問世間情為何物?!

一個勁老套嘅標題。"情"?!有好多種，一個勁濫﹑範圍勁廣嘅topic。但永遠令人要生要死嘅都只有最漂渺嘅愛情。由十幾歲到卅幾四十歲嘅人都有，一個咁難玩﹑咁無把握嘅遊戲，點解偏偏咁吸引人呢?

今次嘅主角(托賴，唔係我)係星加坡個表弟。一個喺溫室長大，無乜點經歷過大起大跌嘅男仔(其實都廿四歲架啦。)雖然當過兵，我成日都覺得香港應該要D細路去當兵啦，一可以鍛練身體﹑二可以學習獨立﹑三可以學識急機處理﹑四可以識得遵守紀律﹑五可以比父母知道佢哋嘅仔女唔係要喺佢哋嘅保護下先可以過日子。好可惜香港無得服兵。anyway，講返回頭先，表弟其實先前當兵嘅時候，都已經發現有少少問題，因為佢比較容易有控制唔到自己情緒嘅情況，所以當兵嘅時候，都提早退兵。

今次，佢因為鍾意咗一個自己嘅好朋友，基於佢先前嘅經驗，向好朋友表白=向好朋友提出絕交。所以佢都考慮咗好耐，但最終都係衰衝動，同果個朋友表白咗。就係因為做咗D自己覺得唔應該做嘅嘢，情緒就開始不受控制啦。

不停send SMS比D 朋友話自己好唔開心，連香港嘅朋友都滾搞埋。所以，d朋友就打返比舅母即係表弟個媽啦。搞到舅母鬼咁擔心，走去check表弟嘅MSN，知道佢有同我MSN，所以我都被列入証人之列。佢打嚟問我佢個仔去咗邊，佢話表弟唔聽佢電話，我點知喎。我又唔知舅母知幾多，表弟要我唔好講。所以，我講D唔講D，都係游說舅母比我搵吓表弟。

後尾都比我打通電話比表弟，佢話今晚唔想返屋企，佢話佢知搞咗好多件事出嚟，唔知點樣面對屋企人，要時間冷靜吓。我知迫唔到佢返屋企，我只要求咗佢向屋企報個朋友，同一定要搵幾個朋友今晚陪住佢，make sure佢真係唔會亦都做唔到傻事，我先去瞓。

其實，你可以去鍾意一個人，但你唔可以要一個鍾意你嘛。一個好簡單嘅道理啫。點解大家要做D傻事去傷害自己同身邊嘅人呢。

----------------------------------------------

尋晚再次收到舅父個電話，佢同我講表弟想搵我，但佢唔見咗個電話，要我打舅母個手電搵佢。

我咁乖，梗係遵命啦。
打到後，舅母比咗個電話比表弟。一嚟表弟就同我say sorry。我問佢咩事，佢話佢尋日朝返到屋企一個人，又開始亂諗嘢，最終，食咗十幾粒安眠藥暈咗，而家喺醫院，雖然情況穩定，但要留醫檢查。

佢話佢做咗好多錯事，又話無聽我講，好對唔住。對唔住D咩啫，你做之前又唔諗吓會對我唔住，做完先講對唔住，有用咩?!講真，佢唔理我講乜，唔理我感受，我唔介意，我都只係佢比較好傾D嘅表姐，我嘅感受唔需要太理會。但點解敢做傻事，又唔顧面對自己嘅失敗同自己嘅屋企人呢?我亦都好老實同佢講，我對佢所做嘅嘢好失望。同時，我都好激氣自己阻止唔到表弟做傻事。我呢個表姐都算唔上稱職。

我聽到其實好嬲。呢個世界有咩事真係解決唔到要輕生先。都係果句，一個唔愛自己嘅人，仲邊有資格去愛人同被愛。唔自愛嘅人，講其他嘅嘢都係多餘。

後記於 2007年2月9日