我哋已經無嘢啦

我哋已經無晒嘢啦！我再遲鈍都深切覺得到，我哋已經完完全全無晒嘢啦。唔好傻啦，各位同學女。

後遺症

星期五博晒命咁做個 fitness test。後遺症到今日都未完。我條腰啦﹑頸啦﹑大脾啦﹑背脊啦……都好痛，真係好痛架。我痛到訓醒覺都起唔到身呀﹑唔可以落樓梯﹑唔可以打乞嚏，最嚴重嘅時候，連吞口水都痛呀。好慘呀。

我咁週身痛，但今日返到st. mark's 開會前都依然照打羽毛球。有得玩我就梗係又去玩啦，我係痴線架嘛。打吓打吓又唔覺得痛啦，不過我好肯定只係暫時嘅錯覺，我聽日又會再痛過架啦。

只有我在意

我無見李anutie都幾年，我仲記得我第一次見佢嘅情況﹑氣氛同內容。星期六晚為咗比個surprise party Ah Boo，所以去咗太古城。我都有差不多十年無上過去啦，我都完全唔記得點去，但屋裡面嘅裝修一d都無變。L型嘅梳化﹑我好鍾意嘅龍貓咕"臣"﹑好大好大嘅洗手間……

不過，我果晚都有一個surprise。李anutie原來已經唔記得我啦，連名都唔記得啦。我一直記憶猶新嘅野，其實喺其他人心目中都只不過係微不足道啫。所以，以前嘅野都係……算罷啦。

Monster House

寫得呢個heading就梗係睇咗啦。真係一套"we"嘩鬼叫嘅既卡通片呀。以睇卡通片嘅心情黎講，佢真係一套幾驚嚇嘅卡通，d人會唔見咗同d人好粗魯；以大人嘅角度，呢套係一套好搞笑﹑同好富娛樂性嘅卡通，因為你會發現佢臨尾竟然係講緊一段四十幾年嘅愛情故事。

大人嘅角度，monster house係好睇嘅。至少佢有創意先啦，一大堆木板追住3 條o靚仔，都會無人理嘅，架警車比d樹捉住係咁fing，又係無人理嘅，唔係呀，成條街都無人架。睇黎睇去都係得3 個塞豆窿同一間屋。係咪勁呀。

Round One Fight

Round One -- Fintness Test
今朝十點去咗做 fitness test。我自從中五畢咗業之後都無再上過PE堂。唔好話體能，連跑兩步都有d扯蝦嘅感覺。但 apply 咗 csd 嘅 post，兩個星期前佢寄信黎叫我去做 fitness test，咁咪去囉，試吓唔洗死嘅。

項目包括﹕仰臥起坐﹑穿梭跑 (9 米單程來回10 次)﹑俯撐取放﹑立地向上直跳及800米跑。5個item合共要取得15分，而每項需獲最少一分。

真係老啦，做完第一項都腳仔軟。好彩都有4分。
未抖完，仲腳震緊，已經要做第二項。實際時間睇唔到係幾多，只係睇到廿幾秒度啦。好彩即呢個item都有座低4分。
跟住果個"俯撐取放"，係我最驚既item。我臂力唔好，唔可以支撐到自己好耐。我喺屋企做過兩次都唔係咁滿意。都好好彩比我做到16下，有3分。
之後就係"立地向上直跳"，呢個我反而係最有信心，話晒以前都有練攔網，唔會衰得去邊。可以跳3次。我第一次跳到37cm，我都唔係好滿意，佢仲話我未企定就跳，咁樣會跳得高d喎，要我下個試跳要企定先好跳。我心諗﹕大佬，你唔好唔計呀，我腳仔軟啦。跟住果次跳仲衰，結果佢比我37cm過關。都係得3分。(-_-')一額汗呀。
最後，800米真係我超弱項呀。因為我耐力唔好，仲要放到最尾先跑800，攞我條老命好過囉。
但我諗過，最少要有1分就無問題，所以只要我唔放棄﹑唔犯規﹑唔太遲就無問題。我依然好盡力完成800米返到黎，對腳簡單唔屬於我自己，企都企唔穏呀。(-_-")

