又新年…

等左好耐既農曆新年假期，咁快又過淨一日。
好唔想返工呀，可唔可以再比我放多幾日呀?
原先plan左呢個假會好乖咁做下project，點知都係無做過。
唔…我真係太懶啦。
仲有呀，而家先逗得千零蚊利是咋，幾時先有二千蚊呢。唉。

話說…

話說我有一個貴為人父既friend呢。話我好唔update個blog，搞到佢得閒時候無野好做。
好啦，咁我就一次過update返晒d野啦~

星期六，放學小鵬黎接我放工，一齊食完lunch，我就過黎金鐘上堂。小鵬就返左屋企。到七點再過黎接我放學。有佢咁樣肯走黎走去接我，我都幾開心架。將心比已，可能我就做唔到啦。我實會叫佢上我屋企到夠鐘先送佢返學。所以相比我自己黎講，小鵬係一個唔懶既男朋友啦。
放學果陣，佢已經係樓下等我。抵錫架。但係之後我地又無地方去，所以又打左比亞瑩，點知佢今日唔得閒陪我地呀~佢要去做節呀。咁只好我地兩口子，自己搵節目啦。去左銅鑼灣食飯。嘩，多人到嚇死你，等左好耐先有得食。你話有個屋企幾好呢，起碼叫完外賣仲可以一邊睇電視，一邊等丫。

星期日為左迎接新年，我做左件好應節既事，就係剪頭髮。我呢世人最怕就係剪頭髮，次次坐親就七八個鐘。坐到腰都直埋，頸都梗埋。真係好辛苦。又無左一日，仲要比錢人，自己又辛苦。不過剪完個頭又真係輕左好多，鬼咩，我諗佢剪左我一半頭髮走丫，個頭唔輕就奇啦。

星期一，好似無咩發生喎。係同個fd講過下電話咁大把囉。

星期二，今朝早收到PM個email話confirm左我地d contract extension。轉個頭十點幾個agent就打黎叫我簽contract勒。佢話佢下晝send人送過黎比我簽，我話下晝我要開會喎。咁佢即刻話我而家即刻搵人送過黎你而家簽啦。嘩，洗唔洗咁趕呀﹗我都無話唔簽。跟住我同佢講，話我聽日放工過去簽。但我lunch聽返d同事講，有d人都唔係好想再續約。咁我都唔急啦。諗諗下，不如叫佢加我人工啦，$660/day => $700/day都唔係好過份啫。天文台都比$851/day佢啦。
同左大學班同學去左海港城間雪園度食團年。我覺得有d貴啦。我又唔係食得多，食到一半都飽左咯。咪睇佢地食囉。臨尾食埋個迷你高力豆沙，真係滯左。如果唔係小鵬都話個高力豆沙好食，我諗我都係唔食多。食飯果陣，同亞fred講開，話考java cert d野，佢叫我去考1.5喎。不過真係好深喎，佢都話深，我點會識呀。但佢又話1.6都就出啦，就咪鬼再考1.4啦，咪盞遲d要upgrade，晒錢呀。咁都有道理既。
食完飯大家坐係度傾計，carrie話而家d人無以前咁尊敬老師。梗係啦，以前係尖子教育，係勁人先可以讀書，所以教書既都係勁人。而家普及教育，係人都有書讀。自然教師需求多左，無咁勁(甚至，唔勁既人)都可以去教書。咁教師仲點會比人尊重丫。唔好話教師啦，以前大學生都比人尊重架，而家d大學生行出黎咪又係咁。係d人既水準下降嘛。要普及一樣黟就難免令佢既水準降低，唔降低點普及呀。成日都話人地鬧老師，大佬呀，你班老師連個基準試都未考好，家長點放心比d仔女你教呀。仲有呀，唔好咁一廂情願覺得名校就一定無曳學生咁幼稚啦。名校係虛名黎架咋，咪等d學校收貴d 學費，d學校課程深一級囉，課外活動多一倍囉。一樣米都養百樣人啦，一間名校都可以教百樣學生架啫。教到叻既乖既學生有幾勁啫，教好一班先至係勁丫嘛。我自問讀果間中學都算名校，又如何，唔係話佢唔好，但入面真係有各種各樣唔同既人嘛。咋既學校可以出叻人，名校都可以有曳人架啫。都唔知你係天真定糼稚。
跟住，山雞又講起"究竟到底自己想做d乜，對未來十年有咩目標"。我都唔知呀，結婚生仔都唔係我可以掌握到既野。我仲可以有咩十年目標呀。半年都未plan好呀。不過，佢都提出得幾好既。起碼令到我真係會去諗，我黎緊有d咩想做，同有幾多真係fulfill到囉。

