半夜開門

尋晚半夜，我聽到有一下開門聲，跟住開鐵閘，然後閂門聲，即係有人出咗去啦。起身望下個鐘，發現係凌晨三點。咁夜邊個出咗去呢?起身行出房睇吓。亞爸仲坐喺廳度睇緊宮嘅大結局，咁即係亞媽出咗去啦。問亞爸，亞媽做咩出咗去呀?佢話亞媽鼻敏感發作，出去抖吓氣喎。

我完全明白我亞媽嘅感受，因為我同我亞媽一樣都有鼻敏感，我哋對d好濃郁嘅氣味特別敏感。而點解亞媽要出去抖氣咁嚴重呢，係因為亞爸喺屋企食煙。所以，我好唔妥d人食煙，我覺得呢d人都係自私鬼，尤其係喺室內食煙果d呀。你係戶外度食，我都仲有得避，或者等d煙散咗d先行過你；但係室內，空間已然有限，你仲要喺度食煙，d煙完全散唔去，你同噴入我個肺度有咩分別。你唔理自己嘅健康，有舖癮要食煙，你希望慢性自殺，係你個人嘅意願。但你點解要迫你身邊嘅人陪你死呀?我又無份食，又唔係我迫你食，點解我要吸你d二手煙喎。

你哋食煙嘅人唔知，我哋有鼻敏感嘅人，一聞到煙味，個鼻就會勁刺痛，然後不停打乞嚏，再而就狂流鼻水。情況係完完全全失控，就好似一個癮君子毒癮起一樣。仲有，唔係你唔喺我面前食就會無事。只要聞到你個身有一陣煙味，都會不停打乞嚏，真係勁過緝毒犬架。

我覺得食煙係自私，唔單止係因為我有鼻敏感。仲係因為食煙嘅人一直都做緊一d害人害己嘅行為。我細時都有試過食煙，但我拎得起放得低，同埋我有惻隱心同怕死囉。亞爸一個食煙亞媽都流鼻水流成咁，再加埋我，佢咪一條水渠咁。仲有，我好怕死囉，我唔想自己係因為食煙而生肺癌或者鼻咽癌死，咁抵死。

而且食唔食煙都係擇偶嘅條件囉，我一定唔會揀一個食煙嘅人嚟做伴。佢唔顧自己嘅健康其一，就連身邊人嘅健康都唔顧，呢個人都會對我有幾好呀。仲有呀，要我對住一個成口煙味﹑一棚煙屎牙同成口焦油嘅人，對唔住，我真係唔想委屈自己。

好天氣續集 - 十九歲

我尋日一口氣聽晒廿四集嘅好天氣，今日就聽埋個續集。

其實，我聽好天氣嘅時候，發現仲有一齣係講亞占同亞凡嘅廣播劇喺好天氣之前，但我唔記得果個廣播劇叫咩名，所以搵唔返lu。

聽到少爺占嘅廣播劇，唔知點解有D初戀感覺，我覺得唔係個故仔嘅關係，係佢嘅配樂，即係林一峰同林二汶把聲……

"…疼你永不減散 約定十九歲
可以到白頭 到老年去…
搭臂頭 手牽手 愛字最怕說出口
信天長地久 別說曾經擁有
也許有天 一切都要變 身邊一切都要變
你我不見 總會發現 你在我背面 常在我心裡面…"

龍鳳胎

我同事話我聽佢亞姨生咗對龍鳳胎呀。嘩，好勁呀。

我有一對Twins嘅表弟，今年十歲。
有一對Twins嘅表姪女，今年﹖歲。

哈哈，又話生孖嘅機會率好低嘅，點解我身邊都會有咁多嘅。世界變啦。

好天氣

尋日聽完晒成套"戀愛樂園"，今日返工又無咩好聽，所以聽返以前嘅廣播劇。揀咗好耐，我都係揀咗少爺占嘅"好天氣"。

"好天氣"﹕
一套講中六生嘅戀愛故事。
而商台就用咗以下嘅幾句去簡介咗呢套廣播劇﹕

故事大綱：
我總覺得好天氣會為世界帶來點驚喜......

在哪一刻開始，我愛上了這女孩呢？記不起。
那就像你從來也不會記得你在甚麼時候愛上了茉莉花的香味，但，你卻為它著迷。

阿Moon是陳占現在可以即時想得到的茉莉花香味，但這香味會停留多久？

我就係咁一口氣係咁聽…係咁聽…

828

828係媽咪嘅西曆生日。

我練完琴想買個生日蛋糕比佢，但係……"無得賣喎。"

我只係買咗件芒果切餅比佢。一入門口，就拎住個蛋糕同媽咪講生日快樂。亞媽望住我同我講﹕"邊個生日呀?" -_-"(咪你囉。) 佢望吓個日曆，就笑笑口話﹕"我都唔記得咗添。多謝。"

真係比佢激死。

其實，我都唔明我幾時開始，我會有心機去氹吓我亞媽。不過，我記得細個嘅時候，我一路都唔鍾意媽咪，成日都同佢嗌交，成日都駁佢咀，因為我覺得佢錫亞妹多過我。但唔知幾時我唔再計較亞媽錫邊個多D；唔知幾時開始我覺得我有必要要好好照顧我亞媽，而唔係同佢鬥氣！

我變咗……

我之前有兩日幾無行埋部電腦前面，無上過網。

比起前兩﹑三年嘅我，一日唔行埋部電腦度，我一定會發癲。而家我覺得無咩所謂，我仲有好多嘢可以做﹕睇書﹑計數﹑練琴﹑睇電視……我記得我已經好少嗌悶(如果我講錯﹑或者有唔記得，你提返我。)

其實，我唔係變咗，或者大個咗，只係我覺得我需要更多嘅時間，我想去旅行﹑去見多d嘢﹑去學多d嘢……其實，之前都同小鵬講過，我哋希望每年都可以去一次旅行。但上年因為我嘅原因無去到，我有d唔好意思。今年一定要去返。暫定十月會去旅行，希望成行啦。

fitness test ... pass唔到添

一路都覺得個fitness test好難，一路都覺得自己會pass唔到，搞到自己好大壓力。

事實上，我都真係pass唔到。不過我想去賴d乜嘢，相反，我仲覺得係我唔夠fit。

九個女仔去做fitness test。大家都無咩信心，第一次見面，識咗短短幾分鐘，就已經不斷互相鼓勵。第一關已經有人唔達標，即係走一件。第二關又走兩件，過咗四關，走淨四件。而我係呢個時候先得果10分，即係800米要3'04內跑完先有分pass。但我跑得3'44，得3分。overall，就得13分。sorry，行人止步。