又驚又險﹑腐腐碌碌﹑大命夾好彩都比我pass到個test。嚇死呀。

我唔係香港人

我真係唔覺得自己係一個香港人，又或者係一個中國人。我發覺自己d中文差到爆。成日睇返自己個blog都發現自己打錯晒d字，我諗得我一班識咗好耐既friend先知我喺度寫緊乜。我連唱k時候d你你我我都調轉晒。真係……九年免費教育，浪費晒納稅人嘅錢呀。

瘋狂music blog

我簡單就係喪blog我個music blog呀，完全係欲罷不能。我仲有好多﹑好多歌想擺上去，但我規定咗自己一日maximum只可以blog兩首。而家個waiting list排到下個月中呀。blog歌簡單就係興奮呀。

又得返我

都唔明點解我次次都做到咁夜架。係呀，我又要OT啦，又係得我一個人。個PROGRAM仲未GEN完D圖，GEN到幾時呀?我好眼訓呀。

尋晚去咗唱K，唱到好早先屋企，而家極度之勁唔夠訓。天呀，做乜次次都係我最需要訓既時候，你先黎折磨我。

我幾時先有得放工呀，我要放工呀。

My MSN Spaces

除咗呢個blog之外，我仲有一個MSN spaces博客。但果個博客我並唔係拎黎寫野既，我係拎黎記住D歌。我每日都會諗起一至兩首我覺得好好聽既歌，我唔想晒咗佢，所以我用我個spaces記低咗佢哋。

算係另一種抒發啦。

Birthday without birthday cake

我上年生日食咗兩大個生日蛋糕架，可能食埋今年果個呱。今年竟然無生日蛋糕食喎，我未許願架。咁點先?下年係咪可以許多個先?

但小鵬買比我既Godiva松露朱古力真係超好食呀。又唔係勁甜，但超好味。勁好食呀。可惜唔記得影相啦。

香港書展 2006

香港書展 2006 ==>(我) 勁迫﹑勁臭﹑勁多人！ (亞妹)勁買書﹑勁瘋狂買書﹑勁不停買書。 (小鵬)勁悶﹑勁攰﹑勁想走。

唔同人真係對書展有唔同既感受。我過去呢幾年都有去，老實講書展年年都多人，但今年最難頂。事關今年唔知點解特別熱，一路排隊入場，經中環廣場，再過舊會展，再行過鷹君中心，然後兜返過會展天橋，再出行人路屈返上會展正門。就係咁行，行咗差唔多有半個鐘。雖然d人好守秩序，但d "喼"唔守秩序呢。我比d喼炒咗我幾鑊，唔仆........低算係咁呀。

入到去會展，真係"people mountain people sea"呀，個個書攤都係人，人仲多過書，似係"人展"多過"書展"。但我同亞妹都堅持要買﹑要迫，因為我唔想白返一場，同我地想係有d書想買。

結果，行咗三個幾鐘，買咗十幾本書，餓都肚都攣，個身臭到冤………

aptitude test (done)

尋日去做aptitude test，要去到觀塘既中華基督教會蒙文偉書院度考。我車，都唔知邊度黎既。查過地圖，要去到翠屏村。我真係唔係太識路，所以小鵬就陪我去囉。最後都搵咗大半個鐘呀，大熱天時，我哋兩個就好似"逐步離開雪地的雪人"=> "慢慢﹑慢慢的溶化著"。真係好辛苦呢。好彩都搵得到。

我係"尋找蒙文偉"既路上仲發現，原來試場唔只一個，同埋仲有好多人考添架。搞到我有d緊張。

講返個test，30分鐘做30條MC，d題目唔算深(at least 我唔覺得深先啦)，相反係淺到我覺得"有無咁淺呀?係人都識做，做黎做乜鬼呀?"既感覺。最尾，我聽到"Time's up. Stop writing and put down your pen", then I knew the purpose of this test........"Speed". ARRRR.......I haven't completed the test. I still got 3 questions have not finished. Shit!
As a result, I am a bit disappointed, but I still feel good since I did it.

