連續三晚都只瞓四個鐘

以我D咁懶瞓嘅人一日起碼都要瞓8個鐘。但呢幾日實在有太多事發生咗啦。

我星期日晚因為要趕做功課，做到半夜三點，因為做到太夜，所以都唔知自己係咪做得啱，好彩星期一晚返學同同學對過功課，大家d答案都差唔多，只係有一條我唔識做，要問返個同學點做。

但果晚放學返到屋企，知道亞媽病咗，所以屋企無人煮飯，我就自己煮咗個都麵。之後，見到亞媽返咗幾日工，D衫都未得閒洗，就夜麻麻幫佢洗埋D衫，涼埋先瞓，又搞到三點幾。

星期二，終於都handover 晒D嘢，心情輕鬆咗好多，諗住夜晚可以早D瞓啦。點知食完飯，亞爸叫我幫佢捽背，因為佢話佢背後嘅雞翼位好痛，佢已經痛咗個幾禮拜，仲好似越嚟越痛。尋晚幫佢捽嘅時候，發現佢個雞翼位已經腫咗啦。仲不時痛到佢吖吖聲咁叫，仲連前面都痛埋一份。我最終迫咗佢去睇急症。因為我好怕佢唔係肌肉酸痛咁簡單，我怕佢係個肺有事。去到急症室，亞爸呢D不明痛症當然只係屬半緊急。但我點都要佢照咗X光，肯定只係肌肉嘅事，我先放心。見到平時好忍得痛嘅老豆坐立不安，就知佢一定係好痛。照完X光，醫生好詳細咁講解返，話亞爸嘅骨無事，可能只係肌肉扭傷。至於點解會連手臂都會酸軟，係因為腫咗嘅肌肉擠迫住D血管，所以供血有阻礙，導致到手有酸軟嘅感覺。咁醫生比咗D止痛藥佢，同打咗支針。打咗針之後亞爸成個人鬆咗好多，無咁痛lu。

返到屋企差唔多兩點，諗住沖完涼啦啦聲去瞓啦。點知亞妹又話佢要將佢整果個avi燒成VCD，但佢唔知要點整。由要我幫佢搞，由download software到燒埋碟，又搞咗個幾鐘。最後，四點半先有得瞓。

今朝真係唔想起身，照鏡見到自己個黑眼圈，發現自己成隻熊貓咁，真係慘。

其實今晚都唔知有無得早瞓，因為我星期五仲有份功課要交呀。