但係呢個時候，一路都覺得個test有問題嘅我，覺得都有女仔pass到，即係我嘅問題，而唔係個test 太難啦。所以，我覺得我要再練好d 體能。我一定會再去考，但我嘅目的只係要pass 個fitness test。

亞王

本來呢兩日都唔係好好mood，因為呢個星期五又要考fitness test嘛。諗起都無心機。

但今晚睇電視，有亞王睇喎。無錯，exactly，就係AK <- Aaron Kwok 郭富城，登登……

我鍾意佢以前d國語歌同快歌。但以前都總係覺得佢有d雞仔聲，或者有時掛住跳舞唔記得唱歌或者唔夠氣唱歌，又或者以前嘅郭富城太過孩子氣。

今時今日，年過四十嘅郭富城，除咗擁有一個我覺得超靚嘅body之外，仲有一份成熟嘅男人味。今晚睇到佢又唱又跳，確實係精彩。但最激死我嘅係，點解佢要著條吊腳褲呢?真係咁fashion?!我只係覺得好奇怪。初頭，一個近鏡影住佢著住件白色西褸﹑白色雞翼袖﹑只見到半截鬆身西褲，好有白馬王子感覺。跟住落嚟一個wide shot，真係"啤"一聲。點解係一條吊腳褲嚟架。邊有白馬王子吊腳架，咪玩啦。佢一路唱"失憶諒解備忘錄"，我一路望住佢條吊腳，真係有d諗返起占基利呀。-_-"

Anyway，我真係好懷念佢果首一唱就令人喊到豬頭炳咁嘅"當我知道你們相愛"，好懷念首歌演唱會版果隻大bear bear。一首失戀必唱嘅k歌，

執櫃筒

事先聲明，以下日誌以列為SG(Shertam's guide)，目的只為得啖笑，各方好友請以輕鬆嘅心情對待，唔好太過上心。尤其係你呀，肥仔。我都係想同大家分享吓我嘅感受。

我今日去完街返到屋企，唔知點解心血來潮，走咗入房執櫃筒。因為我想吉返d位出嚟放新嘅嘢(即我同小鵬嘅嘢呢)，同將舊嘅嘢"pat"晒佢。我一路執，一路搵到好多以前嘅嘢，亦都令我諗返起好多嘢。

i) 一封我寫咗但係無寄出嘅剖白情信。(睇返都笑到自己肚攣呀! 好在無寄咋，唔係真係顏面何全呀?!都唔知點面對各位鄉親呀。燶爆！)
ii) 一堆中學時代上堂唔聽書，日日喺度日寫夜寫嘅回信，有vienn寫嘅﹑有亞姐寫嘅，唔記得有無老nic寫嘅信啦。(總之果陣時就唔係讀書架啦，日日都見都仲要日寫夜寫，我哋真係愛對方。我估十幾年嘅友情就係咁寫返嚟呱。)
iii) 一封vienn係birdmingham寄返嚟，除咗吩咐我幫佢攞cert之外，仲話比我聽佢好想嫁比輝輝嘅唯一一封佢喺英國讀書時寫比我嘅信。(哈哈，終於如願以償，有情人終成有終成"綣屬"(<-死嘞，唔記得點寫添。i need help！)啦。比你恨到啦，我有証據架，你洗唔洗睇下呀?)
iv) 一堆喺英國散心時影嘅相同日記。(諗返起喺英國做過嘅嘢。同埋，諗返起英國真係好凍呀。)
v) 一封一個所謂嘅男朋友，其實係喺英國識咗一個禮拜唔夠嘅男仔，喺我返咗香港之後寄比我嘅情信啦。(哈哈，想當日我離開英國嘅時候，我連佢中文名都唔知。哈哈……男朋友……真係少年輕狂呀。好衰咁講句，返咗香港一個月之後，我己經比佢果d奪命追魂call煩死咗。所以，佢都係被cancelled。同埋，我去英國嘅原意，好似係去搵一個我之前暗戀咗好耐嘅男仔，想係我失戀嘅時間搵返d戀愛感覺咋喎。)
vi) 一大堆同初戀情人嘅情信啦。 (由頭睇返一次，好好笑。我唔係指內容，我係想講原來我都有細路過，我都有一段咁純真嘅puppy love呀。頭果一年嘅信都真係好sweet架。但我都同時發現，原來自己份人好拖泥帶水，我哋原來足足經過咗差不多十個月嘅時間，先正式分到手。我仲以為自己好瀟酒架添。)
vii) 幾封小學同學YoYo喺美國寄比我嘅信。(不過，就得果幾封咋。我不時都會諗起呢個識咗差唔多有廿年嘅老友。但係我已經無咗佢消息啦。)
viii) 每年亞姨喺加拿大寄比我嘅生日咭。(亞姨年年都會記得我生日，佢年年都會寄生日咭比我，隨生日咭內，仲會有一堆佢託我幫佢做嘅事。無計啦，鬼叫人哋記得我生日咩，佢叫乜，我都要做架啦。)
xi) 有d以前影落嘅相。(真係女大十八變，真係比d相嚇鬼死，見到都唔認得自己，仲指住自己嚟笑。有一張我一定要比你睇架，肥仔。)
x) 有一本日記。(我成日都覺得寫日記要等屋企人訓晒先可以做架。由於我以前成日都等唔到屋企人訓晒，自己就已經訓到死豬咁。所以，我本日記成日都脫期架。 = p)
xi) 仲有一幅當年亞花同亞姐仲好friend嘅時候影落嘅一幅素描。(我唔敢話佢哋以後都唔會再有機會一齊影相，但我估一定無我呢幅笑得咁自然同開心。知已難求呀。)
xii) 一大堆外幣同舊紙幣。(唔知點解，我發現我櫃筒有好多喺香港唔用得嘅錢，有1972年嘅舊5蚊雞紙幣"<-我亞伯話比有好多張，所以比張我"啦，有1蚊雞美金"<-初戀男朋友寄比我嘅lucky money，因為佢都係喺街執架咋"，有瑞典紙幣"<-我細個時候同筆友交換返嚟嘅"啦。我通通都記得係邊個比我嘅。只係我唔記得自己收過同放咗係個櫃度咁耐啫。)
xiii) 有一堆手信，有回力標啦(喺恒生做placement嘅時候，有個同事去完澳洲旅行買比我嘅手信。)﹑有一樽所謂嘅神水啦(係舊老細有個friend喺南非帶返嚟送比我，話祝我好運架喎。)……
xiv) 有一個beauty & the beast嘅音樂盒。(係初戀情人送嘅第一份聖誕禮物，仲識響架。)
xv) 一隻已經停咗嘅手錶。(係我第一份喺情人節買嚟送比男朋友嘅手錶，但佢竟然無收到。佢果陣時同我講，佢應承過佢老豆會戴住佢老豆送比佢隻錶十年。我唔知佢有無帶到佢老豆隻錶十年，我只係知我果陣好激氣，將我原本想送比佢隻錶"pat"咗喺櫃筒，今年啱啱第十年。)