飲早茶

你話呀，係咪搵我做丑人丫。

今朝我哋一家去飲早茶。係呀…係一家人呀。第一當事人同第二當事人仲拍住拖去搵座。 (-_-")吹脹。

anyway，如果真係我所見咁既話，都係一份好既生日禮物。 = )

再一次攤牌

我臨訓前，再同第一當事人攤一次牌。老實講，係攤牌之前，個心真係好忐忑，因為唔知個後會係點，但我為呢個問題點都要面對，因為我睇得佢哋一時，唔睇得佢哋一世，佢哋兩公婆仲要對埋呢下半世。大家個心有條刺，你猜我我估你，仲點可以生活得開心。

我第一句就問第一當事人: "你係咪仲覺得佢(指住第二當事人)出面有人?" 第一當事人話: "我無提呀，你提咋！" 我話： "唔講唔提，點解決問題。我唔要你認同我，但我亦都唔同意你既講法。但而且我想做既係解決呢個問題。"抆"咗條刺，咁大家以後都唔好再提。" 我再講： "你話要佢(再指第二當事人)同出面既人分開，你就會算數嘛。係唔係？咁你要佢點樣証明佢哋分開咗？" 第一當事人微微低頭，無出聲，好明顥佢由頭到尾都係埋怨，無諗過要點實際解決辦法。咁佢唔出聲，我就比佢諗下。大家咁就去訓勒。

但我確實係比第一同第二當事人……吹脹，佢哋睇落又唔似有事。當二當事人手痛﹑鼻敏感，第一當事人又會幫佢搽藥油﹑買敏感藥。搞到我好似個八婆咁，去理人哋兩公婆既事，吹脹。咁當然，佢哋真係咁恩愛既話，我寧願我係一個八婆囉。

無期望的"Superman Returns"

我一直對超人都無乜感覺，只係一個好識得利用自己既超能力去幫其他人既大英雄。

所以，小鵬提議話想去睇超人，我唔敢直接反對，只係無爽快認承啫。但尋晚實在唔知有邊度好去，所以去睇戲，但成個銅鑼灣都係上緊超人。迫於無耐，超人就超人啦。

頭果15分鐘，一路咁講超人同超人老豆，我都唔係好知佢講乜。但睇到佢做返一個城市裡面既超人，又真係幾令人……景仰……我諗應該係咁講。

最後，知道超人有後，的確係覺得有點安慰，(婦人之見﹑愚昧之極)。

林公子請飯

前排話apply果個analyst programmer，唔請我呀。不過請咗我個同事，所以加成皮野人工就梗係要請食飯啦。(其實，係我果日放工坐開佢車，兜口兜面屈佢請食飯，佢無得唔請啫。)就係因為咁，我哋今日成team人就去咗食飯勒。我哋去咗銅鑼灣度食，d野食ok啦，但氣氛就好好。

少少既努力

我星期二果晚抽咗少少時間去咗亞姨屋企練琴，呵，星期三晚學琴既時候，華姐就讚我彈得好。就係咁簡單，只要我負出少少既努力，就有大大既收獲。真係世上無難事，只怕有心人。

好好聽

我頭先打電話去稅局問佢地個郵寄地址。
佢比我聽返自己個留言，我覺得自己把聲好好聽呀。

好多謝

我今日同小鵬食完飯，行返屋企果陣，小鵬都係同我傾咗我最逃避既家庭問題。但佢好正面咁同我講，叫我有咩事，一定要話佢聽，佢會喺我身邊，好感動呀。

我唔知點表達，但真係好多謝佢。

香港水族廣場

我同小鵬帶咗海明去鰂魚涌既香港水族廣場。果度全都係賣水族既野，即係金魚呀﹑水草呀﹑魚缸﹑魚糧………點解去果度呢？原因係我同小鵬原本諗住同海明去海灘玩架，但呢幾日天氣唔好，尋冕落完雨涼返，所以打消咗去游水既念頭，因為唔想凍親海明。但唔去海灘又諗唔到帶海明去邊度玩，所以就去咗呢個新開既廣場勒。

去到發現好多人，但其實可以睇既野又唔係咁多。係d珊瑚魚﹑水母﹑鯊魚仔同另類海洋生物(即係寄居蟹﹑海星﹑唔知咩咩蝦)比較吸引d。我哋兜咗一個圈，影咗張閃咭就走lu。

反斗車王

尋晚睇咗反斗車王(Cars)，覺得套卡通片都ok好睇，但唔係太啱細路仔睇，因為太多內心戲。

但有個位令我覺到"叮"一聲既係，莎莎帶咗閃電王McQueen上到山，再望返落黎，見到好多好多既車係高速公路到飛馳，都唔知為咗d乜，過得一d都唔開心；相反，旁邊既一個鎮仔(打冷鎮)，雖然佢哋生活好簡單，不過佢地好享受箇中既樂趣。佢哋相處和睦，而且守望相助。佢再講返，現代人成日都為咗搵錢，勞勞碌碌；一句為生活過得舒適過得好，就做咗金錢既奴隸，成日愁眉苦臉。點解唔可以過得簡單d既，比自己生活得開心d。

