我唔算快

成日都比人叫我慢D慢D，係因為我細粒，所以感覺上動作比較快。最明顯就係之前去到英國，我個friend叫我唔動作咁快，佢話我D動作太快，嚇親D人。

但我覺得自己都已經唔係好快。點解我咁講?因為我知道呢個世界發生緊嘅嘢，比我仲快。譬如，我前一﹑兩個禮拜聽收音機，知道有兩個歌星拍拖，今日又聽到佢哋有喜，準備結婚。唔好講咁遠，講吓我身邊嘅朋友。我個friend online識咗個女仔，唔夠一年就話準備下年結婚，有無快D呀。

其實，我唔係驚訝呢D事嘅發生，只係我覺得點解而家每件事嘅過程都比人skip晒，大家都咁result-oriented。只求結果，不求過程。可能係時代唔同咗，人同人嘅聯系短咗，所以所有嘅嘢都快晒。因為D嘢發生得快，同一樣個時間上就可以發生多D嘢。換言之，D人越嚟越貪心。因為想喺一個有限嘅時間，試多D﹑做多D唔同嘅嘢。唔理啦，試咗咪得囉。全部嘢都水過鴨背，有幾多可以真係記得清楚丫。成日都聽到D人話嘥時間，時間唔拎嚟嘥，你想拎佢嚟做咩呀?你想將時間用嚟換咩呀?

我想享受吓時間，唔急唔趕，時間由佢嘥，relax吓。但……點解咁難呢?

趕功課

大學畢咗業都3年啦。為咗趕功課去開通頂嘅情況都同樣離開咗我3年。

尋晚佢又返嚟搵我啦。

Stat7003份功課比咗成個月，12月1日要交，尋晚先開始做。點解咁遲，因為我覺得我唔識做，不過，其實我連睇都未睇過，就覺得自己唔識做。因為我上堂唔太知佢講乜，咁我咪覺得我唔識囉。

其實我想講嘅係做緊功課嘅感覺，好趕好趕，同時間不停鬥快咁。呢種感覺好熟，做返一個細路仔嘅感覺。但又會好迷惘，又好緊迫嘅心情。

我都做到兩點幾，仲未做晒呀!!!!(+_+)

丟垃圾

你哋鍾意唔鍾意丟舊嘢架?我係一個超鍾意丟嘢嘅人，殘嘢丟﹑舊嘢丟﹑用過嘅丟﹑有D未用過嘅都丟。點解未用過都丟，因為我知道我買返嚟果一個月無用佢，一個月之後我就會唔記得咗佢，到我再搵返佢出嚟，我就已經唔再鍾意佢，唔會再用佢，佢只係喺度阻"訂"，所以我一搵返D咁嘅嘢出嚟，我一定丟。無謂勉強自己同D自己其實唔係咁鍾意嘅嘢一齊嘛。呢D嘢可以係衫褲鞋袜﹑可以係書畫用具……

我丟嘢係絕對唔留手，拎起佢，第一個感覺話比我聽我唔鍾意佢，一句"Oh, sorry。"佢就已經飛咗入垃圾筒。就係咁我啱啱個轉季就丟咗六﹑七袋衫。佢哋全部都係我擺咗喺度幾年都無著過嘅衫，所以我覺得我比足機會佢哋同我自己，只可惜最後都係緣盡啫。好嘥嘢呀呵?!係啦，我都覺。所以，我通常都會將D衫pack好，確保唔會有蛇蟲鼠蟻入到去，然後放喺收集垃圾嘅垃圾筒附近。點解唔放入垃圾筒，因為D衫會有D亞婆執去賣架。D衫我要唔著，都盡有人用得著。就連D大學嘅notes，我都係用同樣嘅方法，喺兩﹑三個星期前又丟咗四﹑五袋。紙品對D亞婆嚟講就仲搶手。

我咁鍾意丟嘢係因為我覺得唔用嘅嘢，再放多幾多年都係一樣唔會用。但只要我丟咗佢，有人會要佢，我又可以有新嘅。呢先可以生生不息。製造垃圾?!少少啦，但我又唔係年年都丟嘢嘅，我懶嘛，所以兩三年先會丟一次嘢。唔計上兩個禮拜丟嘅嘢，我再上一次丟嘢係我同上個男朋友分手，將所有佢嘅嘢都丟晒，，我唔會再有咩留戀(當然短期嘅都有嘅)，因為講得分手就唔會返轉頭，D嘢都即時變得無用。丟！而且，我要吉返D位出嚟放一D新嘢。

