浪茄行山(6)

行到萬宜水庫東霸差唔多17:15，亦都接近呢次行程嘅尾聲。

今次嘅遠足，我影到幾幅我嘅傑作呀。靚唔靚呀? =)

浪茄行山(5)

然後開始食嘢，同玩水。個海灘水清沙幼，果日仲好大浪呀，有個浪"come"過咗個鬼仔個頭添。


又有好多人游水，仲有三點式嘅靚女走嚟走去。


我仲發現一隻蟹仔呀，你見唔見到呢?! =)


15:30我哋開始行啦，由沙灘第二邊行返上出。上到山一半，再望返轉頭嘅沙灘。真係好靚。

浪茄行山(4)

行到近海灘，有個平地有好多蝴蝶架。真係好多，圍住你周圍飛。

行到海灘14:00度，影返張全體相先。

浪茄行山(3)

行過咗二個山頭終於再有一個涼亭抖抖啦。我哋就係喺呢個山頂行落嚟架啦。

再起程，Honey已經行到成個人濕晒。

睇吓，距離個目的地又近D啦。

浪茄行山(2)

行咗三分一，大家都開始行得疏疏落落。大殿後嘅亞暉，落後咗一小段路啦。

上上落落咗幾次，終於都望到我哋嘅目的地啦。

再ZOOM埋D睇吓。

望返轉頭，我哋原來行咗個多山頭啦。

浪茄行山

我哋尋日去咗浪茄行山啦。仲影咗好多相呀，好靚架，我話嘅。

介紹吓D隊員先，有先頭部隊Eric，我嘅私人補及隊我Honey，特別應變部隊筋肉人亞fred，實地大隻攝影師Roy，殿後休閒攝影師亞暉，同埋今次行山嘅發起大美人Amanda，同我。

我哋由11:30左右喺西灣出發，初初一段微微起伏嘅羊腸山路仔都行得好舒服，仲遠眺到大浪灣嘅景色。

但行吓行吓，越嚟越多上山落山嘅山路。條條路都好似呢條咁，呢兩段路已經係好好行果條 啦。

考慮中的 <<浪茄行山>>

嚟緊星期一係公眾假期，大學同學仔話去行山喎。我本來都無咩所謂，去又得，唔去又得。不過，睇完Amanda個blogger入面果D講浪茄嘅link，見到D相又真係幾鬼靚，搞到我都有D心動想去。趁住呢排天朗氣清，我都好想去吓郊外行吓，因為真係好耐無戶外活動過。而且，我仲想影吓相，影吓一大班朋友嘅相，影吓風景嘅相，影吓東影吓西。發覺自己無影過D生活相都一排，好多日子發生過嘅嘢都唔記得啦。想趁今次影返D呢。

不過，唔係我話去就去，我都要顧及我另一邊呢。小鵬呢個星期日要去拜山，我唔想佢假期都咁辛苦，連繼去兩日都係行餐懵。所以，浪茄之旅參加與否就要睇我Honey頭啦。佢攰嘅就梗係唔去啦，不過如果佢頂得順嘅，我都會好想去，至多我沿途照顧返佢，唔會顧住自己玩，同整定D愛心lunch比佢食囉。(著實唔顧住自己玩係有D難度呀。)

你鍾意佢d咩先呀

你鍾意一個人，你會首先鍾意佢d咩先呀?

我呢兩日發現，我鍾意一個人，首先會鍾意佢嘅笑聲先。換句話講，如果我唔鍾意聽果個人嘅笑聲，我係唔會鍾意果個人。但如果果個人嘅笑聲會吸引到我留意佢，而我又覺得聽落都幾好聽，我就會開始留意呢個人，好鍾意聽佢嘅笑聲，成日都想見佢笑。就係咁，好容易就會鍾意一個人。

鍾意一個人就係咁簡單。

改緊嘅唔好習慣

我有個習慣而家一直喺度戒緊，就係"轎"腳。

我好鍾意"轎"腳，唔係左腳搭右腳，或者右腳搭左腳咁簡單，我直頭係將兩隻腳扭埋一齊呀。搭咗隻腳上另一隻腳之後，仲要再由被"轎"隻腳後面再"轎"返出嚟。係咪"轎"得好過份呢。不過，成日都聽到"轎"腳對backbone唔好，所以我決心要改。因為我唔想做D對身體唔好嘅嘢，所以我要改﹑改﹑改……