其實我覺得生活唔一定要好富裕，只需要我想買野既時候，有錢買野。天氣好既時候去沙灘行個轉，食杯軟雪糕咪好開心囉。大屋﹑車﹑名牌衫褲……等等，有唔代表我開心，無又唔等於我失敗。我要既只係同我關心同鍾意既人一齊過，咁咪開心囉。

做人簡單d好。

Fine Wine Dinner

星期五果晚，我哋成班同事去咗Fine Wine Dinner。我哋帶咗兩枝紅酒，一支係98年既Margaux同一支01年既Lafite。試過兩支之後，我都係鍾意支Lafite多d。雖然唔可以話醇到唔"啦"喉，但比Margaux好得多。但我同事Jason話佢試過96年既Lafite仲得d添呀。

生日禮物

話咁快又一年啦，七月又係我既日子呀，我生日嘛。

我要講既唔係我生日呢件大事，而係小鵬今年送比我既生日禮物。係呀，我喺A1200同iPod之間，揀咗A1200。我又有新電話用啦(^_^)。記得上年小鵬都係送電話比我，就係我今日trade-in咗果部O2 Xphone IIm。我其實好鍾意果部電話架。但我想要部新電話既原因唔係我貪新忘舊，而係佢真係唔得囉。成日都hang機，個headphone又壞，所以先谷住換咋。我仲係喺小鵬同意之下換架，都算徴求過前買家既同意嘛。

不過，果部機最後都有d作為，真係估唔到果部機可以trade到$1100咁多。總算可以最平既價錢，買到最想要既野呀。

始終都係吵咗鑊

係我blog 完last blogger之後，第一當事人又喺房度走出黎，講咁樣講果樣；最後，我都係同佢吵咗鑊。結果係佢連我都唔信。

既然佢唔信，我亦都無必要再去介意佢在意d乜。我要講既我都講晒，佢決定唔聽，我亦都唔會理比面佢。其實，我真係好唔想再見到佢，本來諗住執野去亞姨度住；但諗深一層，我又無需要避開呢個人。我偏偏就係要留喺度篤眼篤鼻。佢最好唔好黎惹我，我唔會再就住佢架啦。就睇吓佢長命定我長命d啦。

最後一句，我要同佢講既係，
"你放心啦，我會睇住你點死架啦。"

失眠

唔知邊個最後熄燈，我只知我比果一吓"啪"一聲嚇醒咗，就再訓唔返。

自從醒咗之後，我個人就好唔安落。所以我決定起身，呢個時候喺半夜三點幾。

事實上，我係覺得好困擾。有d野我真係唔識解決，感到自己好無能，但又唔想再比件事一直滾大而又坐視不理。喺呢一刻故事既兩個主人翁都訓到扯晒鼻鼾。係啦，呢d明明係鼻鼾聲，係人熟睡都會有架啦，點解會搞出咁大件事。事端到底係點樣開始，我一d都唔知；我想過去明白了解，但當事人不願置評，只強調片面既事情既發展。

早幾日一大早，我又再被兩個當事人吵醒，要我來評理。我坐喺廳中間，不停聽完又聽咁聽著一段又一段既錄音。我全神貫注的聽著，只聽見聽了廿多年﹑熟悉的鼻鼾聲，卻一點都找不著當事人說的各個人名。說了幾片"我聽見的也只有鼻鼾聲"的事實後，當中一位當事人開始質疑我的中肯程度，開始不願再詳述他所認定的所謂事實。

由於日前跟一位友人商討過事情的發展和可採取的解決辦法，所以我換了個辦法，希望能知道當事人的需要。我給他假設了，若果事情真的如他所想般發生，他現在想怎麼樣。他回答的答案在那一刻確實令我有一丁點的放下心頭大石，他說當然要他們不再見面啦，要不然你想我們分開嗎?(我不否認，分開曾是我認定的最好方法。)