聽到好開心，諗落又唔係好開心

今日彭sir(即係hko既人啦)同我地幾個T-contract既人講，話會續到我地七月尾。七月尾之後，會將T-contract轉 N-contract。T-contract => through agent, N-contract => HKO contract staff.仲話因為hko而家除左programmer之外就無其他既post for it staff，所以佢地申請開多一個職級，暫定"senior programmer"。如果係請N-contract既話，會以呢個新職級去請。起薪點會係programmer再高十點。(但我都唔係太清楚即係幾多，只係知一路做落去，最高會去到三萬蚊一個月。)但佢話首要條件係大家做得好。初頭一路聽都幾開心，但一聽到"做得好..."。就覺得搵我笨咩，"做得好"邊個去define呀?點為之"好"呀?做咩準則同機制去衡量呀?所以，已經冷左一截。再諗下，我agent果邊好煩架喎，佢會唔會放過我呀?咁就死得啦。cool down 晒lu。

女人的故事

尋晚聽"她他她打到黎"，鄒凱光講左個等待既故事，佢想勉勵d青少年人唔會因為感情上少少既錯折就放棄生命。個故事係咁：
係94年果年既世界杯，有一班朋友約出黎一齊睇波，當中有男，亦都有女。而男生當中一個叫peter的，已經偷偷地暗戀左圍內既...may(我唔記得個女仔名啦，當係先啦。)好耐。本來諗住係呢個時候可以同may表白，正當佢想表白之際，另一個男生johnny就同may講:"睇睇下你都幾靚喎，唔知我試下追你追唔追到呢。"跟住就轉個頭對住成班friend講:"我而家追may啦，你地有冇人唔喜歡呀?"peter知道johnny咁樣講，一定好鍾意may先會係咁大班人面前表白，而佢亦都唔好意思係呢個時候同人爭。最後，佢都無向may表白到，只係默默咁祝福佢地。
過左一排，peter知道johnny同may拍拖啦，都好戥佢地開心。大家一別就四年啦。四年後98年既世界杯，大家又再相約出黎睇波。呢四年裡面peter仍然對may有感覺，呢次重聚，peter知道左johnny同may已經結左婚，仲生活得好開心。
比著好多人都會覺得個故事都係時候完啦。
誰不知，再過多四年的02，再一次世界杯，一班朋友再相約睇波。剛過去呢四年，johnny同may已經育有三名小孩子。可惜，亦係呢個時候，佢地既婚姻出現左問題，仲係一個好嚴重既問題。韓國隊踢四強既當晚，全城情緒高漲。與此同時，peter亦都係呢個時候向may表白，自己對may既感情，八年黎都無改變過。當晚，may聽到後嚎啕大哭，peter唔知係咪自己講錯左d咩。但當晚大家都無再表明乜野就走左。
peter又再過左兩個忙碌既年頭，剛從大陸回港，知道may係過去果兩年已經辦好晒離婚。原來，當初may已經對peter有意﹐只係一直等peter開口。可惜，天意弄人，peter一直唔敢開口。may見peter一直無動於衷，怕只係自己一廂情願的等，所以只好跟johnny一起。

可能有人覺得既然may係鍾意peter，點解要接受johnny。問得出呢個問題既，應該係一個男人，或者係一位青春少艾。乜你唔知女人既青春係會折舊架咩。男人廿幾三十歲先開始踏入播種期，但係女人廿幾歲，已經係成熟期啦；女人一到三十打後就已經要埋齋收成啦，到時發現感情上一無所有，搵鬼可憐你呀。我記得小鵬講過，男人無論幾多歲，都係留意d十八廿二既女人，比到盡三十。而女人搵既就係比自己大既男人，廿歲搵三十；三十搵四十；四十搵五十；五十就搵....仲搵，開老人院咩?!而後生女仔年年有，成熟男人又係咪有咁多得比女人揀丫。所以，我唔覺得may唔岩架。佢都只係用佢既青春去買個保險者，況且，佢同johnny一齊果陣may真係真心真意去同johnny一齊丫。

其實，亞花，你知唔知我真係好擔心你架。
但鍾意一個人八年都唔係好耐者，我都試過啦。不過我而家搵到個更好架啦。

"好痛。" 與 "痛死人啦﹗"

尋晚去左做facial。做facial簡直就係我最開心既事，因為有人幫我按摩﹑整靚靚塊面，同我有得訓餐死。但尋晚就唔係咁開心啦。因為我個身生左一粒好似瘡，但又唔係瘡既野，好耐架啦。個美容師話係d毒瘡生唔出，而家實左，佢幫我"gee"佢。果舊野都幾大舊架，初頭都無咩事，唔係太痛。不過搞左好耐，因為佢想一次過幫我清左佢，所以佢臨尾好鬼用力。事關搞左咁耐粒野周圍d肌肉都傷傷地，所以搞到我越黎越痛。最後都係要叫停佢，我都明佢一番好意，唔想我下次黎再痛過，但今次痛死左我，下次我咪黎唔到囉，咁咪又係大家既損失。我返到屋企成舊肉都腫晒啦，郁下都痛，唉﹗

