將來嘅人類世界

今日lunch食完飯，坐係度忽發奇想，諗夠竟五十年﹑一百年﹑二百年後，甚至一個世紀後嘅人類世界同而家有咩分別呢?

我諗到，首先，呢個世界上將會無晒"錢"呢個工具。我覺得將來嘅人只會拎住張咭出街，要買嘢就碌咭，或者喺屋企上網訂購。跟本就唔洗用錢呢樣嘢。換言之，大家都會再擴範咁玩呢個數字遊戲，賺到錢嘅時候，呢個數字就變大，買咗嘢嘅時候，呢個數字就會變少，換咗一d你要嘅嘢返嚟。所以，將來嘅日子係唔會有"錢"呢樣嘢。

其次，交通工具都會漸漸息微，包括飛機。人已經漸漸唔再需要出門口，因為網上嘅世界太方便，返工同買嘢都唔需要出街。所以無交通工具嘅需要。我記得之前喺大學YEAR ONE都discuss過呢個問題，我當時話e-com係唔可以做晒所有嘅嘢，果陣嘅例子係我哋唔可以e-haircut。但我今日發現唔係，唔係嘅意思唔係可以e-haircut，只係到時大家都唔需要剪髮，當大家都唔需要出街見人，只係對住部電腦過自己嘅日子嘅時候，個樣變成點又有咩所謂。

而果陣時世界嘅人口，應該係被當時嘅政府控制。我嘅幻想世界裡面，因為所有人都唔出街，接觸唔到其他人，跟本就唔會有男女嘅結合，所以人類嘅傳宗接代就由機械以有限嘅數目嚟培育，政府類似納稅咁，收集晒所有人嘅精子/卵子，經過棄劣取優嘅方式，去生產人類，目的只係人類唔會滅亡。與此同時，人類已經完全沒有家族嘅關係同家庭嘅槪念，人與人之間從始再無感情嘅來往……

其實諗到呢到就覺得咁嘅世界，咁嘅生活，人類仲需唔需要存在呢?!

新年前的必備環節

尋晚去咗剪髮，老實講，一為神功，二為弟子。

想剪個髮去迎豬嘛，其次都想改變一下個髮型，自從夏天剪短咗之後，一直想留返長都唔成功，今次都唔例外，都係覺得短短地個人望落爽d開心d。仲有呀，嚟緊會約返晒d舊同學食團年飯嘛，要扮得靚d，見吓大家。嘻嘻。

我尋日朝先諗住去剪髮，我諗到就梗係要做架啦，唔係我又唔記得架啦，一於坐言起行，於是放工就走咗去髮型屋。去返幫我剪咗好多年頭髮個髮型師度剪，我由中一開始，就喺果度剪髮架啦。雖然中間都去過唔同嘅地方剪頭髮。不過都係Jacky(即我個髮型師)剪得最啱心水，同得佢最了解我髮質同頭型。俾錢都俾得心服，老實講都唔算好貴，洗剪吹夾染都係$336。算平啦。但我仲未做負離子，諗住過完年先，因為怕貴。點解咁早去剪都係驚佢貴同多人嘛。

識咗Jacky咁多年，一路睇住佢變，由我中一嘅時候開始幫襯，其實佢都只係大我五﹑六年，但已經係一個剪型師，好多人搵佢剪髮，個個都係中學生。當年佢就勁多口水，名符其實嘅吹水人，次次去到都有d好熟好老友嘅感覺。到而家佢成家立室，水花少咗好多lu，成熟咗。真係歲月催人老。佢仲開始發福添，不過發福都係件好事，証明果個人唔洗點捱嘛。

唔好話人哋成熟穩重，連我自己都唔再係一個學生妹啦。

催谷過渡

尋日收到d護膚品，好急不及待去試啦。
咁尋晚臨訓前搽咗d美白精華液，不油不膩，瞓醒後感覺良好。
所以今朝再加埋隻水凝保濕霜一齊用，點知呢支保濕霜比較膩，即時起咗兩粒油滋粒。
嘩﹗好驚呀﹗即時停止自己再亂嚟。
今晚唔用精華液，亦都唔用保濕霜，用隻sleeping mask，急救下先。

師奶仔嘅諗法

我之前上forum啦，見到d人介紹一間網上訂嘅化粧品公司喎，大家都話幾好用，同埋抵。所以我都訂咗d，仲今日送咗貨嚟添。

我比較算死草，佢要訂夠$250先送貨，我咁啱又啱啱訂夠$250喎，嘻嘻。
佢今日送貨嚟果陣，我未返到屋企，所以亞妹幫我交收。我返到嚟梗係第一時間開嚟睇啦。

一睇嚇親呀。除咗我訂嘅護膚品之外，仲送咗$100嘅護膚品比我試喎。
以一個師奶仔嘅諗法，覺得佢簡直係著數啦。不過，我都係一個講求証據嘅人，點都要試咗好用，先會再幫襯嘅。要做個精明嘅師奶仔先得架嘛。 =p

點解咁鍾意……佢

我講嘅佢，並唔係我honey。呢個佢係我嘅至愛歌手--周杰倫。

我今日放工嘅時候，一路搭車，一路聽住周杰倫。我聽到一首歌，我好鍾意架。靜靜地一個人聽嘅時候，都總係會聽到喊。第一次擁有呢首歌嘅時候，我一口氣repect咗12次。真係超過份。不過，我肯定每個失過戀嘅人，聽呢首歌果陣，個心都會有d"嗱"住"嗱"住。