丟實物係咁，我諗我對一D感覺都應該係咁，丟咗佢。

非攻﹑兼愛

今日去咗睇"墨攻"，我覺得好好睇，因為完全唔覺睇咗兩個幾鐘。劇情我唔講，留返比大家自己睇。我好鍾意睇呢d講策略嘅戲，鬥智鬥謀。只係可惜再大嘅智慧，最後都係被利慾權位所攻破。最後墨家嘅思想，竟然係比一個奴隸一語道破，果然係旁觀者清。

墨家思想--"非攻﹑兼愛"。雖然我唔係崇賞墨家嘅思想，但我聽到嘅時候，真係有D覺得呢個係世界大同﹑世界和平嘅開始。一向我對錢嘅槪念都係覺得佢係一種用具，就好似紙筆墨硯，刀刀叉叉……無紙咪用羊皮用竹，無筆咪用樹枝用石頭刻……好原始呀呵?!但原始人係唔會殺原始人，唔會呃原始人，佢哋無文化，無學識，但佢哋有明辨是非嘅心。所以，我同意錢係萬惡嘅根源。但世界上每個人日日都係係咗呢件工具而營營役役，包括我。再者，呢個世界有太多人響往擁有﹑無論係錢﹑係權力……佢哋希望每個人都聽佢話，係佢控制之內。所以，列出數以千計嘅規條。

我好鍾意問點解，我成日都問點解問到小鵬怕。佢話呢個世界唔係咩都可以解，但我就覺得解釋唔到嘅嘢，即係無理由一定要做啦。咁即係可以唔做啦。不過我都覺得好矛盾，我問唔代表我唔想去做，只係我要知道做完會有咩後果，唔做又會有咩後果，我唔想做多餘嘅嘢。

仲有問點解有時我覺得係一種反思，你解釋到你而家所做嘅嘢係問心無愧，唔會傷害到其他人，或者你有另一個更好嘅方法去達到目的嘅，就要捨難取易﹑捨身成仁。我舊老細話我做嘢太快，同太lost啦。所以我就迫自己每做一件事之前都要問點解，直到真係清楚自己做緊乜為止。

可能我嘅頭腦唔係太靈活，太複雜嘅事，我好唔想去理。因為我鍾意化煩為簡，有咩嘢唔可以好簡單嘅解決呢。其實，最難解決嘅事都係要去控制另一個人嘅思想或者行為啫，當你接受每個人都係一個個體，有各自嘅思想﹑行動，而且平等，咁就會少好多煩惱。都係果句："好多事，算吧啦。"

時而勢逆﹑風水輪流轉

我成日都覺得自己肥。唔啱!係好肥先啱。因為我有個子唔高，但乜腩都有，胃腩﹑肚腩﹑五花腩……所以唔好同我拗，我真係肥。唔好同我計咩BMI，因為我係女仔。女仔嘅特點就係勁勁勁貪靚。我得157cm，但有成105磅。我計過BMI[體重(kg)/ {身高(m) x 身高(m)}]，我得19.36，屬於過輕。唔好單睇數字，因為數字係用嚟呃人。但我真係圓咕碌，所以我一定要減肥。

不過，我想講，我細過係好瘦架。但唔知點解而家又咁肥喎。成日都聽D瘦人講，話自己細個係好肥架。又話自己肥成點肥成點，但唔知幾時就開始瘦啦。乞人憎，我都想細個果陣肥，大個女瘦呀。你睇吓我而家，之唔係叫做"錯晒"囉。

我次次話要減肥，我亞妹就話我痴線。我話佢痴線就真呀。我只係唔想自己睇起嚟肥腫難分之嘛，有咩咁痴線喎。我都明白做運動係一個最好嘅健身方法，但要持之以恒嘅，我通常都做唔到，因為我怕悶囉，成日做死一樣嘢，真係好鬼悶架嘛。而我最鍾意嘅嘢，又唔係一個人可以玩到喎。唉，天"肥"我也。

