2007年2月14日 - 情人節

2007年2月14日，即係今年嘅情人節，即係尋日。

原本無諗住要慶祝架，因為小鵬尋日要返學嘛。但我又想比個surprise佢喎，所以我就決定去接佢放學，同佢去食飯慶祝。但要同佢慶祝，首先要搞定auntie先，因為如果屋企留咗飯嘅話，小鵬就唔會出去食，就算食完先返去，小鵬都會比人話，呢樣我唔想。因此，我下晝就開始打比auntie，但屋企成日都無人聽電話，由兩點打到收工六點先搵到auntie。

戲肉嚟啦，係呀，戲份最多嘅係auntie呀。
我:"auntie呀，我係秀雯呀，你煮咗小鵬飯未呀?"
Auntie:"我買咗盆菜呀。"
我:"我諗住今日去搵小鵬食飯，比個驚喜佢添。(講到咁明，係希望auntie記得今日係情人節，有D情趣，可以識做。)"
Auntie:"個盆菜我預咗肥仔架啦。"
(-_-')咁即係佢無乜情趣啦。我:"咁好啦"
Auntie:"你都上嚟一齊食啦。"
(我都知auntie對我好，但係……)我:"小鵬今日要返學，要9:30先放學喎。咁我哋返到嚟咪好晏囉。"
Auntie:"我唔知佢要返學喎，你叫肥仔打比我啦。"
我:"哦，好啦，拜拜。"
Auntie:"拜拜"

咁我咪打比honey話佢亞媽搵佢。佢問我點解佢亞媽叫我叫佢打返去喎，我都無咁好氣，我咪話唔知囉。佢轉個頭就打返比我，問返我咩事。我咪忍唔住將我原來嘅計劃一五一十話晒比honey聽囉。咁佢話佢唔返屋企食啦，今晚同我食。

我哋跟住就係polyu去火車站條天橋度meet each other,then我送咗佢入大學，搭返車去沙田。但我一個人行咗一個鐘已經悶到爆。果度勁多人。我最憎條街咁多人，D人都唔知係唔識行，定真係睇我唔到，成日都撞到我，又唔say sorry，無D禮貎。所以，我都係打個電話比我個fd救命，不過佢仲慘，佢仲開緊工，話放工先再打比我喎。咁我又要一個人繼續行。

行到差唔多九點幾，小鵬打比我話佢放學，而家過嚟沙田搵我。我個fd都啱啱放工，同埋話咗比屋企人聽佢要出街食，所以大家就係沙田度join嘞。佢哋嚟到，我已經好肚餓啦，仲腳軟軟﹑腰骨痛添呀。好彩，我哋三個人，都好快有位食飯。三個人食咗四餸一飯，勁呀。一輪狂風掃落葉之後，開始傾計，發現大家都有好多唔明嘅地方，譬如:carrie點解註冊都唔叫我哋成班去觀禮呢?點解佢又註冊同擺酒唔一齊搞呢?點解佢無啦啦咁趕住結婚呢?諸如此類啦，所以我哋就搵咗我哋嘅百科全書嚟食雪糕，順便問個清楚明白。

原來百科全書今日去咗油蔴地學唱歌，返屋企順路出嚟傾計。咁我哋就一齊求知到十二點。一齊過咗個好好學，又好熱鬧嘅情人節啦。