運動日

今日我抽起條筋想去跑步，(其實，係因為我大佬話我要開始減肥，想好準備。)所以，今日放工返到屋企，同亞爸亞媽食完飯，我就提議亞爸一齊去跑步。點知佢又一口答應咗，我哋就一齊去咗跑步啦。

今日係我哋第一晚跑步，只係跑咗十分鐘，之後就喺柴灣行咗一個大圈，行咗成個鐘先返屋企。
亞爸行到雙腳有d抽筋呀，我哋就慢慢行返屋企囉。

返到嚟，我d汗已經乾晒，老豆仲滴緊汗，超誇張。
我沖完涼就順手倒咗盤暖嘅鹽水比佢浸腳，浸完先沖涼。

下次都係揀星期四先去跑，因為星期五亞爸休息，唔洗驚第二日隻腳軟，開唔到車。 ^_^

一季收成

今日行完個勁人多嘅展覽。
發現彼此都係經驗不足，尚有進步嘅空間。
今日學咗嗌"停"﹑"唔好"﹑同狠心地轉身走。

是日驚喜係"20呎樓底嘅維多利亞式裝修"，讚絕(尤其係男主'腳')，心動不已。

今日有前輩指點，承繼咗份報單表。
回顧發現目標原來達到咗一半，但我哋係唔會就此鬆懈，因為目前嘅修行尚未完美，所以修行計劃有所改變，從海外回流修行。希望將風險減低，可以向住目標穩步邁進。

Hip Hip Hurray.....

第一大難題

一出招就遇到強烈嘅攻勢。
小鵬被一招: "92"，就嚇到我哋手忙腳亂。
要拎部計數機出嚟指細參詳下。
唔知我呢邊又會出幾多招呢? 拭目以待……

行程review

發現直航機最早都係九點出發，但要成下晝三點先去到千嵗。咁就無咗成朝加大半個下晝啦，所以我哋delete咗函館。 -_-噢~~~~

函館夜景，我下次先嚟見你啦。

行程編排

plan咗……五日四夜
plan咗……先去"登別"﹑路過"洞爺"﹑再去"函館"﹑返上"札幌"﹑回馬"小樽"﹑最後"札幌"回歸。
plan咗……唔駕車，唔洗驚。
plan咗……

變幻

"知否世事常變 變幻原是永恆
此中波浪起跌 當然有幸有不幸
不必怨世事變 變幻才是永恆
經得風浪起跌 必將惡運變好運……"

今日心血來潮，(不如話星期五唔想做嘢比較正確)，一路keep住update住個恒指。每refresh個page一次，個恒指個net change 就越嚟越大，係跌幅越嚟越大。其實我想佢跌咗好耐，(唔係我黑心，只係咁我先有機會同人爭一日之長短)，可惜一個人嘅期望有限，我一個望跌時，百幾二百萬人望升。所以，恒指喺臨收市果一個鐘，由跌12xx點跌幅收窄至跌28x點。唯有嘆句"命裡有時終需有 命裡無時莫強求"

除咗外身物外，今日仲有一件好接近死亡嘅事發生喺我身邊。
今朝一早亞媽收到喺大陸工作嘅大舅父電話，佢話佢啱啱收到亞公電話，亞公話自己喺屋企跌倒，大舅父叫亞媽去睇吓亞公喎。
下晝我再收到亞媽電話，亞媽話佢同咗亞公入院，亞公個頭穿咗，聯咗六針，而家喺醫院留醫。我放工同埋小鵬一齊去咗探亞公，佢要用氧氣幫助呼吸，唔可以落床。但亞公佢就最怕住院，我去到就一直見佢好似饣朋友咁，扭要落床，扭要做運動，扭要返屋企……搞咗一輪，喺佢太激動嘅情況下，佢就開始氣喘。情況仲越嚟越唔樂觀，眼見護士急call醫生之餘，醫生又將亞公轉去緊急病房，就忍唔住埋去問吓醫生亞公情況點。醫生好凝重咁同我講"伯伯條氣好速，我哋而家同佢做急救，你通知定家人。然後，慢慢行返去休息室，亞媽問我醫生點講，我唔敢肯定自己聽到嘅嘢，又怕自己誤會醫生嘅意思，我望咗小鵬一眼，就同亞媽講醫生叫我哋通知家人，跟住我就已經忍唔住d眼淚。我打比上咗大陸玩嘅亞妹，亞妹就立即落返嚟。

