復活節假期(三)

四月十六日，之前果晚玩通宵同谷鬼氣後，今日就梗係喪訓啦。訓到三點起身。食完野就出左去尖咀度睇漫畫，等亞妹一齊食完飯去睇"男人之虎"。但我竟然搞錯左香港藝術中心同香港文化中心，搞到遲左九個字先入場，仲要趕餐死添。好彩亞妹同小鵬無怪我啫。亞妹同我講，以我既性格搞錯晒d野真係唔出奇，都唔嬲得我咁多，同埋自己人又點會嬲丫，明知我都唔想架啦。真係唔聲唔聲，知我者莫若對左我廿幾年既細妹。
講返"男人之虎"，大家可能覺得入去睇都係為左睇詹瑞文搞笑，包括我。成齣都係講"查找不足"，但佢臨尾講到，"不足"可以係先天造成，亦都可以係環境造成，我地要去面對佢，克服佢。呢段真係唔知有幾多人會聽得入耳呢，我最希望都係我個一直怨氣極重細妹聽得到呢段。
仲有，我地尋晚睇果場咁啱就係第九十場，亦都係"男人之虎"公演一周年。雖然無咩慶祝既環節，但總算見証左某些人的重要一刻，值得高興。