聽到他提出的要求看似多樣的簡單，但想深入一點，事情仍是無法解決。原因不是第二當事人不願作出配合；而是，雖然第一當事人的要求合理，但理由過份。無中生有的事，哪來解決辦法。我想了一天也不理解，就算第二當事人答應了，又如何証明第二當事人真的履行了承諾。現在正處於怎麼証明"沒發生的事沒發生過"的時候，但當信任己不再存在在彼此的中間時，要証明"沒有"比要証明"有"更困難。

我溶啦……

今日約咗Miss Ma，邊個Miss Ma？！咁我果對twins表弟既班主任囉。我約咗佢幫兩個表弟攞成績表。我哋約咗lunch time，所以我12:30即刻走人過灣仔，點知我一去到佐敦地鐵月台，Miss Ma打比我話佢將會放我飛機，叫我去拎咗表弟袋暑期功課先，遲d再打比我。ok啦，攞咗先囉無咩問題既。

去到先知撞鬼，袋野鬼死咁重，今日條街仲鬼咁曬添。一路行就知死，仲死得好難睇，我溶緊啦。

忽然聽到……

忽然之間 天昏地暗 世界可以忽然什麼都沒有
我想起了你 再想到自己 我為什麼總在非常脆弱的時候 懷念你

我明白太放不開你的愛 太熟悉你的關懷
分不開 想你算是安慰還是悲哀

而現在就算時針都停擺 就算生命像塵埃
分不開 我們也許反而更相信愛

如果這天地 最終會消失 不想一路走來珍惜的回憶 沒有你

我明白太放不開你的愛 太熟悉你的關懷
分不開 想你算是安慰還是悲哀

而現在就算時針都停擺 就算生命像塵埃
分不開 我們也許反而更相信愛

真係幾時聽都咁好聽。

收到信啦，交埋錢啦

我等咗封信好耐啦，仲以為HKU唔收我讀Statistics添。但小鵬話佢唔收我都會比信通知我，好在今日終於都收到信啦。不過咁樣咪即係我又要比錢囉，真係一件好事?!

但係我可以同小鵬同一年畢業啦。

你有無試過

你有無試過想個人死，而果個人死咗，你自己唔會好傷心，而且覺得自己既生活好過得好d呀。我有呀。或者唔洗死咁極端，分開吓啦，我知咁樣唔好，但係我估咁樣大家都會過得好d。

世界盃咁就完咗啦

唉，世界盃咁就完咗。
唉，咁就比義大利拎咗個冠軍。
唉，施丹同費高咁就退休，連亞叔都退埋休。
唉……又要等四年啦。

aptitude test

尋日收到信，要我去做aptitude test。個日子仲擇得非常之準呀，本月22日，下午4:00。咁就邊度都唔洗去啦。係明益我先好呀。

仲有呀，下晝同小鵬帶鬼妹表妹去公園玩。我同海明玩咗一陣好攰，所以我坐埋一邊睇佢哋玩。點知坐坐吓，有個婆婆指住海明同我講："亞妹幾大呀?""六歲幾啦。"我話。跟住，婆婆笑住同我講："生多個仔就啱啱好一個好字囉。" (-_-') 心聲:"我都知，但個女唔係我架。"但我又唔想同佢解釋咁多，笑吓就算。然後婆婆又繼續講："帶住小朋友，好難搵食架。你有無做野呀?"(-_-")心諗:"我就梗係有做野啦，個女都唔係我既。"所以，我同婆婆講："我有做野呀。"最後，婆婆就問："咁邊個幫你帶個女呀?"(-_-"')心聲："個女我撻返黎架。"

唔經唔覺就過咗個星期六

因為前一晚口多多應承咗小鵬十點同佢食早餐，所以一早又比佢叫醒咗。哎吔，好眼訓呀，放假就比人訓多陣嘛。

食完早餐，小鵬陪我去咗灣仔簽約，我而家份工又續多半年啦，做到下年一月尾。不過，叫agent加人工，又唔肯，只係比返d勞工我咋，就己經好似皇恩大赦咁。大佬呀，d假我應得架，刻薄鬼。

簽完約，我哋又走咗去朗豪坊，因為小鵬要買生日禮物比佢d friend。但最終，連佢自己都買埋一份。佢喺Laosmiddle買咗個袋， 佢孭都幾好睇既。但個sales失驚無神拎個同款但細一個size既袋黎比我試，我都無話要買，冧小鵬咪得囉。咁我試過，咦，都唔好睇既。我孭得唔靚就梗係唔買啦。但小鵬孭得好睇，佢諗咗一陣，就決定要買勒。