往事的確係好回味，不過人要向前望架嘛，唔好再提住"舊屎"啦。

同事講嘅故仔

我有一個響澳洲完書返嚟嘅同事，佢嘅人生觀同事件嘅睇法，同香港local大嘅好唔同。今日，佢講咗個故仔比我聽。

有一個釣魚好了得嘅人，成日得閒就會去湖度釣魚。
一日，呢個人照常到湖度釣魚。有一個商人經過，見呢個人釣魚咁了得，就同呢個人講嘞。
商人話﹕"你釣魚咁叻，你可以將佢變成一門生意喎。"
釣魚人就問佢﹕"一門咩生意呀﹖"
商人就話﹕"你可以將你釣嘅魚變成罐頭食品拎去賣丫。"
釣魚人又問﹕"咁我要將d魚變成罐頭食品拎去賣要做d咩呀﹖"
商人就好興致勃勃同釣魚人講﹕"啦，你首先開間廠，買d機械，請d人返嚟幫手。再推出市場賣而去賺你第一桶金囉。"
釣魚人話﹕"賺到第一桶金，跟住又點呀?"
商人就更加雀躍同釣魚人講﹕"賺到第一桶金後，你將呢d錢再投資返落你間廠到。再買多d機械，再請多d人幫手。到時你嘅罐頭食品就可以賣得更多，仲可以上市添。到時就賺到更加更加多嘅錢啦。"
釣魚人又再問﹕"咁我賺到咁多錢之後，我可以做咩呀﹖"
商人就好陶醉咁答佢﹕"你可以喺湖邊買間屋，住喺湖邊。再買艘船，得閒可以去釣吓魚，同屋企過得悠遊自在d。"
當商人仲喺度自己陶醉緊嘅時候，釣魚人就話﹕"我而家咪過緊呢d生活囉。我做乜要咁辛苦賺錢呀﹖"
跟住就從商人身邊離開。


我同事同我講，有好多人覺得有錢﹑有車﹑有樓就等於開心。但d人從來都無諗過點解呢d嘢同開心係掛鉤，只係呢d人覺得人生就係咁，或者由細到大就係比人灌輸一個有錢就等於開心嘅價值觀。辛辛苦苦﹑兜兜轉轉行咗好多步，以為自己已經行到好遠，終於得到想要嘅嘢。其實，所得嘅一早就係身邊。

好鍾意同呢個同事傾計，因為佢睇嘢有佢嘅觀點與角度。係另一個值得參考嘅見解。

個膝頭哥好痛呀

我尋晚想練吓入境處嘅fitness test嘅項目，點知練到第二項就抽親膝頭哥條肋。搞到屈埋隻腳都痛，死啦，得返一個禮拜咋，真係唔知好唔好得返。我今日連上落樓梯都好痛，連行路都痛呀。

今日嘅都市日報

平時如果我夠訓嘅話呢，我係搭地鐵嘅時候都會拎一份都市日報嚟望吓有咩新聞。我通常都只係會scan吓d headings。一到站我就會將份報紙放入回收箱，因為我覺得無未值得我要留低佢。我今日發現咗一篇文章，我覺得好有意思，所以我留起咗份報紙，喺度同各位分享。

題目係﹕人生20問
【愛戀情緣】
Q﹕愛情真的可以一生一世嗎？
A﹕絕對可以，但你須把童話故事所云「兩人從此過著幸福快樂的日子」這概念拋開。最近有一組科學家研究發現，浪漫愛情與腦部發生的化學變化有關，而這種變化可維持十二至十八個月；往後的日子，便得看你倆如何相處了。愛情需要悉心培養，如果你想見證一段永恆不變的愛情，請到療養院看一看。我最近探訪了一位男士，他的妻子六十歲，患上嚴重的老年性癡呆症。他每天陪著妻子閒坐，握住她的手。他告訴我：「自高中以來，她一直是我最好的朋友，我們曾承諾會廝守一生。」這，就是愛情。

Q﹕為什麼夫婦的容貌會越來越相似？
A﹕當你觀察兩個相愛的人對話，你會發現他們有很多相似的地方，其中一人笑，另一人也會笑；一人點頭或揚眉，另一人也會做相同的動作。面容表情就像旋律一般，會自然地行進，使雙方保持同步。結婚數十年，二人休戚與共，舉止相若，在不斷重複下，樣貌相似實不足為奇！

Q﹕婚姻經得起背叛嗎？
A﹕可以，但需要時間和雙方共同的努力。佩姬．豐恩在她的著作《誰會有婚外情》中指出，估計有六成已婚男士和四成為人妻者，曾有婚外情。受傷害的一方，須願意寬恕對方，並學會帶著這不易抹拭的記憶生活。不忠行為是永難忘記的，但可以逐漸消弭於穩固而成熟的婚姻關係中。


【宇宙奧妙】　
Q﹕為何夏天永遠姍姍來遲，冬天卻遲遲不去？
A﹕正如愛因斯坦所說：「當你與一位可人兒共處時，一小時像一秒鐘般稍縱即逝。當你坐在火紅的煤渣上，一秒鐘像一小時般片刻難耐。」這是因為你的處境決定了你的感受。

