To Eric

守得雲開見月明。

恭喜恭喜。

送上無限祝福!!!!!

醋酲

我自問係一個天生嘅大醋酲。我估我每個男朋友都有試過我醋意大發嘅經驗。

上個星期日，我又再次病發。

話說，我哋食完飯。埋單果陣，通常都係男朋友出埋我果陣，(其實，又唔一定嘅，只係視乎邊個銀包有錢啫。但如果男朋友有嘅，通常都係佢比囉。)咁Amanda見到小鵬比埋我果份，佢就口快快(喺我嘅角度，係口多多，多d)咁叫小鵬比埋佢果份。我亦都好好奇嘅咁咗小鵬一句，"點解你要比埋佢果份呀?"Amanda就真係口多多咁講咗句好曖昧嘅說話，exactly果句係咩，我唔記得，但大意係憑佢哋以前嘅關係，小鵬就應該要出埋佢果份。我知係玩，但醋酲一打翻，無人可以收拾得到，包括我自己在內。

我開始唔理小鵬，除非佢可以解釋到頭先果句說話啦。同事實之全部。我知係難為咗佢，但我真係醋意難消呀。最終，小鵬都要多番解釋，連翻say no之下，先可以令我除下最高警備。

我知呢個應該係我做唔到一個好女朋友嘅最大原因。

翻兜行山記

話說上次去行山，唔知搞乜鬼，竟然行錯山。明明應該係行平路，但就偏偏行咗山路，都仲要無人知一路行到分岔路先知，真係搞笑。所以，今次就去補行返。條路真係一條平路，一d都唔難行，老實講，自從行完浪茄，我已經唔覺得有咩山係好難行。所以，呢條路嘅難度指數只有一點五粒星，有半粒係因為太陽太猛。

我哋一路行，一路傾計，亞暉今次都有嚟行山，大家都開始傾吓，有邊區d樓平呀，邊區好住呀，d樓有幾貴呀咁……的確大家年紀都唔少，都係時候要考慮踏入人生另一階段呢。其實，講起呢個話題，大家都好灰，係時候又未係時候之間。係時候嘅意思，係大家真係有咁嘅感覺要做呢件事，但又未係時候嘅原因係大家之前都無為呢件事有咩實質安排同打算。講白d，真係負擔唔起要去買一層樓呢。做呢件事嘅犠牲真係太大啦。不過，真係好鍾意亞暉講果一句，"你有嘅就係咁多，就係要喺你有限嘅資源上，得到最大嘅滿足。"講到尾，做人都係要知足。

行完山，大家嚟咗我屋企食tea，打牌。我開好枱，安頓好大家，我就走咗好沖涼，出到嚟，大家都打得如火如荼。亞暉係果日嘅大旺，我都一早話咗唔同d唔識打牌嘅人打牌架啦，旺到甩肺呀。打錯牌都可以自摸到，吹脹。

過咗一陣手癮，大家都起程去食晚飯。因為原定嘅地方果日無開門，所以就轉咗去食間(我諗係)意大利餐廳。食吓pizza﹑angel hair咁……好最鍾意都係個angel hair 同個salad。其實，我真係唔係食咗好多嘢。

食完晚飯，我哋就落咗蘭桂芳飲嘢，我都唔洗去灌人，有人就自灌自嘞。呢個世界只有兩種人會自動自覺自灌自，一係失戀(想發洩)，二係啱啱有得戀(發傻)。佢係後者呢。