仲有一樣痛，今朝起身已經覺得個下腹好痛，梗係"女人最痛"又黎探我啦。但痛極都要返工架。返到黎公司真係已經痛到標晒冷汗，周圍問人有冇panadol都搵唔到，唉，無計啦，唯有係公司度"典"啦，簡直…"活像受罪，但是又離不開"。

我唔想…

前日send左封email比舊老細，因為我仲未攞封reference letter而我又準備再搵野做，趁而家市道算唔錯，搵份安定d既工，所以同佢講想攞返d書同封reference letter。
講返轉頭，send 完email比佢，知佢每晚睇市時都會順手覆埋email，諗住尋日朝應該會覆左我啦。點知佢無喎，唔係避我丫。諗住等多兩日唔覆我就打比佢。好彩，我放工既時候佢都有打比我。佢問我做咩攞返d書喎，(大佬，攞書係前盤，攞reference letter先係主菜呀，主客不分。)anyway，咁我都要求其搵個藉口敷衍左佢先，點知佢吹脹到話書你幾時攞都得架啦，但封reference letter就要一陣先喎，玩野咩。接住佢又問我得唔得閒返去做part-time，唔係唔想做part-time，只係唔想再打佢工者，佢有幾煩，我都唔係未領教過。所以我咪同佢講，我而家要返學喎，遲d睇下可唔可以arrange到d時間先覆佢囉。我都唔明佢，咁鬼有錢做咩唔請個人幫佢maintain個website者。

跟住，我一個人去左十大書坊度睇漫畫等小鵬放工過黎旺角，我睇書真係好慢，我一個鐘先睇得果一本，仲要係隻眼唔離開本書咁睇先睇得一本，真係蝕比佢呀。

佢話約左carrie係雅蘭度等，我去到見到佢，佢同我講等緊carrie同amanda。咁我問佢點解會多左amanda架，佢之前同我講果陣無話amanda會黎架喎，會唔會我唔黎，會再多一個我唔識既女仔架。佢見我笑笑口咁問就懶得戚咁答"唔知呢。" 咁你又知唔知我係講真架呢。笑笑口!=(!認真)。

不過，我真係好無心機聽carrie講野，唔知係我太唔理身邊既人同事，定係我同佢真係完全唔岩channel，佢講既咩教改呀，三三四呀，母語教學呀，仲有佢舊學校個社工，etc，我都好無心機聽。我咁鍾意包拗頸，都唔想同佢拗同因為佢係對人唔對事，所以咁唔理性既野，我唔想同佢嘈。

食完，傾完，走果陣都十點啦。我返到屋企上網搵左幾份工，send 埋application letter就訓啦。

一講就火都黎﹗

尋晚放左工，趁返學前仲有時間過左去太古城搵小鵬，接佢放工。佢就梗係捉住我，要我食左野先返學啦。雖然係有覺得佢專制，但個心係好甜架喎。坐係老麥度同佢傾左一陣計，話比佢聽我尋晚唔開心。佢問我有咩唔開心，咁我咪一五一十講晒佢聽囉。亞爸既事當然我同佢都解決唔到啦，因為個當事人都無過要去解決。至於我搵工既事，佢就同我講係人都想搵份好工架啦，搵到份長既咪走囉。咁即係話，而家我身邊所有既人都覺得轉工唔係無信譽，只係唯世所迫者。咁搵到就轉啦。

放學返到屋企，食完飯臨訓前又同亞爸吵左鑊，佢都唔知用邊度黎諗野架，成日都覺得自己為個屋企付出左好多。成日話自己點様辛苦，又話有拎錢返黎，但佢又唔記得自己拎五千蚊返黎，問我地拎返七千幾八千蚊啦。又話我地唔關心佢，我地好關心佢，叫佢唔好上大陸幫人做擔保，佢又要上去，搞到自己份工都無埋。問完銀行借錢又要我地幫佢還，問佢d錢借黎做乜者，又唔肯講。你要我幫你還，都要我還得心甘命抵架，理由都無個，你估你有寶呀。我讀到大學year two，都仲問我讀緊中幾。成日講自己搵好多錢，亞爺過身，咪又係亞媽拎成皮野出黎葬亞爺。話左唔好拎亞爺個神位返黎，亞爺又唔鍾意佢，又唔鍾意亞媽，又唔鍾意我，日日對住我地，咪盞佢死都激返生。又要懶孝義，頂﹗最後咪又係唔記得亞爺亞嫲既死忌，擺個神枱係度阻住晒，佢自己就支香都未裝過。同我講咁多野都係多餘，講到自己幾仁義﹑幾辛勞﹑幾為屋企著想，全部都係假架。又煙﹑又酒﹑又去滾就真。講到最後咪又係唔夠我講，死返入房訓。要我尊重佢，佢都唔識尊重自己尊重其他人，我對隻貓好，對隻狗好呀，佢都識同我搖尾啦，佢算係咩呀。一講就火都黎。
唔講啦﹗

