EQ低

Sometimes I find that my EQ is too low. I have checked all the blog from my friends. If the text is too long, I won't go through it. If the text is too short, I won't go through too since I suppose it is meaningless. Until I read this blog with the title "How to make a boy tear who is never cry." I read it 10 days late. I should say I knew nothing about this. So, I haven't done anything to solve it. I apologize for him. I was too angry when I said that word to hurt him. I have not thought about him, I know that is my fault. I think it is because I am too lazy to take care people. Now, I don't know what to do. Hope it doesn't make him feel too bad.

復活節假期(三)

四月十六日，之前果晚玩通宵同谷鬼氣後，今日就梗係喪訓啦。訓到三點起身。食完野就出左去尖咀度睇漫畫，等亞妹一齊食完飯去睇"男人之虎"。但我竟然搞錯左香港藝術中心同香港文化中心，搞到遲左九個字先入場，仲要趕餐死添。好彩亞妹同小鵬無怪我啫。亞妹同我講，以我既性格搞錯晒d野真係唔出奇，都唔嬲得我咁多，同埋自己人又點會嬲丫，明知我都唔想架啦。真係唔聲唔聲，知我者莫若對左我廿幾年既細妹。
講返"男人之虎"，大家可能覺得入去睇都係為左睇詹瑞文搞笑，包括我。成齣都係講"查找不足"，但佢臨尾講到，"不足"可以係先天造成，亦都可以係環境造成，我地要去面對佢，克服佢。呢段真係唔知有幾多人會聽得入耳呢，我最希望都係我個一直怨氣極重細妹聽得到呢段。
仲有，我地尋晚睇果場咁啱就係第九十場，亦都係"男人之虎"公演一周年。雖然無咩慶祝既環節，但總算見証左某些人的重要一刻，值得高興。

復活節假期(二)

四月十五日，好似之前咁講，今朝早又去左打乒乓波。今朝仲book左三個鐘添，但一起身已經覺得周身腰酸骨痛啦，但book左場就點都要去架，所以都要硬住頭皮去打，至多唔咁劇烈啫。去到都係一輪開波接波﹑左推右攻﹑打高波﹑今日亞妹要我打位添，算啦，梗係要聽教練話架啦。可惜今日前臂真係有d痛，所以都唔係打得好好。打到八點幾，孖仔表弟先到。所以又開始同佢地練波勒。不過佢地實在太唔在意，搞到亞妹好無癮，咁我唯有要佢地打得唔好就要做掌上壓，點知佢地原來係唔識做掌上壓﹑拼步同鴨仔跳架。所以，今日就學埋佢地做體能勒。
打完三個鐘波，又去亞姨度練琴勒。今日d歌都彈唔錯，都幾好，只係仲未練到指法啫。打到咁上下亞瑩就打黎話開枱，見彈到咁上下，所以就搭巴士過深水埗接埋小鵬過亞瑩度勒。過去打牌講開小鵬要咩生日禮物，因為佢地之前定左，一人可以要求一份禮物，大家每人只會夾$50，如果份禮物貴過夾出黎既錢，咁生日果個就自己補貼啦。而生日會既搞手同買禮物果個人就係對上生日果個。所以小鵬生日會既搞手就係april勒。
講返小鵬份禮物，小鵬原先想要兩隻psp game，但係april話唔得，因為只可以買一份禮物。我唔明佢道理係邊，點解兩隻game係兩份禮物，我覺得完全唔make sense，同九唔搭八。我唔係想話佢蝦小鵬，咁既然大家都係夾$50，一隻game都只係值$295，十一﹑二個人夾買兩隻個問題係邊，唔夠既錢都係小鵬出架啦。都唔明係為買禮物而買禮物定係為慶祝生日而買禮物，本末倒置。我唔係話個買禮物個原意有問題，但如果要咁執著買兩隻game係兩份禮物既話，今次佢地人人都係夾得十幾蚊，咁次次都要小鵬夾$50蚊去送禮物咁又公平，同有原則咩。我只係覺得唔公平。如果要限咁多野既，不如一人拎$50買禮物，$20買蛋糕，$100食餐飯，唔好多唔好少囉。如果係咁，咪鬼慶祝啦，大家可以慳d啦。結果，april又自己拎錢出黎買左個籃球比小鵬。都唔知為乜，低能，要有原則就連籃球都唔好買，咁而家又咪係兩份禮物，為咩要自己拎錢出黎買啫，做壞規矩，不知所謂，都唔知用咩諗野架。
仲有呀，生日果個要拎住個蛋糕去同其他人逐個影相，比我就唔影啦。你可以話我大牌，但話晒都係我生日丫，大牌果一日都唔得咪唔好同我慶祝囉。因為你地黎同我慶祝，而我要去逐個同你地影相，真係唔知邊個大牌囉。初頭小鵬都話要佢行埋去就唔好影，我果陣真係覺得果句好得。跟住april話佢生日都係咁逐個行去影啦，對我黎講"so what"，我又唔係你，你戇居啫。點知小鵬真係逐個行埋去同佢地影，我心諗"頂，乜你咁cheap架。""頂"呢個字我就梗係無講啦，cheap呢句我又真係忍唔住衝口而出囉。感覺上，心口又比人踩左腳。點菜又無份，食野又無份，影相都要我行埋去同佢地影既，sorry我唔想影囉。你要影，你影飽佢。我"慶"過火屎呀。
食完飯又話要打籃球﹑又話要碌齡，都唔知邊個生日，小鵬又順佢地意去，哎…去啦去啦，佢地同小鵬去碌齡都係想唔洗比錢啫。個感覺完全係食飯搵笨團囉。唔洗佢講都知佢地係最低分果兩個比錢啦，哎…打打打，三十蚊局我又唔係比唔起，今朝練完波又練完琴，當我讓你半臂，咪睇下你贏我幾多分咁巴閉。點知有d人又咁唔好彩，碌齡都輸添，我都話左生日大晒架啦，一早話請咪好囉，拎黎瘀。碌完齡仲上左去亞瑩度打牌，哈，小鵬同我一家贏三家添。真係……哈哈哈。

