三pair人玩煮飯仔

今日係平安夜，我同小鵬﹑無良兩公婆，仲有石頭同catherine去咗石頭屋企玩煮飯仔。

老實講，煮飯呢家嘢話學話學咗十幾廿年，我都未正式煮過一餐飯。唯一一次係亞媽過咗去星加坡果次，迫於無奈，煮咗D啦簡單嘅餸比亞爸同亞妹食。果次好在都食得落口同食完唔洗洗胃。

今次又去玩煮飯，仲要一人煮一味喎。唔好話我驚呀，小鵬仲驚過我，佢除咗驚自己整唔掂，仲要驚我整嘢食會整親自已。(係呀，唔知點解某D情況下，小鵬佢會覺得我係低能架。)所以我哋都諗咗好耐去到整乜食好呢。

知道咗無良佢哋一個炒飯，一個炒什菌；石頭就煮意粉，catherine就煮蒜蓉西蘭花。見大家咁齋，我同小鵬就整兩味肉啦。但整肉對我哋兩個唔煮嘢淨係食嘅人確實係有難度呀，但好在上天有好生之得，唔洗我哋平安夜都要食齋咁慘，比我哋發現石頭屋企係有焗爐架。所以我同小鵬就去咗百佳super store度買咗D醃好嘅BBQ叉燒同雞扒去焗，我哋佈好錫紙，搽完牛油，放D肉上面，放入焗爐度叮，就坐喺度睇電視。佢哋四個仲喺個廚房度氹氹轉，都係擅用屋企每一樣電器用品好，洗咩做得咁辛苦呢。

叮完出嚟，仲好好食添呀，我哋D肉係最快食晒架。我同小鵬簡直係美貎與智慧並重呀。

除咗煮飯仔，我哋仲一人拎份禮物出嚟交換禮物。我唔知點解佢哋唔想自己抽到自己老公老婆或者男女朋友嘅果份禮物，所以我哋搞咗好耐。由最初劃鬼腳﹑抽啤牌﹑玩層層疊輸咗先有得抽……都係唔得。最終都係要分組抽禮物先得。不過搞咁耐都幾開心嘅。

我送出嘅禮物確係有D抵死，因為禮物限定要一百蚊，我買咗一對好得意嘅鹽樽同胡椒粉樽，但仲未夠數，所以就搭咗一大包幼鹽，但最搞笑嘅係我明明係送胡椒粉樽，但我又走去搭單買咗樽胡椒粉喎。真係勁低能呀。

(後記於2007年1月8日)