不過，我要成日都提住自己呢。

胃口返晒嚟啦

我上個星期成個禮拜都無食過一餐 lunch，食兩啖又無胃口，次次都淨返一大半。今個禮拜頭，開始食水果餐。但今日亞媽又話 lunch食返飯，我開頭都有D驚，會唔會又食唔晒，浪費晒D嘢呢。

好在今日返工勁多嘢做，勁用腦，所以lunch未到已經好肚餓。結果今日個 lunch 係食得晒嘅。不過係我執晒嘢，準備擺返個 lunch box入去個袋度嘅時候，發現今朝個蛋撻仲未食。-_-"咁咪即係又食少咗餐，巴鬼。

撒嬌唔啱日子

尋日我好想搵人撒嬌，所以咩都唔理，連琴都唔練，一放工就即刻去搵小鵬。原本諗住可以撒嬌耐D啦，因為小鵬又唔洗返學。點知食完飯，小鵬同我講佢要返屋企做功課。乜佢唔係前晚就要交架咩?我問返佢："你唔係星期三要交啦咩，做咩尋晚唔交呀?咁咪遲交囉?"佢就同我講："今日咪星期三囉，所以最遲今晚交囉。"然後佢就笑笑口同我講："你梗係唔記得今日先係星期三啦。"又比佢知道我咁大懵添。

最後都係放咗佢走，無得撒嬌lu。

Surprise Birthday K Party

正如上一篇blog所講，尋晚同表妹們同亞姨們去唱K。適逢尋晚亦都係我亞妹嘅廿六歲生日，梗係要慶祝一吓啦。我哋去咗糖街嘅CEO度唱K，因為我唔知有幾多人會去，所以一路都無book到房。我諗住去度再話佢聽都可以有蛋糕同香檳送，因為之前我個fd都有。但個receptionist同我講，我無訂房所以無蛋糕同香檳送…… -_-"我車……

但我又唔想就咁就放過亞妹個生日，所以趁亞妹未到，就同D亞姨商量，最終決定亞表妹買蛋糕。而我又好搞嘢咁同亞妹講，間karaoke無蛋糕送喎。亞妹就梗係話唔緊要啦。咁佢就完全無心理準備。當我哋再拎個蛋糕入嚟嘅時候，佢面都紅晒，極之尷尬嘅樣呀。

無心機

我今晚約咗D表妹去唱K呀。

因為亞叻叻表妹，好耐無返香港架啦。佢而家係加拿大嘅Waterloo度讀緊IT，佢話好辛苦呀，因為好多功課，好忙，仲要讀五年，要到2010年先至畢業。佢話佢想讀完書會返嚟香港架 ，因為佢好鍾意香港喎。　

講返無心機，因為有得去玩，我就梗係無心機做嘢啦。就係咁囉。

好返都係咁

其實，我已經好返咗好多架啦，都無咩再咳同流鼻水啦。

不過，我都仲係無咩胃口，所以我lunch就無帶飯，淨係帶生果。由尋日開始就食生果宴嘞。

希望快D有返胃口啦，真係唔想好似前幾年咁成日都唔想食嘢呀。

一公升眼淚

已經係第二個星期啦。自從上個星期無線開始播呢套<<一公升眼淚>>，今晚係第二晚訓唔著。每次睇完都會覺得個心好唔舒服。由真人真事改編，套戲係講個十五歲嘅女仔，患咗脊髓小腦變性症。小腦會不斷委縮，然後四肢嘅活動能力開始唔協調，而且寫字同說話嘅能力都會慢慢失去……

我唔只覺得呢套劇好感人，我仲發覺自己開始怕病，同怕死。我好享受而家嘅生活，雖然未至於乜嘢都有，但亦算無咩缺少。我有屋企人，家庭生活講唔上豐衣足食，但都算係有瓦遮頭衣食無憂；我有我愛嘅人，亦希望會有自己嘅幸福家庭；我有一班我好鍾意嘅朋友，好想可以經常同佢哋嘻嘻哈哈。