復活節假期(一)

四月十四日，等左兩個半月終於有長假期可以放假啦。我決定呢假期要為黎緊既乒乓波比賽好好練習一下，所以今朝一早七點鐘就同亞妹去室內運動場打波。唔知係人老左，定太耐無打過波，打左兩個鐘就好攰啦(中間仲有兩個孖仔表弟間下場)。但都算打得唔錯，亞妹紏正左我一d手勢既錯誤，仲有一d步法咁。練下開波，練下接發球，練下左推右攻，練下打高波……等等。打完兩個鐘覺得有d意猶未盡，所以返屋企再book場聽日打過。
打完乒乓波，沖完涼就過亞姨度練琴，難得亞姨返左加拿大，而我又有假放就梗係要練下琴啦。一個人練左兩個鐘琴，練左三首歌，新學既"can can dance"甩甩漏漏咁，但都總算彈到，但學左兩個禮拜果首"this old man"就彈極隻左手都唔係好聽話，我諗都係要再練多d。練完琴就搵下表妹有無華姐叫我買既指法書，但搵極都搵唔到，我諗表妹都係無架啦。算吧啦。
今日下晝就約左孖仔表弟睇"Ice age 2"，但佢地1:30-3:30要係黃大仙度學畫畫，所以我地睇5:40。我練完琴出左去同小鵬食飯，食完飯就係太古度行左兩個幾三個鐘等表弟，順便搵下小鵬想買果件風褸，但始終都搵唔到。所以都係周圍行下啦。打左成朝波，又行左兩個鐘，開始有d攰，正想搵地方坐下，舅父就話佢帶緊表弟返過海，十分鐘內到，所以我同小鵬又到地鐵站等佢地勒。表弟黎到仲大鑊，佢兩兄弟話要去"toys R us"度睇玩具，無計啦，橫掂又未夠鐘咪去囉。點知佢兩個淨係企係度睇超人電視卡通。痴線架。睇到夠鐘就同佢地上去戲院，明知佢地會嘈，都有d驚佢地嘈住人，所以一早吩咐佢地唔可以嘈唔係我就打鑊佢地，亞B知我唔好惹，都好乖無咩點嘈，只係孖細有時忍唔住大叫左出黎。但後尾佢都掩住個口無再大聲嘈。有時都覺得佢地兩個幾慘，佢地一開心興奮就會不自覺大聲叫同周圍跳，佢地都唔想。但周圍既人係唔會知道佢地唔係有心想騷擾其他人，只會覺得佢地好似痴線咁。我地唯有就係教佢地盡量控制自己。睇到一半，條大魚突然出現，嚇到坐我隔離既亞B摟住我手臂話好驚，始終都係小朋友嘛。
睇完問打比舅父叫佢落地鐵站接仔，點知佢話由佢地自己返屋企啦。咁又係都十歲人仔咯，我果陣都自己呢度去果度去啦。所以帶左佢地落月台，上左車，吩咐左佢地要行天橋唔可以行馬路就比佢地自己返屋企勒。咁我就同小鵬落中環搵媽咪食晚飯。原來都無諗住食咩，行過見到和民就行左去食和民勒。食完就返屋企，十點鐘就訓左啦。

騎呢天文台

天文台真係一個幾騎呢既地方，可能因為係政府部門。所有人做野都好懶懶閒，唯一會著緊既就係打乒乓波，你無睇左，係打乒乓波呀。天文台仲有一年一度既乒乓波比賽添。我都唔知我係好彩定係唔好彩，榮幸定運吉咁比人捉左我去參加。棠哥話我地F team無咩女仔，話見我打得兩板預埋我，當係玩下喎。我又無咩所謂呀，橫掂我又真係當玩既，咁咪一齊玩囉。但果日本來係St. Mark's Day，suppose要去polyu個standium參加個慶祝活動。但睇黎要比賽既話，都唔會趕得切，況且我都唔想趕餐死，辛苦自己。所以決定唔去。 =p