痴左線…

尋晚我真係痴左線呀。
話說我尋晚本來都好眼訓，但訓到落床又訓唔著。
跟住就開始亂諗野勒，仲喊到枕頭濕晒先訓得著。
開始諗下屋企既野啦，我老豆又坐係屋企啦，都坐左成兩個星期。睇死佢又係佢扭屎忽花，所以人地唔比野佢做啦。佢就係咁乞人憎，成日都以為自己有寶，全世界既人都唔可以無左佢。佢都傻傻地架，幼稚到不堪。仲要識埋d唔知咩豬朋狗友，飲飲食食就天下無敵，有事搵佢就個個仆直，成班都係賤人，我老豆仲要當佢地係寶。佢一d都無責任感﹑無承擔﹐嚴格黎講，我覺得佢都不似一個男人，起碼我睇唔起佢先啦。佢真係令人好失望同心傷。見到佢真係火都黎。

跟住又諗下自己黎緊呢一年會點﹑想做d乜，點知乜都諗唔到。唔係我乜都唔想做。係我覺得自己咩都做唔到。成日都唔知可以做乜，又唔鍾意搵工(我唔係唔鍾意做野，我只係唔鍾意搵工者)。而家份contract可能到七月就完，搵工對我黎講實在太辛苦啦。我都唔明點解要contract base架。比我知道邊個設計埋晒d咁既制度，一定要將佢……但我有個同事今日send左兩個email比我，都係關於d新工。跟住我又去睇返career times，真係有好多工喎(請唔請我另一回事)。我又真係無理由係度等HKO個PROJECT 完架者。同埋同事講左幾句我都覺得好岩，都係試下之嘛，APPLY唔鍾意咪唔IN囉，IN完請你唔鍾意咪唔做囉。仲有時機點知幾時有喎，HKO又唔同我簽左死約，走咪走囉。我最唔安落都係我答應左我PM會做到七月，但係轉下頭又去搵工，準備走人，好似好無口齒者。

What is your true color?

今日收到個freind既email，小小既心理測驗啦。
我個result as follow:

My true color is Red!
Your color is red, the color of racy sportscars, blushing cheeks, and luscious roses. Red symbolizes passion, romance, and love. So, since you're ruled by red, you probably trust your feelings more than your brain and tend to act spontaneously. If you see something you want, you go for it without thinking twice — impulsive is your middle name. You don't wait around for people to make decisions, either; you dive right in. Quite the romantic, you pay close attention to your emotions. In fact, if your heart isn't in what you're doing, you won't be satisfied. Of course, even when you do pour all your energy into the projects you tackle, your impetuous nature means your passions can shift as frequently as the wind. That's why some reds have trouble with commitment. Our advice? Next time you're feeling fickle, think before you act, if possible. You might be surprised at the results. Overall, though, it's great to be red. No one lives life more completely than you do.

都幾準丫。 :p

應有此報

"應有此報"係話緊我自己呀。
話說我自從聖誕節果個星期開始一路喪玩到岩岩過左個星期六。
事發經過係咁架。
聖誕節期間: 我連繼玩左四日，通足四日頂。
接住到新年既週末: 我又玩左兩﹑三晚，又通左一﹑兩晚頂。
對上個禮拜: 再去左小鵬朋友屋企玩大富翁，玩到零辰四﹑五點。
我已經連續三個禮拜六係小鵬果個friend 屋企度nur通頂。諗返都覺得自己變態。
好啦，抵死勒，終於都玩到病左勒。
哎，都話係"應有此報"架啦。

無形既壓力

今日Calvin(即係我個PM)，佢話我果team既SA今朝已經遞左辭職信。換句話講，我果TEAM一個月之後就無亞頭勒。但我份contract仲要到三月尾。原先Calvin都話我地個個三月尾end 果班可以extend到九月尾，甚至年尾添。不過而家睇黎就難d啦。連大佬都走埋，仲有邊個可以執到手尾呢。唉，都唔知係咪黑仔。原來諗住係呢度做又安定，又放得早，可以讀下書，考埋d cert先走，而家睇黎都幾難。仲要準備搵工呀﹐呢樣先係最唔想嘛。