Q﹕動物真有第六感嗎？
A﹕或者是第七感、第八感！箱型水母有二十四隻眼睛；蚯蚓全身都是味覺接收器；蟑螂能夠偵測到只有氫原子直徑二千倍的細微活動。即使是你的愛犬，嗅覺都比你靈敏十萬倍（據知有些狗可以嗅出人體的癌症）。所以，較穩妥的說法是，動物的世界與我們的世界有很大差異。

Q﹕為什麼你置身的行列總是前進得最慢？
A﹕你不能準時出席兒子樂隊的表演，便歸咎於運氣欠佳，又妒忌前進得較快的人。相反，當你站在前進速度較快的行列時，壓力消除，甚至沒留意那些在旁邊隊伍緩慢前行的可憐人。人通常只關注自己的不幸，卻甚少提及好運的時候。

Q﹕人該到什麼年紀，才知道自己想做什麼？
A﹕現在。這曾經是年輕人愛提出的問題；但現在，即使中年人也有此困惑。美國勞工統計局的調查報告顯示，在戰後嬰兒潮出生的人當中，較年輕的一輩已經放棄了穩守一份工作到老的觀念。年齡介乎十八至三十六歲者，每人平均做過九點六份工作。來自不同文化的傳統智慧都會如此說：人生在世，就是要好好活著。亦正如甘地所言：「你做的每一件事情，幾乎都是無足輕重的；最重要的是，你做了。」

Q﹕交通堵塞是怎樣發生的？
A﹕科學家正努力找答案，用電腦研究交通堵塞的物理模式，以及發明各種新的交通號誌燈演算法。有些科學家假設：影響汽車流量節奏的，是引發海洋波浪的同一種循環力量。不過，對於一般人來說，以下想法可能較簡單：堵塞的成因，就是太多人在同一時間做相同的事。（如果大廈內所有單位的人在同一時間用抽水馬桶，且看後果如何。）要使這問題不那麼惱人，我建議：買一份報紙、把一些心愛的歌曲下載到隨身聽，然後搭乘公車去。


【工作生涯】
Q﹕你的未來會怎樣？
A﹕當你不再追尋夢想的時候，你的未來就會離你而去。所以，不要停止追求夢想！

Q﹕你要愛上你的工作嗎？
A﹕不。你應愛你的孩子、配偶；也要愛你的父母、鄰居及寵物。愛是一種非常重要的情感，深深影響你的生活方式。不過，你可以藉著努力工作以獲取滿足感。根據最近一項民意調查的結果，美國有百分之五十九的在職人士表示，他們對工作感到極度、有些，或少許滿意，但有百分之三十三受訪者，覺得自己的事業已困入死胡同。調查還發現，小公司的雇員較大企業的更能投入工作。如果你正感到事業沒有出路，並想轉換工作環境，不妨參考這些意見。


【友情親情】　
Q﹕男女之間可否只做朋友？
A﹕也許短期可以，若要友誼長存，你們至少要覺得對方隱約有些令人不喜歡的地方。

Q﹕經常打架的兄弟姊妹，最終能相親相愛嗎？
A﹕我曾經問過兩位姊姊，她們仍然清楚記得我如何絆倒、揮拳，以及用各種塑膠大玩偶拍打她們（是她們取笑我而挑起事端的）。不過，她們對我的疑問，給予肯定的答案；她們現在都疼愛我，我也喜歡她們。所有專家都會告訴你，兄弟姊妹打架是平常的事，關鍵在於父母如何處理。第一守則：切勿偏袒任何一方，絕對不要討論誰在生事或如何公平處理。終止打架的方法，是強迫所有參與者停下來。我的母親會把我們關進不同的房間。因此，我們發明了拉繩對話機，用滑輪系統來運送所需物品和玩具。而且，我們都忘記了打架原因。

Q﹕悲觀的人可否變得樂觀？
A﹕最近有一個理論說，人有「情緒設定點」，所以有些人會比別人快樂。悲觀者認為這是壞消息，他們相信不論怎樣努力，也不會快樂。不過，活著就有希望！快樂在於你如何詮釋發生在身上的事情，而不是事情本身。


【孩子心事】
Q﹕小孩何時才變成大人？
A﹕生理上的成長來得較快，而情感上的成長則比較慢。現在，女孩子的青春期是在八至十四歲之間出現，男孩則在九至十五歲之間。回想上一代的人，十八歲就長大成人，自食其力。可是，今天很多年輕人大學畢業後搬回父母家中，期望父母幫助他們處理帳單、洗衣、膳食，以及其他成年人應負的責任。這種態度初時是挺可愛的，但孩子越大就越不可愛了。

Q﹕身為母親能否與十多歲的女兒成為朋友？
A﹕不能。大多數青少年都還未準備好建立類似成人之間的友誼關係。母親通常希望成為女兒的朋友，父親則想成為兒子的朋友，但這樣做未必是最好的。青少年要顯示自己獨立於父母，換言之，他們需要較多隱私，甚至保留一些祕密。一般來說，少女較容易與母親的朋友成為朋友；而做母親的，最好讓她們保持這種關係。


【金錢魔力】　
Q﹕金錢真的能買到快樂嗎？
A﹕不能，因為快樂是金錢買不到的。很多人因誤解而墜入深淵；他們累積財富的後果，是被捲進一個慾望永遠無法滿足的無底深潭之中。原來，即使擁有大筆財富，快樂與痛苦之間的距離並不會拉遠。請看肯德基夫婦的遭遇。他們二○○○年贏了三千四百萬美元，於是拋掉工作，把財富耗用在名貴汽車、豪華房子等奢侈品上，最後卻失去了人生最重要的一切，以離婚收場。後來丈夫死於與酗酒有關的疾病，而太太在獎金兌現五年後，孤獨地死在新購的洋房內。如果你有足夠金錢去買一艘豪華遊艇，卻沒有知己結伴同航，你在沉淪了。

