美中不足

我個新位可以話完美，因為係一個死角位，除咗坐我後面嘅大佬Billy，可以望到我做緊乜(其實，我哋中間仲隔咗個櫃架，佢一定要企起身先望到我。)，跟本就無人知我做緊乜。

可惜，我個位同時亦都係一個風口位，超大風同勁凍，我要借埋同事嘅外套著先可以擋吓風，真係要諗吓帶埋返去保吓暖。

公司搬家了

好耐無寫過blog，差d都唔記得自己有個blog添。
可能因為無咩大事發生啦，所以都無咩係非寫不可。

不過，講開都可以講嘅。
公司啱啱果個禮拜搬咗去九龍灣MegaBox啦。每朝都要早15分鐘出門口，又再次走向地鐵站同一大群人去迫地鐵。其實我真係唔係咁鍾意搭地鐵，不過去咁遠都係搭地鐵穩陣d。仲有shuttle 免費接送，所以交通都總算方便。

公司喺29樓，我個位都唔錯架，隔離就係無敵大玻璃窗，前面係舊機場跑道，遠眺到中環IFC同紅磡海名軒。望出去有山有海，真係靚絕。只係可惜我個位有D西斜，一食完LUNCH就要落返個窗簾，到個太陽無咁"殘"眼先可以開返個窗簾。有少少可惜啦。

仲有，公司有設有公司飯堂，每餐只係$14，好抵架。有湯有餸，白飯﹑茶﹑汽水仲任裝添。$14真係好抵。

但係MegaBox都無咩人行嘅，人流真係好少，雖然有好多舖頭開咗，不過唔知咁冷清嘅局面會唔會喺不久嘅將來，舖頭嘅數目會大減lu。

考琴日

搞咗四個幾月，今日終於都到啦。

一向為人都過份緊張嘅我，今日都不失一向嘅本色 -- 驚到甩肺。
有首歌仔彈到一半甩咗唔在講，喺甩咗嘅時候，我隻手震到彈唔返，唔知點(我都唔係好記得)咁彈咗甩晒果三分一首歌，慢慢先彈得返最尾果三分一。唉……
真係合格與否都成疑啦。

考完嚟就梗係心情唔好啦。
以我一向心情唔好嘅解決辦法只有一個，出血。

而我嘅首選就係去捐血站，不過，我喺兩個月前已經捐咗血，唔可以咁快再捐過。
所以揀咗第二個出血方法，行街買嘢。

今日第一個受為者當然係我honey啦，佢之前話買件背心嘅羽絨。今日比我搵到，所以就買咗比佢去旅行著。
第二個受為者當然係我自己啦。買咗咩唔方便講，但可以令自己心情好返d啦。

好大風呀

由尋晚開始，一路都好大風，但天文台又無掛風球，可能係我之前寫嘅program有問題，搞到掛唔成風。(其實我個program無咁大威力，因為天文台有成兩至三個system一路mon住d風劫風速，唔掛風只係佢嘅criteria嘅問題)

話說今日喺公司做做吓嘢嘅時候，抬頭一望，見到我對住果塊玻璃上嘅反射影像竟然不時變形，好奇咗幾秒就諗到出面嘅風真係好大風。吹到連玻璃都震。接住，就聽到出面嘅雨打落塊玻璃度啪啪聲，再加上玻璃不停震，我真係有一刻驚玻璃會爆。