腸胃炎

都唔知食錯D乜，星期一果日成日個胃都好痛，仲一路脹卜卜添。到咗下晝仲開始肚痛。最終早咗半個鐘收工。

因為星期一要返學，諗住返HKU果頭睇吓有無醫生睇啦。行到去巴士站，等咗一陣巴士，覺得唔係好對路，個胃實在太痛，個人仲開始標冷汗添，所以都係決定返屋企。好在等咗唔係好耐就有巴士，不過上到車，架車實在好"浪"，同企喺我後面果兩個女仔係咁撞我，搞到我過咗半條隧道就開始頭暈添。

所以過咗隧道之後，我都係決定落車。一落咗車就已經失晒控係咁嘔，果種洶湧澎湃嘅程度，我都完全唔知可以點做，只好張開口任佢嘔，等佢真係嘔晒為止。果一刻有D覺得難受，嘔到個人眼淚水都標埋。最終嘔完，但個人開始發軟蹄同不停打喊露(因為之前試過喺街度出現休克情況之前，就係不停打喊露)，所以我都好驚會再眼前一黑，我搵咗個地方坐咗一陣。可惜坐咗兩﹑三個字之後，都仲喺手軟腳軟，最終只好慢慢行去巴士站等車返屋企樓下睇醫生。

去到醫生度，醫生話我係腸胃炎，但因為我喺胃嘅位置由左到右都痛，所以醫生叫我食咗藥都仲係覺得痛，就要去睇急症，因為佢話我可能係胰臟發炎喎。(咁大鑊?!不過都係食咗藥先算啦!)。返到屋企食完藥，抖咗一陣，真係仲係好痛。咁唯有去睇急症啦。急症室個醫生一"禁"落我個肚度，痛到我成日彈起。佢話我係嚴重腸胃炎，佢話要即刻同我打支針(醫生，唔打針得唔得呀?我好怕打針架。)我唯有喺個護士不停叫我放鬆D而我就一路驚到打冷震嘅情況下，比個護士篤咗個"pat"一針，好痛。然後，叫我等等睇吓點。坐咗15分鐘，再見個醫生，雖然個胃仲有痛，但D腸好易鬆咗D。

醫生話比兩日藥同一日假我，叫我食完藥，如果兩日後再痛就要去覆診啦。我星期三就已經返翻工啦，因為醫生比得一日假我咋。呢兩日個肚都仲係不時有少少痛咁啦，希望快D好返，新年唔好病啦。好唔返嘅話，都唔知年初一有無得燒嘢食添呀。