幸好，係急救完之後，亞公嘅情況都穩定d，但因為亞公太扭計，醫護人員就唯有綁住亞公對手。眼見亞公又要瞓床，又要戴氧氣罩，仲要比人綁住，個心真係好d心痛。

意料之外嘅答案

繼喺機場，鵬媽目定口呆得個窿之後，鵬爺同鵬爸首度攜手呈獻。"反客為主之嚇到傻"

鵬爺尋晚同鵬爸商量咗一件事，鵬爸嘅答案真係嚇死我哋呀。

不過，我都知係佢老人家一番好意。雖然我哋兩個都有d抗拒，但都要諗吓點樣去同鵬爸講好。

籌備中……

十月打算去旅行，同Billy大佬備咗案架啦。佢話都應該無問題，咁我一於疊埋心水，準備我嘅十月之旅。

我哋打算過去自駕遊，而司機呢個位置就梗係非我莫屬啦，因為鵬爺都無車牌嘅。不過，我哋都有一樣嘢好擔心，就係我考完個車牌咁耐都無掂過堂軚，係咪要去補返d鐘好d呢。我今日打過去問價啦，補鐘一堂都要成$150，仲貴過我果陣學車。我一問完，立即向鵬爺報告，大家都覺得有未見官先打八十嘅感覺，所以都係再諗諗先決定。話唔定要取消自駕遊嘅念頭啦。

講真，有得駕車，我都幾興奮架，不過講到有另一個人條命喺我手啦喎，我就有d保留。我真係擔當唔起。話晒佢而家仲係人哋個仔。我真係賠唔起呢。

除咗駕唔駕車呢個問題，仲有行程嘅問題，我哋諗住過去自由行呀。雖然唔識日文，但join團嘅自由度實在係……"無"呀，所以唔鍾意做鴨仔嘅我哋，就揀咗自己團。所以，而家就好努力咁去lan行程嘞。

人都癲呀

又一個月無寫blog，無他，都係OT之過。係overOT嘅情況下，一般人可能覺得我已經仙遊，但其實我只係被軟禁啫。雖然係咁，但我喺呢段日子，仍然做過幾件大事。

一）慶祝我嘅生日，對我嚟講，生日係大過天，一定要慶一慶。
二）同一個朋友聚舊，唱ｋ唱到四點。佢嚟咗，又走埋，同柏布一樣，話嚟就嚟，要走即走。
三）決定一件係呢三件事裡面最大件嘅事，但我而家唔講係咩住，呢個係一個”暫不能說的秘密”　＾＿＾

當然，我第一時間去捧咗我頭號偶像周杰倫場啦，”不能說的秘密”已經成功征服咗我嘞。唔好問我好唔好睇，係我眼中，我鍾意嘅人永遠係最好嘅。愛，係盲目架嘛。　哈哈哈……

仲有呀，我仲去咗捐血，不過今次都係難逃瘀晒嘅厄運，今次仲要兩隻手都瘀晒，下次都係要聽聽話話，飲足三杯水先好捐。

講返今日，今日終於都掛咗三年嚟第一個八號風球啦，有得早收工。ｙｅａｈ~~柏布萬歲早收工萬歲。好彩，我真係早返屋企，我無遇到勁迫嘅情況。對我嚟講，一d都唔混亂，只係打風搵唔到人同我去玩，有d失望囉。