我好怕會失去呢d咁美好嘅嘢，我仲有好多地方想去行吓，睇吓。我仲好想睇到千千萬萬個日出日落﹑月圓月缺。我亦想可以喺亞爸亞媽年老時照顧佢哋，想可以見到亞妹獨立自主，想可以見到每個朋友都開心快樂，想可以有自己嘅小朋友……我對未來仲有無限嘅憧憬。

最新買嘅CD

尋日終於都買咗張敬軒嘅<<笑忘書>>。聽咗佢嘅"餘震"同"老了十歲"之後，覺得好好聽，所以我決定一定要買。

其實真係好耐無買CD，對上果次係側田第一隻CD。買嘅原因都係覺得佢唱得好好聽。

---------------------------------------------------

除外上面提到嘅兩首歌好聽之外，仲有呢幾首都一樣超正。
->笑忘書
->病況
->第二次愛你

唔錯嘅都有：

=> 騷靈情歌
=> 兩座位跑車
=> 不能不見

=> 遇見神

星期一帶咗隻碟返公司聽，借咗比Jason聽，佢都讚呀。佢咁醃尖都讚，張敬軒真係得呀。

Simon哥哥結婚啦

以前做placement果度，有個哥哥好好人，佢結婚啦。

佢仲比咗佢d結婚相我睇，http://i-do.i-do.hk。
影得好靚架。

By guess 都係answer?!

今日挀咗個test，成績唔好。

tutor講返d answer嘅時候，有一題我諗極都唔明嘅題目，佢竟然同我講個answer係by guess咁估出嚟。咁我問佢how to prove my assumption。佢竟然話唔洗prove。唔洗prove?!你話係就係呀，証據呢?你點計數架，數係要証明架嘛，你話咩就咩，你大d呀。呢個世界仲有真理嘅。咁洗咩要theroem呀，guess咪得囉；洗計數機呀，guess咪得囉；洗咩讀呀，guess咪得囉。講d嘢都無point嘅，傻架。

我嘅星座係…

今日Jasom切蛋糕果陣講開，22號通常都係星座最尾果日，佢係天秤座最尾果日，我都係巨蟹座最尾果日。不過，事實上，我都唔係好知自己係咩星座。有時見到自己係巨蟹，有時見到自己係獅子。

我起初都唔係好鍾意巨蟹座，我唔鍾意巨蟹座嘅賢妻良母型。以我咁惡嘅性格用母愛洋溢嚟形容我，有d作嘔。而且，我覺得蟹好無用，都無人會怕佢嘅。我唔係要迫自己係獅子，只係我唔鍾意自己咁溫和啫。

但隨住知識嘅累積，我發現原來所有巨蟹座嘅人都係外剛內柔，講得白d，鯃魚頭老襯底，得把聲。除咗個硬殼，隻巨蟹就咩都無。所以蟹有遇到襲擊會選擇匿埋，要到退無可退先會出擊。著實呢d都唔似我嘅作風，所以我好懷疑自己係咪真係一隻蟹。

不過講到尾，我都有一樣嘢同巨蟹好似嘅就係好情緒化。我有一日聽雲妮鍾情嘅婉婉星情，有一個巨蟹座嘅女仔，打電話去話佢好容易會對男朋友發脾氣，男朋友做咩都唔順眼，成日都覺得個男朋友唔理自己。如果佢發脾氣，男朋友唔去氹返佢嘅話，佢會覺得個男朋友唔鍾意佢；但如果男朋友走嚟氹佢，佢又會三分顏色上大紅，變本加厲再發勁d，完全失去理智。如果男朋友唔聽自己話，自己想要嘅嘢，男朋友做唔到，成日都覺得好委屈，個男朋友都唔知自己想要乜。

佢簡直就係講中晒以前讀書嘅我呀。果陣時我一日一小發，兩日一大發。係人見到我都驚，見到我好似見鬼咁。我都開始明白點解Billy會頂我唔順，我都頂自己唔順呀。我仲記得有一次我發好大脾氣係我唔鍾意食pizza，但果晚去到佢屋企，佢屋企人食pizza喎。我咪嬲囉﹗我嬲佢唔之前打個電話比我，我諗住同佢一齊食飯，但佢哋又食pizza，咁即我無得食啦。無得食唔係個問題，個問題係你無比個預算我。我唔鍾意失去預嘅感覺，我鍾意每樣嘢我都要知。知就得架嘞，需唔需要我，有無我份都好閒。講返果日，我去到Billy真係好嬲佢，所以粒聲唔出，開門就走。佢喺後面好大聲咁叫我，我都無理過佢。