行咗一陣，我哋就返咗屋企。我就梗係練琴，小鵬就梗係打機啦。

等到差唔多五點幾，就去金滿庭度食飯。但我竟然喺食飯之前肚痛呀。好在金滿庭d野食好大碟，同埋都好好食。所以食咗好多同好飽。

跟住嫲嫲仲派利是，我都有份呀。

搞掂你

終於比我搞掂條sql啦。

我一定要post係度，因為我真係諗得好辛苦架。

SELECT
a.latitude latitude, a.longitude longitude, a.WMO_station
WMO_station, a.WMO_block WMO_block, b.level_ind pressure,
b.hhh height, b.dd wd, b.ff ws, b.tdtd dew_pt, b.ttint temp,
b.in_time in_time, b.rep_no rep_no, b.iym IYM, b.idh IDH,
b.obstime
FROM
uarepheader a, temp_level b
WHERE
b.level_ind = 200 AND b.obstime = To_Date('2006-07-06-12',
'yyyy-MM-DD-HH24') AND a.obstime=b.obstime AND
a.rep_no=b.rep_no
AND (a.WMO_station, a.WMO_block, a.in_time)
IN (
SELECT
u.WMO_station, u.WMO_block, Max(u.in_time)
FROM
temp_level t, uarepheader u
WHERE
t.level_ind = 200 AND t.obstime =
To_Date('2006-07-06-12', 'yyyy-MM-DD-HH24') AND
u.obstime=t.obstime AND u.rep_no=t.rep_no AND
u.latitude >=1400 AND u.latitude <=4600 AND
u.longitude >=9400 AND u.longitude <=14100
GROUP BY
u.WMO_station, u.WMO_block)
ORDER BY
a.WMO_station, a.WMO_block;

我錯過咗個大日子呀

2006年6月28日﹐係一個好大既日子，但我竟然miss咗。真係難辭其咎。
I am so sorry.

執迷不悟

我今日真係深切體會到"執迷不悟"。

我今日同條sql搏鬥咗好幾個鐘都係輸咗比佢，只怪自己學藝未精，未變妖精。最後都係請教同學仔。
真係覺得自己浪費青春。我都明白係我既缺點累事。我好唔鍾意開口問人，我記得有個中六﹑中七既同學話我太好勝。我果陣時唔認同，我覺得，佢識我有幾耐，佢知我有幾多野呀，我好唔好勝佢又點知。但自此之後，我就開始留意自己。我開始發現自己真係好鍾意同人拗；好鍾意要叻過人哋；自己遇到困難，一定要自己解決，非到絕望﹑沮喪既時候，都唔會向人求救，但大多數到咗果個地步，好多野都無藥可救。

呢d可能係太過自負既原因啦，係自出娘胎就一直跟住我。亞媽話我呢d叫做"硬頸"，講得幾好聽呀，可惜都唔係好野呢。我都唔知需唔需要改咗佢。

電話鈴聲

呢個係我個電話鈴聲呀，好好聽架。

非你莫屬 林依晨
(東方茱麗葉片尾曲)

懂得讓我微笑的人　再沒有誰比你有天份
輕易闖進我的心門　明天的美夢你完成

整個宇宙　浩瀚無邊的盡頭　
每顆渺小星球　全都繞著你走

愛我　非你莫屬　
我只願　守護　由你給我的幸福
愛我　非你莫屬　
也許會　笑著哭　但那人是你所以　不怕苦

懂得讓我流淚的人　給的感動一定是最深
我心中留下傷痕　你同時點亮了星辰
看　那麼多相遇　偏偏只和你　天造地設般產生奇蹟
哦　我心的縫隙　我想除了你　任誰也無法填補這空虛

愛我　非你莫屬　
我只願　守護　由你給我的幸福
愛我　非你莫屬　
也許會　笑著哭　但那人是你所以　不怕苦
但那人是你所以　不怕苦

赤柱的黃昏

尋晚睇波睇通頂，搞到訓唔著覺。今朝成朝都無訓，十二點幾先去訓，訓醒都三點幾。原先約咗小鵬話今晚同佢亞爸慶祝生日，但我太攰啦，所以小鵬提議我唔好去。咁我咪睇返最新果集"東方茱麗葉"。睇完之後，諗住都唔會再訓，不如都係去同小鵬佢哋食飯啦。一心興高采烈打比佢，同佢講我可以去食飯，點知佢都無黎反應。咁…我都係唔去啦。