Q﹕揮霍的人與節儉的人能否結成連理？
A﹕當然可以。而且他們不會相對無言。不過，夫婦因金錢問題而意見不合，是離婚的一大原因，所以專家就此提出了很多建議。如果你發現配偶的理財方法跟你截然不同，不妨參考以下提議：緊記多說「我們的」，而不要說「我的」或「你的」。兩人亦該盡量發揮自己的強項：由節儉的一方負責草擬財務預算，由揮霍的一方負責計劃旅行、慶祝活動及訂購食物。

Q﹕金錢是否為萬惡的根源？
A﹕不是，貪婪才是。「貓王」艾維斯．普里斯萊（又譯皮禮士利）的話一針見血，他說：「金錢要分享，才能夠令其有價值。」


【道德道義】
Q﹕當你見到家長斥責孩子，你該怎樣做？
A﹕如果你真的相信自己可以幫忙，不妨走近他們，但要以同情的態度，不要扮演控訴者或家事警察。你要同情這位承受著大壓力的家長，建議對方深呼吸。告訴他，這方法對你有效。

Q﹕為何承認錯誤這麼困難？
A﹕因為承認錯誤就要說「對不起」，這話很難說出口。歷史可證，一般人覺得不理睬對方，向對方揮拳、誹謗、轟槍，甚至投炸彈，都比道歉來得容易。提議：下次只說「哎呀」，且看後果如何。我們暫且撇下煩惱，來看看以下一個有趣的試驗。我們想知道：烤麵包掉下時，抹上牛油的一面，是否真的會朝下？還是可以讓麵包邊緣先著地？於是，我們每次烤一片麵包，烤好後抹上牛油，再從不同的高度（低至桌面，高至天花板）把麵包掉下來。結果發現：下墜的烤麵包一定不會是麵包邊緣先著地。無論你跺腳或大喊「討厭」，都不會改變任何事情。人生就是這樣。絕對不會像你期望的那樣美好。不過，請繼續在你的烤麵包上抹牛油，並好好珍惜每一片麵包。

今日又同eric chat

今朝又同Eric 傾咗成朝。佢話呢個星期六無波打，我同小鵬可以拍吓拖喎。乜佢終於都知道霸住咗我男朋友啦咩，終於肯退位讓賢啦。可惜呀，我呢個月嘅星期六都唔得閒，原本諗住有佢陪小鵬我可以放心，咁而家點算呢?

不過，唔緊要啦，我估小鵬都會留喺屋企寫program等我放學嘅。因為佢會趁住我返學嘅時間，快快趣完成個program，遲d有時間同我去玩(我估啦，吓~)。

就係咁，我就同Eric講起我有小鵬呢個男朋友，都算我好命。Eric話佢一向都覺得我命水唔錯，無咩困境遇過，同成日都會遇到d奇人異仕。我覺得我條命又無咩特別好嘅，我都好同意小鵬係一個非常好嘅男朋友，至於我條命啦喎，比上不足，比下有餘咁啦。"好命"?!，我唔算囉，"好差"?!，我唔會咁諗囉，起碼touch wood講句，我無咩缺少丫。Eric話我份人樂天知命，我就話係我懶，唔想諗咁多嘢，亦都唔想去愁咁多嘢，所以…咩都賴賴閒囉。

跟住，Eric又講返我嚟緊要考果個fitness test。佢話唔係好難，我就話唔係啦，"唔難，係超難啫。"大佬呀，入境處都傻架，有咩理由個fitness test嘅評分係男女同一個standard架。男同女嘅身體結構本來就唔同架啦，點可以用同一個樣去評分啫。Non-sense架。

其實我發咁多牢騷，係因為我好驚。因為我真係覺得好難，我好驚自己會唔pass。其實，我次次做test﹑interview都咁鬼驚，面青青。為咩仲要做呢?為咩要為難自己，我又唔係同自己過唔去?

"樂天知命"﹑"唔強求"……我係咪真係咁脫俗呀?我都係一個人嚟架啫。我有"喜 怒 憂 懼 愛 憎 欲"架…我……我都感受到有壓力架。

看了我都好開心

今日亞威表哥嘅email，佢post咗佢d結婚相上網。

我同一對新人咁熟，一睇就知d婚紗相影得好呀。不過，表哥就真係太削啦。我都係覺得之前大表哥d結婚相靚d，因為大表哥係做軍人架，所以佢好型，d結婚相都好靚，好型。

你需要我嗎

"你甚麼時候需要我?"

清早起床?! "我希望能輕吻仍睡著的你…"
梳洗時?! "我希望能替你擠牙膏﹑看著鏡中的你我一起刷牙﹑滿腔泡沫時往你臉上一吻，留下一個白白的唇印…"
吃早餐?! "我希望能一起喝著牛奶﹑吃著我煮的早餐﹑看著晨早新聞…"
電梯中?! "我希望能親一親你的咀﹑用力的抱緊你…"
乘車上班時?! "我希望能與你並肩以坐，把頭擱在你肩上，在擠迫的車廂中小睡片刻…"
工作時?! "我希望能有你為我遞上一杯熱茶，再說﹕不要太辛苦了…"
有問題解決不了時?! "我希望能向你撒嬌，你輕拍我的頭說﹕不要太急，一定有辦法的…"
疲倦時?! "我希望能有你替我雙手輕輕按摩，像很心痛似的樣子…"
食飯時?! "我希望能把我要吃的菜都點了，再把吃不完的飯餐都交給你，看著你食飯的樣子…"
戲院看電影時?! "我希望能在你的懷內取暖，不怕院內的冷氣刺骨…"
穿上漂亮新衣時?! "我希望能令你眼前一亮，把我一擁入懷，在我耳畔輕聲說﹕你好美!…"
熙來攘往的街上?! "我希望能有你拖著我的手，令我不會給人碰到…"
冬天的寒夜裡?! "我希望能鑽進你的被窩裡，把冰一般的雙腿放在你雙腳中間取暖…"
感動時?! "我希望能有你替我拭去眼淚…"
開心時?! "我希望能倒在你懷內哈哈大笑…"
……



還有很多很多，我想我不曾不需要你。
你也跟我的一樣嗎?