佢話我做人好絕，尤其係對佢。我認我果陣對佢真係好似軍訓咁。但你千祈唔好問我點解咁對佢，我真係唔知點解。可能係人夾人呱，我咁多個男朋友都唔會咁。

所以，我又開始越嚟越覺得自己係巨蟹座，因為係唔係我都會箝住人唔放。

預祝生日

今日同一個同事預祝生日，我lunch果陣走咗去買個生日蛋糕。因為大家都有食lunch，所以我就去搵個半磅嘅蛋糕。終於比我搵到，一個半磅嘅tarumishu。(仲好好食添呀。)

但我返到公司先諗，我究竟有無記錯呢?佢係咪同我一樣係22號生日呢?死嘞，但我又真係好似記得係喎。所以，我就用msn去試探吓佢。好彩，我無記錯佢真係22號生日，如果唔係我就要拎個蛋糕返屋企食啦。

我仲諗住會有個好大嘅surprise，試探完，咩surprise都無晒lu。我仲要漏廢到唔記得買紙碟，要周圍班返嚟呀。好在二樓茶水部有咋，唔係大家真係用手"那"嘞。

再喺度講多次啦!Jason，生日快樂啦。短期嘅，就祝你可以快d有假返澳洲渡假啦；長遠嘅就祝你快d搵返個女朋友啦。你太瘦啦，生返多d賤肉先得呀。

生病一星期

由星期一開始就一路病，我完全知道自己點解病。唔係我食錯嘢，太辛苦或者唔夠訓，而係上個weekend小鵬病嘅時候，我自己懶叻咁走去照顧佢，搞到d感冒傳染埋比我。小鵬就病一日，我就病一個星期。好似無咩時間係清醒。

本來我好唔想食藥架，我唔想d chemical留喺身體入面，都唔知幾時先可以出返嚟。食得太多藥，反而身體就越差，我唔想咁樣，盞搞到成日都好易病。

呢個禮拜都未食過一餐好，我呢個星期帶嘅lunch都無食過。次次都係扒兩啖就無胃口唔想食。夜晚食晚飯又唔多，頂多都係半碗，屋企人扒咗幾啖，我就己經食完。但又完全唔覺得肚餓，聞到飯香都唔想食。病還病呀，咪學人厭食呀，厭食無藥醫架。

小病是福，病咗一個星期，食得果少少，都仲要無瘦到，唔知算唔算係小病呢?

白費心機

我上個禮拜無練過琴呀，因為今日要test。我咪用晒d時間溫書同做埋份assignment 2 囉。
但我犧牲咗成個星期，都仲未溫得晒d tutorial。就係咁，我最尾一條廿分嘅題目就唔識做嘞。哎吔廿分架，真係唔抵呀。都話要睇晒d tutorial佢架啦。真衰。

好激氣呀。

頭大有腦

今日睇報紙話，一歲嘅小朋友如果個頭圍大，就表示佢哋比較聰明。我覺得有D荒謬。

因為我覺得呢個世界所有都係學返嚟，無人一出世就會做得駕車﹑駕飛機同起樓。所有嘢都係學返嘢。你覺得一個小朋友比其他小朋友叻，係因為佢知道同做到一D其他小朋友唔識，或者唔會做嘅嘢。但咁只係証明呢個小朋友嘅見識比其他小朋友多，你可以話呢個小朋友IQ高，因為IQ嘅計法就係睇吓你相比喺同一GROUP嘅人裡面，你識嘅嘢係多過大多數人，定係少過大多數人。亦因為講緊就再唔係小朋友天生聰唔聰明，而係父母比小朋友睇到幾多嘅世界。