我鍾意周杰倫當然唔係因為佢個樣啦，因為佢一d都唔靚仔。我鍾意佢，係因為佢嘅歌係我失戀嘅時候陪住我。我仲記得對上一次拍拖，男朋友話比我聽呢個人唱歌好聽，我覺得佢個樣好奇怪，不過d歌都尚算好聽。但上次失戀嘅時候，周杰倫plug"安靜"。同我當時嘅情況真係perfect match。一聽，一個豬頭文就走咗出嚟，每次聽都喊到成個豬頭炳。之後就開始鍾意呢個人，因為佢可以講到我心情。除外失戀，仲有好多架。周杰倫嘅歌有好多都好好聽。

而最開心嘅係我honey都係佢fan，雖然無我咁瘋狂，但周杰倫都令到我哋多一個共通點呀。

丫，今日再次聽到我果首係"軌跡"呀。

為將來，諗遠d

我今日去簽咗啦，三月返新工，最衰係contract。不過，人工實在可觀，我出個咁嘅價佢都同我fight到返嚟。好，一年就一年，我睇嘅係一年後嘅resume好睇d。

但今日簽約果陣確係吹脹。佢話我全年總收入，新公司會拎嚟做reference，用嚟計bonus。但佢又再同我講，我有七日嘅annual，一定要放晒佢。我問佢annual係agent比我，定新公司比我。佢話係佢哋自己拎錢出比我，我話咁你一定要我放，新公司咪當我無返工，我份bonus咪少咗囉。咁個agent就出去問佢個manager，返入嚟同我講d annual leave可以唔放晒嘅。我再問佢，咁放淨嘅annual leave點計返比我呀?佢又唔知，再出去問佢manager，返嚟又同我講，用個monthly salary除返最後個月嘅日數。我又問，咁係working days定係果個月嘅日數。唔洗講，佢就梗係又唔知啦。今次佢出咗去之後，入嚟嘅就係佢個manager，佢又由頭講一次份contract比我聽，我又頭問一次我嘅問題，佢話果7日annual leave係以最尾個月嘅日數去計，咁啱果個月係2月，有so喎。

真係好搞笑。

臨死前一刻

尋晚聽收音機，佢哋假設咗一條問題:
"假設，你人生喺下一秒就到盡頭，你會喺最後一刻，同邊頭講D咩呢?"

聽到果吓，都覺得好無聊。但我又真係走去諗，我會同邊個人講D咩呢。

我諗人生最後一刻所諗起嘅人，一定係你一生人裡面，覺得最唔放心嘅人。對我嚟講，呢D就梗係我屋企人啦。

我諗我會同佢哋講，"我唔可以再幫你哋做呢樣做果樣，你哋要自己學識佢啦。
老豆，其實你係一條鱷魚頭老襯底嘅懵佬，做咗五十幾年人係時候要醒少少。好高騖遠係無用架，做人要腳踏實地，知足自量，尤其係對一個有家室嘅人。
亞妹，呢個世界唔會個個都鍾意你，但唔鍾意你嘅一定唔會係屋企人。憤世疾俗只會令自己辛苦，同比人覺得你傻同固執。
亞媽，你D語氣真係好易令人誤會，大聲同鬧人係人都識，D人就偏偏唔聽，你要學吓講嘢好聽D。"

send email

我係一個成日send email比自己嘅人，唔係我自戀狂，而係我無記性同懶。

我成日忽然間諗到D嘢想 search 就會即刻去做，因為我好快會唔記得。

search完，就send D good 嘅link去自己嘅email做返個reference。返到屋企﹑或者去到邊醒起可以搵得返。

初時我都唔發現，自己有呢個習慣。尋日我review返自己個email account 嘅email，發現收到好多自己嘅email，先知自己呢個習慣開始有D過份同病態。

唔知自己懶定係天氣太凍呢

唔知自己懶定係天氣太凍呢。我由上個月22號開始就未寫過個blog啦。可能係我呢D冬眠類動物喺冬天嘅時候太需要休息，有咩都唔係太想去做。最好就係咩都唔洗做，就連寫自己嘅blog最好都有人代勞就好。但呢個世界又有邊個人會知道你個心諗緊咩丫，寫blog呢D咁私人嘅嘢，都係自己嚟啦。

上個月尾好忙，忙聖誕﹑忙考試﹑忙過年﹑忙關自己事嘅嘢﹑忙唔關自己事嘅嘢……雖然我無寫blog，但唔代表喺我身邊無事發生。開心﹑唔開心嘅事成日都喺身邊發生，只係你有幾留意佢。今日都係決心將佢哋記返低，年紀大嘛，唔記低嘅話好快就唔記得架啦。

就由12月23號再開始寫起啦。
12月23號: 今日出發同無良慶祝生日之前，小鵬喺MSN度收到Eric嘅message話佢心情欠佳…
12月24號: 三pair人玩煮飯仔…
12月25號: 做半日乖學生，做咗一晚乖女朋友…
12月26號: 環球嘉年華，我殺呀…
12月27號: 放完假，個人散晒，仲要返工，好在…
12月28號: 同27號一樣…
12月29號: 今年最後一個死期，請假等死…
12月30號: 往年都唔會好記得呢日，但今年佢先多返個意思…
12月31號: 報二級定報三級呢?…仲有，今年再約alice一齊過新年…

1月1號: 新一年，開心D。Happy Feet…
1月2號: 放假嘅日子快過打針，再返番工，任務係安慰Eric大行動…
1月3號: 接上日，安慰Eric大行動II…
1月4號: 今日，我知深入咗，覺得比我想像中更…
1月5號: Happy Friday，yeah…
1月6號: Wii大作戰…
1月7號: 作戰後遺症…

有咁多嘢要寫返，實有排寫啦。-_-'