同亞fred hea埋個下晝

下晝，亞fred喺msn度"hi"咗我一嘢。我哋又開始一個下晝嘅chatting。

Start: "佢上個星期日去咗沙灘"
-> "去咗南丫島住咗一晚"
-> "去澳門玩"
-> "有無打算返大陸玩"
-> "大陸好恐怖"
-> "大陸d人成日都偷嘢"
-> "點解大陸人要偷呃騙"
-> "中國工人無保障"
-> "中國人人貪"
-> "讀書時嘅中國思想同現今中國思想"
-> "中國文革"
-> "咩係文革"
-> "文革同馬克思主義"
-> "咩係馬克思主義"
-> "點解中國人會贊成文革"
-> "中國人自古就貪"
-> "皇帝係貪嘅象徵"
-> "古代嘅貪官"
-> "最衰都係貪污"
-> "惻隱之心"
-> "虐待動物"
-> "性本惡"
-> "禽獸都不如"
-> "打算結婚"
-> "結婚後去定留"
-> "26歲係時候"……

無際無邊，暢所欲言……

同eric hea咗一朝

今朝早同Eric傾咗一大輪，唔記得講開乜嘢。後尾講講下，又講咗去我同小鵬有咩打算。講講吓，又講吓點解香港呢代咁難搵工。講講吓，又講吓去外國生活。講講吓，又講吓比d仔女去外國讀書。講講吓，又講吓我唔要自己d仔女係"香蕉仔"。講講吓，又講吓佢幾時可以識到女朋友。講講吓，又講吓佢嘅擇偶條件。

講吓呢，講吓路，咁我哋又hea咗一個上晝嘞。

影相潮

講開影相，公司呢排興起影相潮。早排林公子就買咗部相機，周圍去影。佢仲成日post d 作品嚟睇，又真係ok架。

放條link喺度比大家都一齊欣賞吓啦。

浪費咗一日嘅青春

今日PM sick leave，無皇管咗成日。但係亦都同樣悶咗成日。無嘢做，又唔知做咩好，足足就費咗一日。

今日唯一一樣有少少意思嘅事，就係搭車返屋企果陣，見到個好靚好靚嘅黃昏太陽。真係好靚。雖然我影唔到相，但幅相已經喺我個腦入裡。

有plan，有目標

上星期同Eric傾開，佢問我幾時會同小鵬結婚。我哋係有講過下，知道大家都有咁嘅打算，只係大家都仲未試過坐低傾啫。哎吔，咁人哋(即我呀)唔知點講嘛。

尋晚，我同小鵬兩個人去咗打邊爐。終於都算有時間坐低傾吓啦。
都唔係好記得係邊個講起先，好似係我呱。
我哋打算儲三年錢之後，先結婚。呢個係一個暫時嘅決定。可能會開到花結到果，我唔想大家都有壓力，呢個係我一直唔敢同小鵬傾嘅原因。我同小鵬拍咗拖就嚟三年啦，係最耐嘅一個。我好珍惜，同我會努力維繫。

今日interview

今日個interview in得唔好呀，係friend就唔好問啦。唔好再提起我d傷心事嘛。 ok?! 嚟啦，唔好再刺激我啦，我都唔係咁堅強架咋，好無?!

aptitude test (II)

上回講到﹕今年嘅七月廿二日，我去咗觀塘度做入境處嘅aptitude test。半個鐘做三十條題目，我做得唔夠快，夠鐘嘅時間仲差三條，諗住今次一定唔得……

打定輸數還打定輸數，但我始終都好希望自己可以pass 到個aptitude test，証明一吓自己真係有實力。我等咗半個月啦。我終於等到信。我今日收到信話我pass咗個aptitude test。今個月廿八日要去做fitness test。

又做fitness test呀?!我上次去懲教署做完個fitness test，d腹"肉"仲痛緊喎，又做呀，我覺得有d難得喎。

今次嘅項目同樣有五項，包括﹕蹲撐立 ﹑仰臥起坐﹑4x10米來回短跑﹑立定跳遠及800跑。又係每項最少取得一分，總成績最少取得十五分。

睇落同懲教署差唔多，但佢嘅計分就比懲教署嚴好多。今次真係有d驚啦。

你短期內無打算走丫嘛?!

今朝返工喺大堂見到彭sir，即係我條team個大佬啦。

佢一見到我就問我﹕"你短期內無打算走丫嘛?!見你呢排成日請假。"
我就梗係笑笑口答佢無啦。心諗﹕都未有人請我走得去邊喎。

唔知咁樣算唔算講大話呢?!

Fearless Interviewing

我今日收到個電話，叫我星期四去interview。因為有個舊同學喺果間公司做緊，所以問佢要注意d乜。佢講咗好多，叫我要一早好perpare定d HR 會問嘅問題。我話比佢聽我有呢個interview 恐懼症，佢就e咗本書叫"Fearless Interviewing"。係教人interview果陣要注意d乜啦，同點樣可以唔洗咁驚。今晚成晚都喺度煲緊呢本書，希望真係有用啦。

三個颱風

我係HKO個intranet度睇到而家有三個颱風係日本同台灣中間穿插緊。諗住將D一手消息話比我D friend聽啦，(講到尾咪又係八。)點知想send條 public url比佢哋睇嘅時候，發現原來係internet上面只係show 咗一個風咋。所以D 朋友仔就睇唔到三個颱風同時飛嘅景象啦。

唔知我可唔可以capture到三幅圖，再combine返做一呢。等我又試吓先。

亞媽生日

今日亞爸果邊d親戚嚟同亞媽慶祝生日。不過，我哋成十點半先埋位食飯。無計啦，爛賭嘛 (我都有份)。大家掛住打牌，都唔記得食飯。所以就搞到十點半先有得食囉。

我可以幫到小鵬呀。

學完琴同小鵬去咗佢舅父屋企整電腦。因為小鵬好肯幫人，所以佢d親戚d電腦有咩事都會搵佢幫手搞搞佢。

今次係上唔到網，(其實，通常都係呢樣嘢)仲有個window話check到佢唔係正版，叫佢買返個正版。

開頭小鵬以為因為check到係老翻，所以唔比佢上網。但佢諗住再install過個window嘅時候，隻碟又boot唔起部機。我見佢搞到嬲嬲地，所以就去幫吓佢手。我記得亞妹部機之前都發生過老翻問題，我記得佢都上到網架，所以我認為唔係老翻問題導致上唔網。咁我就叫小鵬check吓個router係咪真係operation緊。估唔到比我估中咗，個router真係hang咗呀。reboot過個router之後，就可以上到網嘞。