除咗佢哋睇到世界嘅幾份幾之外，仲有就係佢哋應用到幾多呢。一個人見過好多世面，但所有嘢都係水過鴨背，轉過頭又唔記得。咁就真係巴鬼嘞。所以一個人聰明嘅人，應該要計埋佢見過嘅嘢應用到幾多出嚟同佢記得幾多嘢。計頭圍係會知道個腦有幾大，但你比一個好大個頭嘅細路日日都只係留係屋企唔出街唔睇電視唔教佢嘢，佢都唔會叻得去邊架咋。

入錯行

我成日都諗我自己究竟有無入錯行。我唔係好鍾意寫program，之少我唔會成日去研究D甚麼language同甚麼technique先啦。我都唔明自己做乜鬼讀電腦，人揀我揀呱。

其實，我果陣好想讀數學。揀科之前，同D舅父亞姨傾過，佢地知道我想讀pure science，面口都變埋。舅父仲話，讀乜鬼數呀，讀完出嚟做咩呀。又係呢個問題。點解佢唔係問我鍾意乜，而係問我之後可以做乜架。我咪唯有向住讀完出嚟有咩做嘅方向去諗囉。我都有問我亞妹意見，我亞妹都係問，讀完數你想做乜呀。我隨口話教書囉。佢同我講，"教書?!你個樣咁串，教間BAND 5嘅學校，我驚你會比人打，兼淋你便便喎。教間好嘅D人又嫌你無料到。"

最終，點解揀電腦，係因為我姨丈係電腦強人，我諗住有靠山，第時唔掂都有人問。就係咁，我今日就坐喺呢度。

但今時今日嘅我，無因為讀完電腦以對佢有興趣。我完全明白今時今日電腦係生活嘅必需品，而我又未之於對電腦有排斥。但要我坐喺度一日最少8個鐘，係咁打program，我真係覺得好悶。我鍾意做一條3頁紙嘅數多過，寫3個class。我完全無動力想去開始寫program，雖然我都有試過開始寫program唔想停嘅時候。但無車匙去"TARK"著架車，架車又點會去呢。

我係咪真係入錯行呢。定係學我舊老細話齋，我只係太懶呢?我條車匙喺邊呀，同埋我呢架究竟係咩車嚟架?撞鬼。

過大禮

尋日表哥佢哋過大禮，唔知Ｄ咩習俗，話一齊食飯喎。乜過大禮唔係表哥同表嫂兩家人嘅事之嘛，我老表嚟咋喎。不過，亞姨叫到就算啦。仲話要叫埋小鵬喎，咁咪又叫埋囉。

其實食飯無咩問題，但個問題係話咗八點食，前兩日又同我講食八點半，尋晚等到八點幾打比亞媽（原來亞媽係大姨屋企打緊牌。），佢話食九點幾。唔係呀，又改時間。我好肚餓啦喎。點知尋晚小鵬又要返去mon住個system，唔可以咁夜走。諗咗一陣，都係決定唔等，我哋自己去食完嘢就走。當我打比亞媽話我同小鵬唔去食飯嘅時候，佢話我哋而家咪嚟緊囉，要等齊人先得架嘛。

佢唔講都無咩嘢，佢一講完，我就火都嚟。你要等人，你明知D人係要咁夜先嚟嘅，你做咩唔一早講我知呀?遲嚟嘅要食飯，早到嘅就唔洗食飯呀?而家係早到嘅人有問題，定係遲到嘅人有問題呀?你知唔知浪費D時問係等人係幾咁浪費呀?你就梗係無所謂啦，你掛住打牌。

我話咗我唔去，我真係諗住唔去架。但小鵬覺得唔好，佢話陪我去一陣，坐到十點度走。點知我哋坐到十點先開始食，你話呀，呢個世界有咩係信得過架。

你的日子如何，你的力量也必如何

有一個廣告我好鍾意架。

"我叫龍和鶱。
無電視果陣係日頭，做成龍果陣時係夜晚。
我比人強嘅係我唔怕黑，但我同其他人一樣都係凍嘅。
我希望每個人都識跳呢隻開心舞啦。
我淨係識呢d架咋。"