之後，五點鐘度，我見咁好天，所以就自己一個人去咗赤柱度行吓。只係十五分鐘，我就由屋企轉到去赤柱正灘。一入到去見到有雪糕車，即刻走去買個軟雪糕食，好耐無食過啦。一路行一路食，覺得好舒服，好滿足。之後行咗去赤柱大街，買咗對耳環做今日既手信。再兜咗幾個圈，就返咗柴灣同亞妹買牛扒，今晚我哋決定食牛扒呀。

好簡單既一日，但心情好舒暢喎。
it's a good day.

Motorola A1200 vs iPod nano

到底 Motorola A1200 好呀，定係 iPod nano 好呢?

半年壞一次

屋企個熱水爐又壞咗啦。

佢呀，每半年壞一次，真係麻煩呀。成日都要整，我呢兩日又無熱水沖涼啦。

神秘電話

話時話，完場之後，好無心機咁準備send個msg比小鵬，但發現我有個miss call，但係個call係長途電話黎架喎，"60177139xxx"，到底係乜水打比我呢。十二點幾咁夜，唔驚比我鬧呀。

四年後再見啦。

尋晚，親眼目睹我至愛既英格蘭八強止步啦。睇住Ferdiand同Gerrard喊到豬頭炳咁，真係有d唔忍心。但每件事總要有人負責既，我覺得英格蘭喺Rooney被紅牌逐出場之後，踢得仲好咗，所以對Rooney我唔會有咩怨言，因為仲年輕，係人年輕時都會做錯事，有邊個唔係少年輕狂呀，人係需要磨鍊，寄望佢唔好再有下次啦。

至於久攻不下既Lampard，我係覺得佢啖氣，所以咁獨食，球球都卅幾四廿碼"band"埋去，中龍門就話博守門員撲唔到或者甩手有人補上執死雞，但大佬呀你"band"埋去係幫人解圍既，唔該你做下波啦。

但最致命既唔係Lampard，係Eriksson害死英格蘭，明知Lampard唔記得帶射門鞋，唔該就唔好比咁大壓力佢，要佢第一個射十二碼啦。第一球既十二碼簡直就係決定生死既一刻，要個咁無信心既人去比信心其他人?!咪玩啦。你唔想撈啫，我都仲好想睇英格蘭捧盃架。

希望四年後大家仲係一條好漢。

但我真係好傷心呀。

人山人海……

星期五晚，睇完"鬼域"之後就去咗奧海城睇波。本來諗住可以喺food court度坐低慢慢睇。但喺我去到既時候，排隊入food court條龍已經打咗蛇餅啦，所以舒舒服服睇波無望，唯有急急腳去揾個靚位企喺度睇。因為我高度既問題，唔可以喺最底果層近距離咁睇，只好上二樓睇啦。但發現原來周圍都比人霸晒啦，d人已經坐晒喺地下度等開波，真係好熱鬧。好難得先搵到條"la"仔睇咋。

可惜我捧既阿根廷出咗局呢。

鬼域 = 珍惜

星期五晚去咗睇"鬼域"。原先以為係一套鬼片，所以頭果廿分鐘睇得好"斯縮"，因為驚嘛。但睇睇吓發現都唔係鬼片黎既，仲有幾個位拍得好搞笑添(本來應該係要驚既，但唔知點解可以拍得咁搞野)。

其實，"鬼域"係講一個被人放棄既人同事所存在既另一個國度。就好似唔要既玩具﹑唔記得拜祭既先人﹑甚至唔要既bb(即被人落咗既胚胎)同諗過唔做既念頭想法，都會喺呢個空間出現，亦都會隨時消失。喺果個空間既所有野都好憎恨人，因為係人創造咗佢哋出黎又唔要佢哋。

套戲拍得一d都唔好"睇"﹑即係視覺上一d都唔靚，因為跟本就無focus係呢部份。套戲要做既一樣野就係話比人聽唔好輕言放棄，不論係對其他人或者身外物，尤其係對生命既尊重(無論係自己既生命或者一個未出生既生命)。一句到尾，要珍惜世上所有既野。