然後到老翻問題，其實佢都只係一個warning啫。ignore咗佢，大家眼不見為乾淨，所以……unclick個warning msg就算。今日嘅任務就咁就完成咗嘞。

點解我要記落呢件事，係因為我今日幫到小鵬解決問題，而唔係坐喺身邊無鬼用。 =)

鋼琴小妹妹

今朝早約咗華姐學琴，因為我之前將d琴書放咗喺小鵬屋企，所以佢今日拎返比我，同埋陪我學琴。 (^_^)

我哋上到華姐度，有個七八歲嘅小妹妹喺度學緊琴。我同小鵬就坐喺梳化等，同一路聽住小妹妹彈琴。我見到小鵬睇住個小妹妹笑得好甜。我都一早知道小鵬好鍾意妹妹仔，但我真係唔知佢鍾意得咁緊要啫。

好煩呀。

我要揀科啦。

佢有兩個theme，(1)Risk Mgt，(2)Statistical Info。

(1)要讀﹕Time Series Forecasting, Risk Analysis, Actuarial Statistics & Data Mining Techniques
(2)要讀﹕Multivariate methods, Survey Research methods, Statistical Data Analysis & Data Mining Techniques

(1)就比較大路d，對d銀行呀，保險呀同金融都有幫助。
(2)就比較偏門d，對d科研呀，醫學呀比較有幫助。

好難揀呀，不過我就有少少偏向揀(1)多d。我份人世利嘛。

1st Lesson of MStat Preparatory course

今日係第一堂嘅 Preparatory course。講明係 Preparatory course，內容就梗係一d學過嘅嘢啦。好似﹕Set notations and set operatios, Simple Probability and Conditional Probability, Counting (Combination and Permutation)

唔算好難，唔係唔係好記得啫。 =p

咁都比我中到喎

我今日要去做檢查，係最後一次嘅澰查啦。所以，要抽血去做化驗。但係喺抽血嘅過程裡面，有一件事發生咗。

同我抽血嘅係一個好有經驗嘅護士，之前佢都同我抽過幾次血，都安然無事。不過今次就……

我不嬲都知自己d血管幼，抽血係頗艱辛嘅一件事。但以前有個護士同我講過，叫我抽血或者捐血之前飲多d水，就會好d架啦。所以，我今日都飲咗成支水先抽血。同埋我其實好怕血架，我次次抽血或捐血拮手臂果下我都唔敢睇。今日都係一樣放好隻手就"may"埋眼擰轉面，點知今次超痛喎。真係好痛，痛到我嗌救命呀。跟住護士就話﹕"弊嘞！拮中咗塊瓣添。"相信所有理人都知我哋講緊邊塊瓣，無錯就係喺靜脈裡面，用嚟防止血液倒流果塊。咁都拮得中，真次真係要買六合彩囉。好痛呀，d血流咗少少出嚟就無再流。而個針窿周圍又開始腫起嚟啦。無辦法啦，唯有拮另一隻手啦。

就係咁，我左臂同右臂都有個窿啦。

一個人在書坊

今晚係星期五，我啱啱一個人睇完"魔盜王"，而家係書坊度等緊小鵬。其實，每個星期五小鵬放咗工之後都會陪我，但今晚我仲未見到佢，因為……佢去咗應酬。佢去咗同佢個老細食飯，而我就無去到，我只係一個人喺旺角度等佢啦。

講開"魔盜王"，如果有睇第一集嘅都唔會覺得悶嘅。因為佢都係承接返上一集繼續講落去。但我而家喺呢度唔可以講太多。因為遲d小鵬會同佢d同事一齊去睇，講晒出嚟就唔好睇架啦。都係留返遲d先講啦。

我仲未食晚飯，因為我要留返到肚同小鵬食宵夜，補數。 =)

後遺症……續集

做fitness test已經係一個禮拜前嘅事，可能係我無做cool down啦。我發現只要我
一舉起手，個肚兩邊就會痛呀。真係……麻煩呀。

Comment for "要幾變態有幾變態！"

我想比少少comment我舊同學嘅遭遇，但我喺佢個blog度寫唔到comment，但對我呢個八妹仔嚟講，我一有comment就要講，所以唯一辦法就係將個comment放喺自己個blog度。

你點可以由得佢走埋你身邊架?!你都已經睇到佢有問題，你仲點可以坐以待斃架?!我唔係要歧視佢，但佢要人尊重佢，佢都應該檢點吓嘛。果個人有咩企圖我唔知，我理唔到。但做女仔唔可以咁蝕將架。佢唔行埋嚟，你都要自動彈開d啦。你話我"蛇kwear"都係咁話，唔好話唔蝕前面，後面都唔蝕比佢呀，彈開d急步走添呀。做女仔要保護自己架嘛。今次就話佢只係手多多啫，如果佢喺後面"cool"住你，或者從後襲擊你，咁點算呀?!就算真係迫不得意要同佢擦身而過，佢咁多手就應該報警啦，唔報警都要鬧衰佢啦，唔鬧衰佢都要喝止佢啦，等佢唔好咁大膽嘛。佢試多幾次壯大咗個膽呀，都唔知會有幾多個女仔受害，同埋佢有可能會變本加厲呢。到時呢個妖怪就為禍人間啦。同埋你又無做錯事，唔洗怕佢喎。

真係呀，女仔要保護自己呀，特別喺無人可以保護到你果陣。

共勉之啦。

天氣轉﹑好易病

天氣時熱時涼﹑時濕時焗，好難頂呀。我今日仲發現自己開喉嚨痛。唉，千祈唔好病呀，拜託。第一﹕我唔想再請假，因為唔返工，無人工。
第二﹕病好辛苦架，我唔想自己咁辛苦呀。

不過，我呢兩日都覺得自己個身好"滾"﹑好"慶"。都係要飲返多d水啦。

持續超過廿四小時嘅3號風球

尋日interview返到屋企已經開始掛3號風球，今朝返到天文台見到斜路有棵大樹被風吹冧咗呀。棵樹好大棵架，都唔知要種幾多年先有咁大棵，被風吹冧咗真係有d可惜呀。

個3號風球掛咗足足超過廿四小時啦，都唔落波。出面真係好大風呀，好多嘢都比風吹到週街碌。其實咁大風點解唔掛8號風球呢?