只要一句就夠

有一件事，其實無急切性令我confused，但又偏偏自己諗得太到，搞到自己好迷惘。我send咗個mass email比我各個家族要員。大家大槪嘅意思，都叫我"做咗先諗啦。"﹑"而家唔係時候諗呢個問題呀。"……諸如此類。但事實，我係真係諗多咗，但諗多咗之餘，諗到一個位真係令我好迷惘。如果由佢唔理，我再做呢件事落去，我會無心機，無意志去做好佢。所以，我一定要解咗呢個心結先得。

收到各方嘅reply都係positive & supportive，但唔足夠令我心結打開。Until我收到Anutie Rainbow嘅email，佢只係提咗一句"no matter it is successful or not, you will have no regret."就係"regret"呢個字，摑醒咗我。諗咁多不如做，做一D唔會令自己後悔嘅嘢，又洗乜理佢嘅結局係咩，因為你喺過經中間已經得到更多。

感激親朋戚友嘅深切愛戴，雖然有鬧得我狗血淋頭嘅，亦都有循循善誘嘅，亦有簡單直接嘅……但全都係愛錫我嘅。Thank you.

作繭自縛

上個禮拜，亞妹忽然間問我佢部NDS點樣可以玩到"番梘"。老實講，我點鬼知喎，我又唔係喺黃金度做嘅。所以，我就同亞妹講，話幫佢問吓人啦。記得上一﹑兩個月去燒嘢食嘅時候，唔覺意聽到amanda同亞暉傾開NDS改機，所以我就走咗去問亞暉關於亞妹嘅問題。佢話去SSP GOLDEN改機都係卅蚊度，然後加個loader就可以玩"番梘"，再唔係買舊pass card同loader就得，咁就唔洗改機。

我一向都唔prefer改機，因為之前比人改過部PS2之後仲衰過未改，所以我希望有得唔改嘅都盡量唔改。就係咁我一心都好堅持唔改機，所以去到SSP，一路都淨係想買pass card同loader，別無他想。但行咗幾間問過，都覺得個loader好貴，因為亞妹要玩埋GBA，唔貴佢都唔要。兩樣嘢加埋差不多要成四舊水呢。但應承咗亞妹，都係要買架。決定買嘅時候，入到間舖頭，(其實間嘢都行過幾次。佢話要$270一個loader，我覺得好貴。點知其他舖就仲貴，有D仲無貨添。)佢用亞妹部機試比我睇嘅時候，部機read極都read唔到個loader，佢建議我改機。我本夾死都唔肯架，但佢又話改完之後，部機load少樣嘢會無咁食電，又話改機好快架咋，又話價錢又平D。就係咁我就應承咗改機啦。改完又真係即刻load到喎。都唔知係咪騙局，但騙局又無理由比之前比少咗錢架。

Anyway,咁亞妹部機就改完嘞。拎到返屋企，佢竟然同我講佢唔識入game喎。(-_-")你又話要玩"番梘"，唔識入game玩手指咩?咁我又要幫你係D網頁度搵吓點樣搞啦。搞咗都唔洗一分鐘就搞掂。我問亞妹你無上網睇吓人哋點教架咩?佢話無架。佢就係成日都要認叻，搞唔掂就推比我果D。真係有D比佢激死。

但係佢入晒Dgame之後，見佢玩得咁開心，我又心郁郁走去玩，之前兩晚都玩到好夜，尋晚終於都頂唔順，十一點半前就走上床訓啦。真係掘個氹比自己踩呀。

係人都會有錯，自己小心D

自從我張八達doo申請咗自動增值之後，如果我要係去屋企附近嘅地方買嘢，我好多時都唔帶銀包；或者就算唔記得帶銀包都唔怕，因為有八達doo就邊度都去到，食飯又唔成問題，只要去D大眾D嘅地方，就無死。所以就算個身無CASH都無問題。以前有個信用咭廣告話，"一咭旁身，世界通行。"而家我就覺得"一doo在身，香港通行。"

