係對你，定係我無信心呀?

今日晏晝收到Honey嘅sweet sms，好開心。亦都覺得好出奇，因為佢真係好少會係做緊嘢嘅時候send sms比我，除非有緊要事。今日佢send比我並唔係d咩緊要事，真係淨粹一個sweet message。

我係好開心，但亦都有d不安。呢個時間send message比我，係咪有咩事發生咗。通常我講得有咩事，我都唔會係諗緊d咩好事，因為我份人疑心重。呢份不安一直延續到我放工，仍然持續。一直到七點三，我一直等緊電話，Honey應該喺時候打比我，如果佢放咗工嘅話。香港人雖然係忙，但唔會忙到唔記得放工。況且，Honey係一個有節制嘅人，佢知幾時要做d乜。所以，我一直等，等到我無可等嘅地步，我打咗比佢。佢已經放咗工，已然返到屋企附近。聽到個心安落咗一半，但亦有一半唔開心。係呀，就係因為佢放咗工都唔打比我咁簡單，佢仲要同佢同事一起。你可能話我無理取鬧，但我可以話你聽，如果呢個世界嘅男朋友唔係要嚟比安全感我嘅，我係可以無男朋友。好似講得有d過份，但呢個係做我男朋友嘅基本要求。

不過我無嬲佢，我只係覺得我個心唔係好舒服啫。我唔知係我嘅不安全感太大，定係我以往嘅經歷令到我逢事都太上心，我好敏感，亦都過份敏感，尤其係不忠。我唔係話我Honey對我不忠，只係我唔希望呢件事再發生喺我身上。一個人對你做一d嘢hurt到你嘅事，係果個人有問題；但多過一個人對你做同樣hurt你嘅事，呢個就係你嘅問題。我雖然好自我中心，但我都識得自我檢討。但就係唔知幾時先應該講"唔好!"