Round Two 小插曲

我明明記得上次去做fitness test果陣，門口係有14號巴士經過架嘛。所以，係今日打住1號風球嘅情況下，一入到赤柱見到架14號巴士即刻彈上車。諗住得米，實唔會遲到啦。但係坐坐吓，司機你做乜turn right呀?赤柱監獄係left side條路直去喎。死勒!後尾坐我隔離個大叔話我聽架車唔入赤柱監獄架，叫我喺富豪海灣度落車，再等過車坐返出去啦。果陣時已經過咗13:50啦，我in14:10架。死啦，死啦，人影都無隻，唔好話的士呀，車都無架呀，下班巴士要等到14:05先開呀。死啦，我咪連in都無得in就被淘汰囉。

喺呢個叫天不應叫地不聞嘅時候，我見到有一架私家貨車，入咗去軍營果邊，無耐佢又出返嚟，仲停咗喺我等緊車嘅巴士站度。我見個男司機係度唔知揭緊d咩紙張咁嘅嘢，我以為佢送貨啦。但見佢好耐都無落車，再睇清楚d，原來佢睇緊地圖。我見自己又就快遲到，所以就膽粗粗走去拍佢車門，問佢﹕"先生呀，請問你想去邊呀?"佢答我﹕"我去赤柱監獄。"我見大家同路就打蛇隨棍上﹕"我去懲教署嘅訓練院呀，就係監獄隔離，大家同路，你可唔可以車埋我呀?"個司機見我著晒suit，同橫風橫雨都唔好意思拒絕我，就話﹕"好呀，你上車丫。"司機真係一個遵守交通規則嘅好人呀，佢駕車真係好安全，但我真係就快遲到，想叫佢開快d，但又唔好意思要求多多。望住車上面個鐘，14:00，希望趕得切啦。

但好彩都驚無險咁準時到埗，去interview啦。

有時都覺得自己幾好彩，如果唔係個司機八卦入嚟軍營睇吓，我都唔知可唔可以去到interview啦。

Round Two Fight

今日係繼上次pass 咗fitness test之後嘅interview(Round Two)。

我呢兩日都為咗呢次interview非常緊張，搞到自己有d心神恍惚。而臨interview之前仲發生段小插曲。

喺waiting room度等緊嘅時候都非常緊張。相反入到interview room，個interviewer一開始就用英文問我嘢，傾傾吓個人都定返d啦喎。佢問吓做咩做做吓IT唔做呀﹑喺以前嘅工作上學到d咩呀﹑又問吓我對恢復死刑有咩睇法呀……我覺得自己都算對答得幾流利。

但result要九月中先知，希望今次都能夠成功pass啦。

兩日之內遇到八次，我諗我哋有緣

如題。

我兩日之內，係唔同嘅地方，聽到容祖兒首"阿門"八次，(可能仲要多d)我又點忍心唔blog你去my space呢。

"……入夜後讓你我　說聲阿門　
記得我們落力結伴　
隨時隨地一雙成對
有心人不滿……"

草蜢精選草蜢

今日聽雲妮鍾情，佢有個環節係草蜢精選自己嘅歌比歌迷投票點播。

獲得最多票嘅歌係一首我久違咗嘅草蜢冧歌。好懷念呀，我仲記得我以前都好鍾意草蜢架。跳得丫嘛，就算d歌唔好聽，都有d嘢睇吓丫。

首歌嘅歌詞，我放咗係my space度。超正。

小三就講"I LOVE U"

尋晚同D大學同學去咗"豊泰廔"度食晚飯。Carrie 老師又講起佢教書嘅奇怪經歷。話說佢任教嘅小學有一個小三嘅女仔，鍾意咗一個小一嘅男仔，仲拍拖添。( 咁嘅開頭一聽就知個妹妹只係貪得意，想試吓拍拖嘅感覺啦。)暫且唔提我個人嘅意見住，講返Miss嘅做法先。佢竟然使用老師嘅權力，阻止兩個小朋友嘅來往，唔准佢哋一齊玩，唔准佢哋傾計。一句到尾，打壓兩個小朋友嘅戀愛自由。
我一D都唔贊成呢個做法。我只知每個人都有反叛性，你唔比我做咩，我偏要做呀，你吹得我脹咩。Miss嘅理由係佢哋咁細個，點知咩叫做"鍾意"啫，仲話一生一世喎。Miss既然你都話佢哋唔知"愛"同"鍾意"為何物，你又何必如此緊張呢。況且，你都唔知佢哋兩個諗D乜，你就打壓佢哋，嘩，佢哋仲唔借題發揮，Miss唔比，我哋偏要更轟烈﹑更不顧一切。我完全覺得後來兩個小朋友發生到Kiss嘅地步，某程度係Miss你哋迫出嚟。
如果我係Miss嘅，我唔會一嚟就打壓囉。我就當佢哋真係拍沲，我會覺得呢個係一個好好嘅機會教導佢哋。教佢哋點樣相處(無論人同人之間﹑定或情侣之間)﹑教佢哋有問題嘅時候，點去溝通同表達自己﹑教佢哋要識得尊重對方(譬如你哋D大人最怕發生嘅事上面啦﹑仲有真係唔好彩比佢哋經歷埋分手啦，你估個個都接受到分手嘅事實(比人拋棄嘅事實)架，……)﹑教吓佢哋點樣愛錫吓自己啦﹑比佢哋知道大人反對嘅原因，仲有大人最怕嘅後果。我會覺得呢個係最好嘅機會，比你哋D大人明白小朋友個心諗緊乜，同有機會同小朋友做個好朋友喎。
我唔會用大人嘅思想去套落兩個小朋友度。去了解吓點解佢哋會一齊呀﹑點解佢哋咁鍾意對方﹑或者點解咁鍾意同對方一齊呀﹑了解吓佢哋所謂嘅"鍾意"﹑"愛情"﹑"一生一世"係乜嘢呀……從旁指導吓，總好過say "NO"，你估你話唔比佢哋就會聽咩。你係人，唔係神呀。