不過，八達doo方便就方便嘞，但係入數收你錢果個始終都係人。人係會有出錯嘅時候，正如今朝我去東海堂買麵包，明明個包都係$5.5，佢口口聲聲話"多謝五個半呀!請放咭上過咭機。"咁通常呢個時候個過咭機就會顯示5.5，代表佢會扣你張八達doo$5.5。但我今日放張咭上去嘅時候，佢竟然顯示咗$33。嘩，差咁遠。我正想縮返隻手同張八達doo嘅時候，可惜已經太遲。說時遲那時快，部過咭機實在係太過sensitive，距離成5﹑6cm佢都照doo。跟住就梗係同個收錢姐姐講啦，佢都見到自己收錯錢，所以即時比返個差額我。其實，呢D咁嘅doo錯錢都唔係第一次發生架啦。唔記得上次喺邊度又係用八達doo比錢，個收銀又收錯我錢，好彩我果日無恰眼訓﹑烏"sir""sir"同慒"剩剩"啫，所以都及時同個收錢講，佢又係比返個差額我啦。我清醒嘅時候，呢D事都發生過兩次，我唔清醒果陣都唔知發生過幾多次。所以，各位八達doo用客，doo咭前記得睇清楚呀。

其實，機器同電腦都信得過(因為佢錯咗，你都可以睇得返個log)，只係控制佢同指示佢果D人信唔過啫(因為無人會覺得自己會有錯)。

Andy's Wedding Photo Ablum - (1)

終於都有表哥結婚果日嘅相可以同大家share吓啦。

a)有我脅持我表弟同我影嘅相 - (1) & (2) [第二幅確實係有d猖狂呢!!!! = p]

b)有我被人夾返轉頭嘅"嬲"字嘅相 - (1) & (2) [你睇我d表弟高我幾鬼多，食乜大架? (-_-')]

c)兩男兩女，想合返做個"好"字嘅相 - (1) & (2) [連表妹都高我大半個頭，我食乜大架? (-_-")]

仲有，
d)唔少得嘅全體後生仔大合照 - (1) & (2) [唔好意思，中間偏left﹑高度同我差唔多﹑無咩頭髮果個係我姨丈，佢話佢都要埋嚟young吓喎。]

最後，
e)被迫一定要照嘅情侶相 - (1) [呢張未係最靚，仲有d再靚d嘅侶相嚟緊呀。 (^_^)]

係對你，定係我無信心呀?

今日晏晝收到Honey嘅sweet sms，好開心。亦都覺得好出奇，因為佢真係好少會係做緊嘢嘅時候send sms比我，除非有緊要事。今日佢send比我並唔係d咩緊要事，真係淨粹一個sweet message。

我係好開心，但亦都有d不安。呢個時間send message比我，係咪有咩事發生咗。通常我講得有咩事，我都唔會係諗緊d咩好事，因為我份人疑心重。呢份不安一直延續到我放工，仍然持續。一直到七點三，我一直等緊電話，Honey應該喺時候打比我，如果佢放咗工嘅話。香港人雖然係忙，但唔會忙到唔記得放工。況且，Honey係一個有節制嘅人，佢知幾時要做d乜。所以，我一直等，等到我無可等嘅地步，我打咗比佢。佢已經放咗工，已然返到屋企附近。聽到個心安落咗一半，但亦有一半唔開心。係呀，就係因為佢放咗工都唔打比我咁簡單，佢仲要同佢同事一起。你可能話我無理取鬧，但我可以話你聽，如果呢個世界嘅男朋友唔係要嚟比安全感我嘅，我係可以無男朋友。好似講得有d過份，但呢個係做我男朋友嘅基本要求。

不過我無嬲佢，我只係覺得我個心唔係好舒服啫。我唔知係我嘅不安全感太大，定係我以往嘅經歷令到我逢事都太上心，我好敏感，亦都過份敏感，尤其係不忠。我唔係話我Honey對我不忠，只係我唔希望呢件事再發生喺我身上。一個人對你做一d嘢hurt到你嘅事，係果個人有問題；但多過一個人對你做同樣hurt你嘅事，呢個就係你嘅問題。我雖然好自我中心，但我都識得自我檢討。但就係唔知幾時先應該講"唔好!"