片尾列出，呢位女孩八歲開始失明嘅字句。

我好鍾意佢果句"我比人強嘅係我唔怕黑，但我同其他人一樣都係凍嘅。"同最後旁白嘅一句"你的日子如何，你的力量也必如何"。我覺得好有意思呀。從一個積極嘅角度去面對一個困境(或者係失敗)，傷口都會易d痊癒。佢有別人未經歷過嘅痛苦，但佢成功克服，仲比其他人做得好。但佢都只係一個普通人，佢都有住其他人嘅感受。既然唔想發生嘅事都發生咗，大家又無能力去改變呢個事實，笑住去接受，總比喊住去接受好過。如果每件事都咁如意，人生就失去咗佢嘅意義。我相信我用最開懷嘅心去面對未來，未來都係一片光明。"希望在明天丫嘛。凡事係無絕對嘅。生命滿希望，前路由我創"嘛。

話雖如此，但我都仍然係一個眼淺嘅人，喊我一定會喊，但我希望可以好快再次笑返。

心型圈

最近又鍾意咗呢首歌，係蔡依林嘅歌，一首唔會"fing"甩頭嘅慢歌。好好feeling，好講到我而家嘅感情感覺。仲有，首歌中間有一段超正嘅鋼琴solo，真係超正。呢段solo亦都係我鍾意呢首歌嘅其中一個要原因。

＊我送上初戀　在你的面前　
再將我愛你溫習　一遍　
我無法收斂　對你的思念　
若愛有風險　我寧願中箭　

那一年春天　愛發芽蔓延　
我們故事　顏色鮮艷　
我將愛完全　花在你身邊　
對愛糾纏很明顯　想膩在你的房間　

觸電的瞬間　同一邊　
肩並著肩　黏你　臉靠著臉　
看著照片　傻笑了好幾遍　
許願　畫十字在胸前　
閉眼祈禱夢會實現　

呵氣在玻璃上面　畫心型的圈　
霧漸漸不見　你終於出現　
聽不進勸　對愛死心眼　
希望這趟愛情走很遠　

我用我指尖　畫心型的圈　
然後碎碎唸　想像你聽見　
空出時間　默背你的臉　
認真翻字典查我們的永遠＊
REPEAT＊

睇返，作詞嘅係方文山，真係得呀。

日節日 & 夜節日

我成日都覺得節日係有分類架。除咗分中國節日同西方節日之外，仲有日節日同夜節日之分。就好似中秋節咁，就係一個夜晚日，因為大家嘅慶祝節目都喺晒夜晚，我估都唔會有人日光日白燈籠同點蠟燭架，傻架咩(但我又好似試過喎，中六果年嘅中秋節，咪喺班房度熄燈拉窗簾點蠟燭玩燈籠囉。)所以中秋係夜節日。仲有d咩節日係夜節日呢……除夕啦，因為要到夜晚先有得倒數架嘛，所以係夜節日。年卅晚啦，要夜麻麻行花市先有氣氛，仲要幫亞媽執屋﹑整年糕﹑封利是﹑最緊要係一到十二點即刻同亞媽講恭喜發財逗第一封利是嘛，所以佢絕對係夜節日。年初二啦，因為要睇煙花嘛，所以佢係夜節日。平安夜啦，話明係夜丫嘛，梗係夜節日啦，日光日白ｄ女又唔會比仔冧得掂，ｄ仔見到ｄ女個樣又唔會埋去溝啦﹗一定係夜節日呀。聖誕節正日都係夜節日，（不過，呢個純屬個人意見）因為我成日都覺得聖誕應該係一個”個地佈滿白色嘅雪，個天又落住少少雪，條街得一ｄ好疏落嘅淡黃色街燈，同好多掛滿聖誕燈飾嘅聖誕樹。出猛太陽點睇燈飾呀？！所以，聖誕都係夜節日。

咁有咩係日節日？！多囉！有大年初一﹑復活節﹑端午節﹑香港特別行政區成立紀念日﹑清明重陽﹑Boxing Day，佢哋全部都係日節日。大年初一就梗係一早去拜年逗利是啦，端什節就要扒龍舟，香港特別行政區成立紀念日就要去遊行（夜麻麻遊行，特首都去訓啦。仲點會理你丫。），清明重陽就要去拜山（拜山就梗係日頭去架啦，點知夜晚會見到ｄ咩架）。Boxing Day喎，拆禮物一定要日光日白做啦，睇係ｄ人送咗ｄ咩，要做認人手續架嘛，黑麻麻容乜易點錯相架。

