請假嘅最好藉口

香港嘅男仔有陣時真係好無責任感，我唔係單單指對女朋友，就算係對份工都係咁。

我聽過最荒謬嘅請假理由係:
下屬:"我2月15日要請假呀。"
主任:"你咩事果日要請假呀?"
下屬:"因為2月14日驚玩得太夜，所以要請定假。"

聽到我真係覺得不知所謂。之前果晚玩到幾點你可以控制架嘛。就算你真係控制唔到，真係比個女朋友捉住要玩得夜，唔係就分手，你第二日都應該返工啦，你個係你嘅責任嚟架嘛。你可唔可以同你女朋友講，尋晚亞媽要我幫手做家務做得太夜，我今日唔做你男朋友呀?!

你想做大情聖，同女朋友過個好浪漫嘅情人節係你嘅私事，但你唔可以將工作同你嘅私生活混為一談。你做得情聖就唔該你預咗辛苦，otherwise，唔該你自量吓，無咁嘅能耐就唔好搞咁多嘢。

一個二十幾歲嘅人，不分輕重，乜嘢嘅priority應該高D，乜係次要都唔識分。成日都用"我仲喺好細個架咋!"嚟做藉口，咁你咁細個不如返屋企等亞媽呵吓你啦。出嚟社會做事就應該有責任心嘛，咩都懶懶閒，有咩就話我唔知喎，我唔識喎……咁。唔知咪問，唔識咪學囉。你有手有腳有口有腦，你洗唔洗人餵你食飯呀? 況且，憑心以論，情人節唔係你一個人嘅節日，人人都會同男/女朋友﹑老婆/老公慶祝架啦，咁點解其他人又返到工呢?如果情人節真係咁嚴重就會變成法定假期啦。咪咁childish啦。