只得一半

知道我個friend嘅blog已經寫到第500篇啦，覺得佢好勁，好creative，好得閒，口水多過茶。而我呢?我比佢早開始寫blog，但我比佢懶。我而家先寫到第二百五十篇，係我無時間每日都坐喺部電腦前去寫我個blog；係我懶得日日都抽一個鐘出嚟去打今日諗咗要打嘅嘢；係我覺得自己講嚟講去三篤屁，不如早d收皮上床"come"被；係我喺公司抽唔到時間偷偷打我嘅blog；我無記性通常都唔記得自己諗咗嘅嘢同想講乜嘢……做一件事只需要一個理由，唔做一件就可以無數咁多個理由。因為人係姓"賴"嘅。

有時d嘢係要處心積累架。

今日好想食

我今日忽然好想食tarumishu。

我不嬲都唔係好鍾意食嘢，但今日真係好想食。

(^_^) 等放工

我尋日放工無OT到，因為我好趕，我要趕住去銅鑼灣，做乜去銅鑼灣?!因為我想去接我Honey囉。我未到六點就走，去咗搭巴士，一路等一路驚，唔知過到去Honey會唔會走咗呢。等到六點三先有車，仲有少少塞車添。真係玩嘢嘞。好在我個電話都一路未響過，因為Honey一放工就會打比我，所以証明佢都仲未放工。

我六點半度就去到Honey公司樓下，見到有位坐，所以就坐咗喺度等。等到七點幾，Honey先至放工，但佢見唔到我喎。咁我就一直吊住佢尾啦，偷偷地跟蹤佢。果然，佢一轉角就打比我，我扮晒無嘢，問佢做乜咁晏放工呀?咁佢就講講講…就係佢講得慶高彩烈，我就喺佢後面彈出嚟，我見到佢比我驚到面容扭曲，佢仲話我嚇死佢添。

真係搞笑，笑到我死死吓。

結婚相

唔係我嘅結婚相呀，係之前表哥結婚，成班一齊影嘅相。有我脅持我個型仔表弟影嘅相，有姨丈左擁右抱美少女嘅相，仲有得我同小鵬兩個人嘅相等等…而咁多幅相，都講出咗一個事實，亦都係困擾咗我好多年，令我傷心咗好多年嘅事實，就係……就係……我係咁多個表兄弟姊妹裡面最矮果個呀(-_-)，仲要係矮一大截果隻呀。

我睇過嘅只係睇咗hardcopy咋，所以仲未有得post上網。不過放心，好快就有架啦。

我姨丈竟然話我同小鵬有夫妻相呢。
(^_^)係咩?!對得多，似樣咗D啫。

總算有嘢睇

搞咗好耐果個IWMP，終於都見到樣啦。可以喺同事部機到subscribe到msg，又識著閃燈，都算係咁啦。我都唔知幾驚佢早三個月就小產呀，而家係心都定D。

今日check email知道幾時要考試啦，係十二月十八同廿九日呀。我今日仲同我個PM請埋假去考試添。雖然，我只係讀part-time，考試時間喺傍晚，其實只要早走一個鐘就一定趕得切去考試，但我唔想考試前都仲要返工，姑勿論我放假喺屋企係咪溫書，但總算對住D書同notes。拎起手都有得見吓，remind吓嘛。但如果返工就唔係咁講啦，無得溫書不但只，仲無心機做嘢添。咁就真係浪費時間啦。

充實星期一至五

我呢個week真係過得好充實。
我除咗星期一﹑五放工返學之外，星期二﹑三﹑四都去咗練琴，每次都練成兩個幾鐘。我好比心機練架，因為華姐比咗兩首歌我練，我都練咗成三堂啦，都仲未彈得晒。雖然我今次都只係練好咗其中一首，同仲有D甩甩漏漏；而另一首就只係練到頭果三句，仲有一半未練到。但都已經好開心。我仲會練返隻手放鬆D，唔係就成"梳"蕉咁。

仲有，呢個week工作上都好開心。我一直都好怕做嘅工作，終於我都完成咗。雖然個project未完成晒，但都已經好開心。因為呢part好麻煩同我初頭真係完全唔知點做，好在而家都做得到啫。我就係咁架啦，份人好想去逃避一D我好怕嘅野，所以有好多嘢遲遲都未做。其實，我寫呢part coding嘅時候，心情真係好煩燥，因為我成日都同自己講我唔想做。對住D唔想做嘅又要做，我真係好忟。但今次唔知點解又會肯去面對，雖然都做咗兩﹑三日(因為覺得自己寫得唔好，所以寫咗一次半。)，時間長咗D，但總算做咗。都算係咁啦。

