新年前的必備環節

尋晚去咗剪髮，老實講，一為神功，二為弟子。

想剪個髮去迎豬嘛，其次都想改變一下個髮型，自從夏天剪短咗之後，一直想留返長都唔成功，今次都唔例外，都係覺得短短地個人望落爽d開心d。仲有呀，嚟緊會約返晒d舊同學食團年飯嘛，要扮得靚d，見吓大家。嘻嘻。

我尋日朝先諗住去剪髮，我諗到就梗係要做架啦，唔係我又唔記得架啦，一於坐言起行，於是放工就走咗去髮型屋。去返幫我剪咗好多年頭髮個髮型師度剪，我由中一開始，就喺果度剪髮架啦。雖然中間都去過唔同嘅地方剪頭髮。不過都係Jacky(即我個髮型師)剪得最啱心水，同得佢最了解我髮質同頭型。俾錢都俾得心服，老實講都唔算好貴，洗剪吹夾染都係$336。算平啦。但我仲未做負離子，諗住過完年先，因為怕貴。點解咁早去剪都係驚佢貴同多人嘛。

識咗Jacky咁多年，一路睇住佢變，由我中一嘅時候開始幫襯，其實佢都只係大我五﹑六年，但已經係一個剪型師，好多人搵佢剪髮，個個都係中學生。當年佢就勁多口水，名符其實嘅吹水人，次次去到都有d好熟好老友嘅感覺。到而家佢成家立室，水花少咗好多lu，成熟咗。真係歲月催人老。佢仲開始發福添，不過發福都係件好事，証明果個人唔洗點捱嘛。

唔好話人哋成熟穩重，連我自己都唔再係一個學生妹啦。