八月的月圓夜

今日係中秋節，前幾日一直都唔覺係一會咩事。但直到今個晚上，終於都感覺到聖誕嘅氣氛啦。

今晚放咗學(係呀，中秋都要返學，慘絕人寰。)一行出lecture room就聽到d小朋友玩到嘻嘻哈哈，先醒起今日係中秋節，終於都有埋d節日氣氛啦。一路行返出般咸道等巴士，見到迎面有好多少男少女拎住d點咗蠟燭嘅燈籠喺街度行。頓時發現自己無玩燈籠好多年。講起燈籠，我諗返起細個一件事。我十歲左右，年年中秋都會去同亞爺度食飯做節。我亞爺(對我)係一個好孤寒嘅人，佢唔鍾意我係虧本貨喎，咁多年都無買過d咩比我。果年，亞妹氹掂亞爺買燈籠比佢，(亞爺當年係超錫亞妹)，佢就話個個細路都有份，包括我。我唔即時開心到癲咗呀。我揀咗一個要點蠟燭嘅蝴蝶燈籠。我唔記得亞妹揀咗d乜，因為佢同以下呢件事已經無關嘞。表弟都有份買燈籠，猶記得當年足球小將真係風靡萬千童男。所以表弟亦係足球小將嘅引領之下，買咗個電燈嘅足球燈籠。個茂里表弟真激死人，燈籠就係燈籠啦，拎嚟欣賞架嘛，要踢波就買西瓜波啦。佢拎住個足球燈籠喺我隔離係咁踢。條友d手腳又唔協調，腳踢起高d，隻手又提高d；腳踢起高d，隻手又提高d……就係咁，佢就一路迫近我個點咗蠟燭嘅蝴蝶燈籠嘞。當我叫佢小心d，叫咗兩三聲佢都唔多理我，我就打算你唔撇我撇之際，條茂里終於踢中咗個波，亦都一腳中咗我個燈籠。就係咁我個燈籠燒著咗，隻蝴蝶有一個好大個嘅窿。我都未識得做反應，亞爺就話，"輪鬼盡，人哋個個都玩得好地地，你又走去火燒蝴蝶。我唔買架啦。"
個燈籠穿咗個大姑窿，已經夠唔開心架啦，仲要比亞爺一句說話，講到成件事係我有問題咁。我就梗係喊啦。其他人呢個時候梗係笑我啦，媽咪見人人都有得玩，話買返個燈籠比我。但我好堅持唔再買，因為我唔想搞到件事好似真係我嘅責任咁。但係硬頸係要付出代價嘅，果年我只有睇，無得玩。

仲有，我細個果陣，亞爺係住喺大坑。所以我都好鍾意中秋節，因為大坑有舞火龍睇。細個睇舞火龍好刺激架。條龍好大條，插滿晒香，個龍頭同龍尾好大個，分別都要成四﹑五個人去舞，尤其係龍尾真係好大好大個，重到d人拎唔穩，周圍擺，有時仲會擺到挖住地嚟行。嚟遠就會聽到d人嗌定"龍尾嚟啦，散開呀﹗"然後d人就會有咁埋迫咁埋牆比條龍尾過。仲有呀，d人成日都去"monk"條龍d龍香，佢哋話保佑家宅安寧。然係又會捉住d細路仔去"捐"龍底，話"捐"咗會快高長大，聰明伶俐喎。我一晚都會"捐"成五﹑六次，我都好認同"捐"完龍底係會聰明伶俐嘅，但快高長大就……都係講返"捐"火龍，成日都見到條龍真係著火，因為真係有好多香喺條龍上面。d人成日都追住條龍走勻成個大坑，真係好熱鬧架。話時話呀，自從亞爺搬咗，我都有十幾年無返大坑睇舞火龍啦。好掛住條大火龍呀。

3周年禮物

3周年嘅紀念禮物 -- 情侶手錶是也。

------------------------------------------------------

亞fred讚我哋隻錶靚呀。 (後記於10月6日)

開心悠長假期

3 年啦，咁快就3年啦。

過得好幸福，好開心，好安穩，好甜蜜嘅3年。

呢個係我嘅第一個3 年。

我仲希望有多3 年，再3年，又3年……要三三不盡……