我喺個大學同學嘅blog，聽到佢唱歌班D同學唱嘅歌好好聽，搞到我都好想去學。我都想唱歌可以好聽D。唔係要做歌星，只係想自己鍾意嘅嘢可以做得好D。我成日都係咁諗，一係唔做，要做就做好D啦。我份人太三分鐘熱度啦，每樣嘢初初都充滿熱誠，但過一段時間又會淡晒，好似學樂器咁，我學過好多樂器，口琴﹑木童笛﹑單簧管﹑法國號。無一樣係學得長，最長都算係Clarnet，學咗兩年，但我覺得個亞sir教得太慢，兩年都未學低音同高音，所以無再學lu。雖然係入過school band，但係school band嘅優越感唔足以留住我繼續落去，所以我都係去咗打排球多過練band。所以，我都會有D怕自己學琴又係學到半桶水又放棄。不過，我希望今次會有例外，因為我由細到大都好鍾意彈琴。丫，講返學唱歌，我又好鍾意唱歌，所以又想去學啦。正如我亞媽話我係一隻火麒麟，週身癮。我諗我只係坐唔定，同鍾意貪新鮮啫。

我個friend又作咗首歌啦，佢上次要我幫佢寫伴奏，但我做唔到。今次佢要我幫佢寫歌詞，好多謝佢無嫌我漏漏肺肺，仍然搵我幫佢手，我都想幫佢寫到一段好嘅歌詞，唔想搵"窩"佢首歌，因為首歌真係幾好聽。但佢要我寫廣東話，著實係有D難度，因為我覺得廣東話都幾粗魯，想寫得D詞靚D我諗我係需要D時間。Anyway，希望唔好辜負佢嘅期望同佢首歌啦。

3 Nov 2006

上星期五請咗半日假去參加表哥嘅婚禮。對呢個禮禮期待咗好耐，除咗為一對新人開心之外，仲有機會比我哋一班表兄弟姊妹再圍埋一齊，真係令人雀躍。

雖然果日都依然唔可以齊晒15 個表兄弟姊妹，但都到齊咗11個，都算唔錯。

席間，型仔表弟表演魔術，令到成圍枱拍爛手掌。

仲有，大隻表哥。

最後，仲有係人都唔認得嘅我，就連對咗我廿幾年嘅細妹都唔認得我。

緣份的來臨

我從來都唔信long distance嘅愛情，因為我對自己無信心；同時，我亦都唔會太輕易的跟一個人拍拖，因為我要保顧我自己，唔熟嘅人好難會令我心動。(不過，亦有一次例外，我都亦都有生平第一次亦係唯一一次嘅一見鍾情。)

但我呢個friend確實証明了一件比我睇，認識時間嘅短，兩人身處嘅距離，完全唔可能阻止兩個人嘅愛情。佢哋嘅愛情故事，令我嘩然，但我亦都替佢哋高興。世界上幾十億人中，兩個分隔兩地，各不相識嘅人，係乜嘢令到佢哋走埋一齊?係乜嘢令佢哋可以認定對方，廝守終生?

愛就係有一個人不經意走進你嘅生活，令你生活泛起漣漪，而你又剛巧察覺到呢個小小嘅波浪，令你對佢有所留戀。就這樣，兩人就走在一起。不能解釋，不可理喻。

我羨慕有d人可以不顧一切去愛，我羨慕有d人可以排除萬難去愛……其實，我最羨慕的係平平淡淡﹑細水長流嘅愛。畢竟年紀漸大，太轟烈﹑太激情的都唔太適合我。我要搵嘅係一個可以互相扶持的人。我好鍾意"張敬軒--Hurt So Bad"裡面一句歌詞，"只要我們都愛著，無論多苦都值得"，有咩比一個可以同你甘苦與共嘅人更值得愛?!"為大家嘅將來共同努力，只要可以同你一齊，再辛苦嘅嘢都唔會怕"，有呢個心你就值得愛了。

Blogger嘅錯

我明明寫好晒去浪茄嘅blog，但因為upload唔到d相，所以仲未有得睇。激死我啦。
喺呢度post 住條link先啦。
<<浪茄之旅>>