睇完amanda嘅blog，見佢做咗個test去分析吓自己咩性格，所以我又八八卦卦走去玩。實果如下：
您(即係我呀!!)的性格类型是“ENFJ”(外向+直觉+情感+判断)

温情，有同情心，反應敏捷，有責任感。非常關注别人的情緒、需要和動機。善於發現他人的潛能，並希望能幫助他們實現。能夠成為個人或群體成長和進步的催化劑。忠誠，對讚美和批評都能做出積極地回應。友善、好社交。在團體中能很好地幫助他人，並有鼓舞他人的領導能力。

ENFJ型的人熱愛人類，他們認為人的感情是最重要的。而且他們很自然地關心别人，以熱情的態度對待生命，感受與個人相關的所有事物。由於他們很理想化，按照自己的價值觀生活，因此ENFJ型的人對於他們所尊重和敬佩的人、事業和機構非常忠誠。他們精力充沛、滿腔熱情、富有責任感、勤勤懇懇、鍥而不捨。 ENFJ型的人具有自我批評的自然傾向。然而，他們對他人的情感具有責任心，所以ENFJ型的人很少在公共場合批評人。他們敏銳地意識到什麼是（或不是）合適的行為。他們彬彬有禮、富有魅力、討人喜歡、深諳社會。ENFJ型的人具有平和的性格與忍耐力，他們長於外交，擅長在自己的周團激發幽默感。他們是天然的領導者，受人歡迎而有魅 力。他們常常得利於自己口頭表達的天份，願意成為出色的傳播工作者。 ENFJ型的人在自已對情況感受的基礎上做决定，而不是基於事實本身。他們對顯而易見的事物之外的可能性，以及這些可能性以怎樣的方式影響他人感興趣。 ENFJ型的人天生具有條理性，他們喜歡一種有安排的世界，並且希望别人也是如此。即使其他人正在做决定，他們還是喜歡把問題解決了。 ENFJ型的人富有同情心和理解力，願意培養和支持他人。他們能很好地理解别人，有責任感和關心他人。由於他們是理想主義者，因此他們通常能看到别人身上的優點。

您適合的領域有：培訓、咨詢、教育、新聞傳播、公共關係、文化藝術

您適合的職業有：
· 人力資源培訓主任
· 銷售經理
· 小企業經理
· 程序設計員
· 生態旅遊業専家
· 廣告客户經理
· 公關專業人士
· 協調人
· 交流總裁
· 作家／記者
· 非營利機構總裁
· 雜誌編輯
· 電視製片人
· 市場專員
· 社會工作者
· 人力資源管理
· 職業指導顧問
· 心理咨詢工作者
· 大學教師（人文學科類）
· 教育學、心理學研究人員
· 撰稿人
· 節目主持人（新聞﹑採訪類）
· 公共關係專家
· 社會活動家
· 文藝工作者
· 平面設計師
· 畫家
· 音樂家

好似好充滿藝術氣息喎。

考完試啦

我終於都考晒試啦。雖然份份卷都識唔晒，但都ok啦。我估唔會唔合格呱。

我一考完試就梗係要去玩啦，我閉咗關成個月，悶到悶死我。我嘅節目已經排到16號啦，係咪勁呢。

我尋日先同同事去咗唱k同打邊爐。
但我尋日嘅經驗就唔係好掂。
咁我哋約咗三點喺neway city等，但我點半己經學完琴，係又熱又多人嘅旺角度行咗一陣，我己經溶咗一半啦，所以跟住去咗行街，本來無諗住要買d咩架，只係想涼吓冷氣啫，點知行吓行吓，又行咗去睇衫，睇睇吓又去咗試衫，試試吓仲買埋添，我諗梗係曬傻咗啦。好彩，我都只係買咗一件咁大把啫，再行落去，我諗我都要去搵"卡數豪還團"。

唔行街，見淨返三個字，咁就去咗neway city度等囉。我班同事相當守時呀，去到我係第一個埋舟嘅人。唔緊要啦等三個字啫，但我眼見有好多人攞房喎，五個人佢都比大房，咁我驚佢會無房，一時情急就拎咗房先嘞。我上到去，又唔覺意同個帶房哥哥仔玩咗一陣，咁我就開始打比d同事，但個個都on the way，唔係太子就係灣仔，全部都係地鐵度，有排都無到呀。咁咪自己唱住先囉，對我呢個"卡拉ok小霸王"嚟講，一個人唱k完全無難度呀。

唱咗兩首之後，同事們魚貫進場，好快就齊晒人嘞。大家都係唱得之人，我嘅"小霸王"地位，有d動搖添。anyway，有咁多人陪我唱，都好過一個人拎住支咪係咁唱嘅。

唱完去食嘢，去咗一間叫做"花園金閣"，其實無咩特別，勝在任飲任食，可以滿足吓大家瘋狂勁食嘅慾望。不過，我就唔係食咗好多嘢，無其他男同事咁"胃"大啦。其實果度都好多嘢揀架，只係我太揀飲擇食，所以我就唔係咁多嘢食咋。但我覺得ok嘅。

果日最失常嘅一件事就係，我竟然無食到麻辣湯底，我食咗個皮蛋湯底呀，係咪勁出奇呢?我都唔知點解呀，只係覺得我果晚再食埋辣嘅話，一定會死於喉嚨痛，為咗唔想英年早逝，我捨辣求清。但結果都係難逃暗瘡嘅蹂躪。唉……