小鵬就黎生日啦，我都未諗到送咩比佢。佢都無咩係好想要既，真係要買既又真係好貴，佢唔准我買比佢。咁我好難做架喎。等我再諗下送咩比佢先。小鵬d 中學同學話同佢慶祝，係奧海城食飯打保齡。上次同佢地去潮樓食飯，講開同小鵬去邊度慶祝。April話去打保齡喎，好似上次咁打輸果個比錢。我又唔係好鍾意同佢地打保齡啦。佢地輸賭既，輸左要比晒果局既錢，上次打到百二十幾分定百三十幾分都係最低分果個呀。我唔鍾意咁樣，佢地成日打喎，我同小鵬又唔係成日打，分明就係搵我笨啫。咁又話同小鵬慶祝生日既，咁打法不如直接請你打好過啦，感覺上似我負出左d，都要係你身上返d野既感覺，咁不如唔好慶祝勒。不過我知小鵬佢唔係咁諗，佢覺得都係玩下啫，又唔係貴，咁唔鍾意既可以我唔玩啫。但如果唔玩既一班人出黎又有咩意思啫。一係索性我唔好去，無眼屎乾淨盲。其實，我唔係在意d錢，我只係覺得有比人蝦既感覺，我無啦啦做咩要比個心口人踩啫。

星期六去原本諗住睇"至尊無賴"，臨買飛果陣，亞瑩就打黎話開枱勒。嘩，有枱開我仲唔眼前一亮，手頭有咩都放低晒呀。睇戲，遲d先啦，又無咁快落畫既。但好奇怪，明明之前打過比亞瑩兩公婆話返無良亞媽度食飯，但而家又打牌既，我唔理啦，去唔去佢奶奶度食飯又唔到我理既。總之，我而家有得玩啦。原來亞瑩佢唔舒服去唔到佢奶奶度食飯。嘩，我係亞瑩屋企所見既，真係一個奇境呀。亞瑩條友簡直就係一個真人嘔吐機，話嘔就嘔，嘔成四五次都仲有得嘔(話說我未上去之前佢已經嘔緊)。咁就咪打牌啦，睇到佢咁嘔法，我都覺得辛苦，打牌都打得唔安落。

我果d…小野啦

我呢排有d煩，但煩極都係煩下"點樣可以寫得個program generic d?"﹑"點解小鵬今日唔笑既?"﹑"d琴練極都唔熟，成日都彈錯"。我唔係話呢d係小事，for me, they are absolutely serious. 但話到底，都係一d好容易解決既事。program: 係我經驗不足，問下人，吸收下經驗啦。小鵬:我都係時候做返d女朋友要做既野，氹下佢啦。琴:according to 華姐，慢慢練，練多d就無問題。

但呢幾日睇到兩個friend既blog，我真係覺得自己真係無事搵事黎煩，庸人自擾。我睇左一個friend既blog，知道佢去驗眼發現視網膜穿左個窿要做手術。知道之後真係好驚訝，不知所措同唔開心。雖然有事既唔係我，同埋佢係個blog度都講好在發現得早，做手術就ok。但我都係覺得自己唔夠關心身邊既朋友，有d內疚。希望佢快d好返。你需要既話可以搵我架，我無野叻，但你要人陪你傾同講，我好樂意架。

仲有一個friend個blog話佢個女又問左佢一d，佢都唔知點答既問題。我想係度發表少少我既意見。Alison真係一個天真無邪可愛既小朋友。我絶對相信係因為你既父蔭，令到佢可以係一個(心靈上)受保護既環境下成長。其實，我諗亞囡問你既問題，佢都會同樣問佢媽咪。我唔係要推卸責任，只係覺得你地雙方都有責任同亞囡講出個事實。唔係搵一個聽起黎好好聽既答案，又或者轉移亞囡既視線，等佢仲有個憧憬爹地同媽咪係會有機會係返埋一齊，(可以既當然係最好)。如果真係唔可以再一齊既話，你今日做既野就係瞞騙緊個小朋友，日後亞囡知道個事實會仲hurt。我覺得你一家三口有必然坐埋一齊，你兩公婆要將個事實講比亞囡聽，爹地同媽咪因為某d原因唔可以一齊生活，但你地兩個仍然係咁愛佢。亞囡第一次聽可能會好唔開心，但佢都有權知道自己既處境。可能而家既分開係將來團圓既序幕，又或者將來你再搵到另一個可以照顧你同亞囡既人既時候，或者佢媽咪再搵到一個付託終生既人既時候，亞囡會易接受。大家都係想係一個唔傷害囡囡既情況下，比囡囡知道，爹地同媽咪曾經嘗試過係埋一齊，但唔成功而需要分開，就好似囡囡都會試過有一樣野佢好想試，但最後發現自己都係唔太喜歡呢樣野。鍾意同唔鍾意係無人可以勉強，亦都無人可以保証呢一世都唔會再愛上。事實係at this moment, it doesn't work。唔好太睇小朋友既感覺，你講大話，又或者你有野瞞住佢，佢係會知架。你覺得佢天真無邪，唔忍心將大人複雜既事話佢聽，怕佢受到傷害，其實佢係感覺到架。如果你地兩個仲係愛錫佢既，佢係會明白了解架。小朋友都講道理，相信你個女啦。但至於你果方面，我就無能唯力，no more hard feeling 啦, mate。